دۆلەت تاراتقۇلىرىنىڭ خەۋىرىگە قارىغاندا، ھىندونېزىيەنىڭ شەرقىي جاۋا رايونىدىكى سېمېرۇ يانار تېغى چارشەنبە كۈنى ئەتىگەن سائەتلەردە ئۈچ سائەت ئىچىدە يەتتە قېتىم پرتلاپ، يانار تاغ كۈللىرىنى چوققىسىدىن 800 مېتىر ئېگىزلىككە پۇركىگەن.
ئانتارا خەۋەر ئاگېنتلىقىنىڭ بىلدۈرۈشىچە، تۇنجى پارتلاش (سەيشەنبە كۈنى) ئەتىگەن سائەت 4:58 دە يۈز بەرگەن بولۇپ، شىمالىي شەرقكە قاراپ ئاقىدىغان قويۇق كۈلرەڭ كۈل بۇلۇتى ھاسىل قىلغان.
يەر تەۋرەش ھەرىكىتىنىڭ ئەڭ يۇقىرى دولقۇن كەڭلىكى 22 مىللىمېتىر دەپ خاتىرىلەنگەن بولۇپ، 138 سېكۇنت داۋاملاشقان.
ئۇنىڭدىن كېيىن سائەت 06:10 ۋە 06:56 دىمۇ پارتلاشلار يۈز بەرگەن بولۇپ، كۈللەر 300 مېتىردىن 700 مېتىرغىچە ئېگىزلىككە چىققان. سائەت 07:05 تىكى يەنە بىر پارتلاشتا بولسا 600 مېتىر ئېگىزلىكتىكى بىر كۈل بۇلۇتى شىمالغا قاراپ تارقالغان.
بەشىنچى قېتىملىق پارتلاش 800 مېتىرغىچە يەتكەن. دائىرىلەر يانار تاغنىڭ ھەرىكىتىنى داۋاملىق كۆزىتىۋاتقان بولۇپ، ئۇنىڭدىن كېيىن يەنە ئىككى قېتىم پارتلاش يۈز بەرگەنلىكى خەۋەر قىلىنغان.
دائىرىلەر ئاھالىلەرنى ئىسسىق بۇلۇتلار ۋە لاۋا ئېقىنلىرىنىڭ يانار تاغ چوققىسىدىن 17 كىلومېتىرغىچە يېتىپ بارالايدىغانلىقى ھەققىدە ئاگاھلاندۇردى ھەمدە بېسۇك كوبوكان دەريا ساھىلىنىڭ 500 مېتىر ئەتراپىدىكى پائالىيەتلەردىن ساقلىنىشقا چاقىردى.
تىنچ ئوكيان «ئوت ھالقىسى» غا جايلاشقان ھىندونېزىيەدە يەر تەۋرەش خاراكتېرلىك ھەرىكەتلەر پات-پات يۈز بېرىپ تۇرىدۇ ۋە بۇ دۆلەتتە 120 دىن ئارتۇق ئاكتىپ يانار تاغ مەۋجۇت.
