سۈرىيە پرېزىدېنتى ئەھمەد شارا پەيشەنبە كۈنى بايانات ئېلان قىلىپ، ئىسرائىلىيەنىڭ رايوننىڭ مۇقىملىقىغا بۇزغۇنچىلىق قىلىش پىلانلىرىنىڭ دۆلەتنىڭ تىرىشچانلىقى ۋە خەلقئارالىق ۋاسىتىچىلەرنىڭ ئارىلىشىشى ئارقىلىق مەغلۇپ قىلىنغانلىقىنى بىلدۈردى.
شارا تېلېۋىزىيە نۇتقىدا مۇنداق دېدى:
«بىز ئۇرۇشتىن قورقىدىغانلاردىن ئەمەسمىز، بىز ھاياتىمىزنى قىيىنچىلىقلارغا جەڭ ئېلان قىلىش ۋە خەلقىمىزنى قوغداش بىلەن ئۆتكۈزدۇق. لېكىن، بىز سۈرىيە خەلقىنىڭ مەنپەئەتىنى قالايمىقانچىلىق ۋە ۋەيرانچىلىقتىن ھەر دائىم ئۈستۈن ئورۇنغا قويدۇق.»
ئۇ يەنە، ئىسرائىلىيەنىڭ پۇقرالار ۋە ھۆكۈمەت ئورگانلىرىنى نىشان قىلغان تاجاۋۇزچىلىق ھەرىكەتلىرىگە قارىماي، «دۆلەتنىڭ مۇقىملىقنى ئەسلىگە كەلتۈرۈش ۋە قانۇنسىز گۇرۇپپىلارنى رايوندىن تازىلاش تىرىشچانلىقلىرىنىڭ مۇۋەپپەقىيەتلىك بولغانلىقىنى» تەكىتلىدى، شۇنداقلا بۇ مۇۋەپپەقىيەتلەرنىڭ قولغا كەلتۈرۈلۈشىدە «ئامېرىكا، ئەرەب ۋە تۈركىيە ۋاسىتىچىلىرىنىڭ ئۈنۈملۈك رول ئوينىغانلىقىنى»، بۇنىڭ نەتىجىسىدە رايوننىڭ ئېغىر ئاقىۋەتتىن قۇتۇلۇپ قالغانلىقىنىمۇ سۆزلىرىگە ئىلاۋە قىلدى.
چارشەنبە كۈنى، ئىسرائىلىيە ئارمىيەسى دۇرزىي جامائىتىنى «قوغداش» نى باھانە قىلىپ، پايتەخت دەمەشق، سۈۋەيدا ۋە دىرئە رايونلىرىغا ھاۋا ھۇجۇملىرىنى ئېلىپ بارغانىدى.
سۈرىيە ئىچكى ئىشلار مىنىستىرلىقىنىڭ بىلدۈرۈشىچە، بۇ ھۇجۇملاردا 30 دىن ئارتۇق ئادەم ھاياتىدىن ئايرىلغان، 100 گە يېقىن كىشى يارىلانغان.
