ئۇكرائىنا پىرېزىدېنتلىق مەھكىمىسىنىڭ تور بېتىدە سەيشەنبە كۈنى ئېلان قىلىنغان پەرمانلاردا، بولۇپمۇ مىخايلو دراپاتيىنىڭ دۆلەت بىرلەشمە قىسىملىرىنىڭ قوماندانى قىلىپ تەيىنلەنگەنلىكى ۋە (ئۇنىڭ) قۇرۇقلۇق ئارمىيەسى قوماندانلىق ۋەزىپىسىدىن ئىستېپا بەرگەنلىكى جەزملەشتۈرۈلدى.
يەكشەنبە كۈنى كىيېۋنىڭ دۆلەتنىڭ دنىپروپېتروۋىسكى رايونىدىكى بىر تەلىم-تەربىيە مەركىزىنى نىشان قىلغان رۇسىيە باشقۇرۇلىدىغان بومبا ھۇجۇمىدا 12 ئەسكەرنىڭ قازا قىلغانلىقى ۋە 60 تىن ئارتۇق ئەسكەرنىڭ يارىلانغانلىقىنى ئېلان قىلىشىدىن كېيىن، دراپاتيى ئىلگىرىكى ۋەزىپىسىدىن ئىستېپا بەرگەنلىكىنى بىلدۈرگەنىدى.
زېلېنىسكىي ئىمزالىغان يەنە بىر پەرمان بىلەن روبېرت بروۋدى، ئۆتكەن يىلى ئىيۇن ئېيىدا بۇ ۋەزىپىگە تۇنجى قېتىم تەيىنلەنگەن ۋادىم سۇخارېۋىسكىينىڭ ئورنىغا، ئۇچقۇچىسىز ھاۋا ئاپپاراتلىرى ئۇرۇشى —ئۇچقۇچىسىز سىستېمىلار قىسىملىرىنىڭ يېڭى قوماندانلىقىغا تەيىنلەندى.
زېلېنىسكىي ھاۋا ھۇجۇم قىسىملىرى قوماندانى ئىھور سكىبيۇكنى ۋەزىپىسىدىن قالدۇرۇپ، ئۇنىڭ ئورنىغا نويابىردا ئۇكرائىنا قوراللىق قىسىملىرى باش قوماندانىنىڭ مۇئاۋىنلىقىغا تەيىنلەنگەن ئولېھ ئاپوستولنى تەيىنلىدى.
ئۇكرائىنا پىرېزىدېنتى يەنە ئولېكساندىر بىلئوسنىمۇ ئۇكرائىنا دۆلەتلىك مۇھاپىزەتچى قىسىملار مۇئاۋىن قوماندانلىقى ۋەزىپىسىدىن قالدۇردى.
پەرمانلاردا ۋەزىپىدىن قالدۇرۇشلارنىڭ سەۋەبلىرى كۆرسىتىلمىدى.
كەچقۇرۇن سىنلىق نۇتۇق سۆزلىگەن زېلېنىسكىي، دۆلەتنىڭ ھەربىي رەھبەرلىرى بىلەن تەپسىلىي يىغىن ئۆتكۈزگەنلىكىنى، ھەمدە يىغىنغا قاتناشقان دراپاتيىنىڭ «پۈتۈن زېھنىنى %100 ئالدىنقى سەپكە مەركەزلەشتۈرۈشى ئۈچۈن» دۆلەت بىرلەشمە قىسىملىرى قوماندانلىقىغا تەيىنلەنگەنلىكىنى ئېيتتى.
زېلېنىسكىي: «قۇرۇقلۇق ئارمىيەسى سىستېمىسىغا كەلسەك، بولۇپمۇ تەربىيەلەش، تەييارلىق، رايونلۇق ئەسكەر ئېلىش مەركەزلىرىدىكى ئۆزگەرتىشلەر ۋە بۇنىڭغا مۇناسىۋەتلىك بارلىق ۋەزىپىلەرنى باشقا بىر كىشى ئۈستىگە ئالىدۇ» دېدى ئەمما بۇ ھەقتىكى تەپسىلاتلارنى ئاشكارىلىمىدى.
قىرىمدا كۆۋرۈك پارتلىدى
بۇ ھەرىكەت ئۇكرائىنانىڭ رۇسىيەنى قىرىم يېرىم ئارىلىغا تۇتاشتۇرىدىغان كەرچ كۆۋرۈكىگە زىيان سالغانلىقى ھەققىدىكى باياناتىدىن كېيىن ئوتتۇرىغا چىقتى.
ئۇكرائىنا دۆلەت خەۋپسىزلىك ئىدارىسى (SBU) سۇ ئاستى ھەرىكىتى ئارقىلىق كۆۋرۈككە زىيان يەتكۈزگەنلىكىنى ئىلگىرى سۈردى.
مەزكۇر ئىدارىنىڭ تېلېگرام سۇپىسىدا ئېلان قىلىنغان باياناتىدا، سۇ ئاستى ھەرىكىتىنىڭ بىر نەچچە ئايدىن بۇيان تەييارلىنىۋاتقانلىقى قەيت قىلىندى.
باياناتتا، «ئۇكرائىنا دۆلەت خەۋپسىزلىك ئىدارىسى خادىملىرى بۇ قانۇنسىز ئوبيېكتنىڭ تۈۋرۈكلىرىگە مىنا كۆمدى. بۈگۈن ئەتىگەن سائەت 4:44 تە، ھېچقانداق پۇقراۋىي تالاپەت پەيدا قىلمايدىغان شەكىلدە تۇنجى پارتلاتقۇچ قوزغىتىلدى» دېگەن ئىبارىلەرگە ئورۇن بېرىلدى.
ئۇكرائىنا ئىستىخبارات ئىدارىسى كۆۋرۈكنىڭ سۇ ئاستى تۈۋرۈكلىرىنىڭ تۆۋەنكى قىسمىنىڭ ئېغىر دەرىجىدە بۇزۇلغانلىقىنى بىلدۈرۈپ، 1100 كىلوگىرام TNT غا تەڭ كېلىدىغان پارتلاتقۇچ ئىشلىتىلگەنلىكى توغرىسىدىكى ئۇچۇرلارنىمۇ قوشۇمچە قىلدى.
كۆۋرۈكنىڭ رېمونت قىلغىلى بولمايدىغانلىقى ئىلگىرى سۈرۈلدى.
ئۇكرائىنا دۆلەت خەۋپسىزلىك ئىدارىسى، ئىدارە باشلىقى گېنېرال-لېيتېنانت ۋاسىل مالىشنىڭ بۇ ھەرىكەتكە بىۋاسىتە رەھبەرلىك قىلغانلىقىنى ۋە پىلانىنى ماسلاشتۇرغانلىقىنى بىلدۈردى.
ئۇكرائىنا دۆلەت مۇداپىئە ئىستىخبارات ئىدارىسىنىڭ باشلىقى كىرىلو بۇدانوۋمۇ ئايرىم بايانات ئېلان قىلىپ، بۇ ۋەيرانچىلىق ھەرىكىتىنىڭ پىلانلىنىشىغا نازارەتچىلىك قىلغانلىقىنى ۋە قاتناشقۇچىلارنىڭ ھەرىكىتىنى ماسلاشتۇرغانلىقىنى ئېيتتى.
