ياۋروپا ئىتىتىپاقى رەھبەرلىرى كۈچىيىۋاتقان رۇسىيە ھۇجۇملىرىنىڭ قىتئەگە بارغانسېرى تەھدىت سېلىۋاتقانلىقىنى ئەسكەرتىپ، ئۇكرائىنا بىلەن دۈشمەندىن مۇداپىئەلىنىش ھەمكارلىقىنى كۈچەيتىشكە ۋەدە بەردى.

ياۋروپا كېڭىشىنىڭ رەئىسى ئانتونىيو كوستا مۇخبىرلارنى كۈتۈۋېلىش يىغىنىدا سۆز قىلىپ، ئىتتىپاقنىڭ 10-ئاينىڭ 23-24-كۈنلىرىدە ئۆتكۈزۈلىدىغان باشلىقلار يىغىنىنىڭ «قارار چىقىرىش كۈنى» بولىدىغانلىقىنى ئېيتتى.

ئۇ مۇخبىرلارغا: «ئىككى ھەپتىدىن كېيىن، ياۋروپا كومىتېتى 2030-يىلغىچە دۈشمەندىن مۇداپىئەلىنىش تەييارلىقى پىلانىنى سۇنىدۇ ۋە ياۋروپا كېڭىشى ئۈچ ھەپتە ئىچىدە يەنە بىر قېتىم يىغىن ئاچىدۇ، بۇ قارار چىقىرىش ۋاقتى بولىدۇ» دېدى.

دانىيە باش ۋەزىرى مېتتې فرېدېرىكسېن رۇسىيەنىڭ «ئۇلارغا تەھدىت سالغانلىقىنى، ئۇلارنى سىنىغانلىقىنى ۋە توختاپ قالمايدىغانلىقى» نى ئەسكەرتىپ، كىيېۋنى تېخىمۇ كۆپ قوللاشنىڭ زۆرۈرلۈكىنى تەكىتلىدى.

ئۇ مۇنداق دېدى:

 «ئالدى بىلەن، بىز چوقۇم ئۇكرائىناغا قىلغان ئىقتىسادىي ياردىمىمىزنى ئاشۇرۇشىمىز كېرەك. ھازىر ھەممە ئادەم نېمىنىڭ خەتەرلىك ئىكەنلىكىنى بىلىدۇ... بىزنىڭ ئاساسلىق نىشانىمىز ئۇرۇش ئەمەس، بەلكى كۈچلۈك ياۋروپا بەرپا قىلىش.»

ياۋروپا كومىتېتىنىڭ باشلىقى ئۇرسۇلا فوندېر لېيېننىڭ ئۇرۇشتا كۆپىيىۋاتقان ئۇچقۇ ھۇجۇمىغا تاقابىل تۇرۇش ئۈچۈن لايىھەلەنگەن «ئۇچقۇ سېپىلى» قۇرۇش تەكلىپى، يىغىندا ئەڭ كۆپ مۇنازىرە قىلىنغان مەسىلىلەرنىڭ بىرى بولدى.

ئۇ ئەڭ يېقىندا ھاۋا بوشلۇقىغا دەخلى-تەرۇز قىلىنغان ياۋروپا ئىتتىپاقىغا ئەزا دۆلەتلەر، جۈملىدىن پولشا، رۇمېنىيە، ئېستونىيە ۋە دانىيە قاتارلىق دۆلەتلەر بىلەن ھەمكارلىق ئىچىدە ئىكەنلىكلىرىنى بىلدۈردى.

دانىيە باش ۋەزىرى مېتتېى فرېدېرىكسېن بۇلارنى «ئارىلاشما ئۇرۇش تاكتىكىسى» دەپ ئاتاپ، ھەر بىر پۇقرا ۋە ھەر بىر پارچە زېمىننىڭ قوغدىلىشى كېرەكلىكىنى تەكىتلەش بىلەن بىرگە، ياۋروپانىڭ قاتتىق ئىنكاس قايتۇرۇشىنى چاقىرىق قىلدى.

ئۇ ئۇچقۇلارنىڭ ئۇرۇشنى ئۆزگەرتكەنلىكىنى، ئۇچقۇ تېخنىكىسى ۋە ئۇچقۇغا قارشى تۇرۇش تەدبىرلىرىگە چېگرا ھالقىغان مەبلەغلەرنىڭ سېلىنىشى كېرەكلىكىنى تەكىتلىدى.

مۇناسىۋەتلىك ئۇچۇرلارTRT World - Poland scrambles jets as Russian strikes hit near border with Ukraine

پۈتۈن ياۋروپانى ئۆز ئىچىگە ئالغان  ئېنىق ياۋروپا پىلانى كېرەك

فوندېر لېيېن ياۋروپا مۇداپىئەسىگە قارىتىلغان «مەبلەغ» نى ئاشۇرۇشنىڭ خېلىلا بۇرۇن باشلانغانلىقىنى، «بىخەتەرلىك ھەرىكىتى ئۈچۈن ياۋروپا» (SAFE) قورالى دەپ ئاتالغان 150 مىليارد ياۋرو (176 مىليارد دوللار) قىممىتىدىكى پىلاننى مىسال قىلدى.

ئۇ مۇنداق دېدى:

«ھازىر بىزگە ئىقتىدار يېتەرسىزلىكىنى قانداق تولۇقلايدىغان ۋە ئالغا ئىلگىرىلەش توغرىسىدا ئېنىق پان-ياۋروپا پىلانى كېرەك.»

ياۋروپا ئىتتىپاقى چوڭقۇر ئىختىلاپقا دۇچ كەلدى

مەزكۇر سۆزلەر ئىسرائىلىيە دېڭىز ئارمىيەسى غەززەگە ئىنسانپەرۋەرلىك ياردىمى يەتكۈزۈش ئۈچۈن يولغا چىققان «دۇنيا سۇمۇد فىلوتى» نى توختاتقان بىر ۋاقىتتا قىلىندى.

فىلوت، ئىسرائىلىيە دېڭىز ئارمىيەسى غەززەدىكى نەچچە يىللىق قامالنى بۇزۇش ئۈچۈن  يولغا چىققان پاراخوتلارنى قورشىشى بىلەن، كۆپىنچە پاراخوتلاردا نەق مەيدان تارقىتىشلىرىنىڭ توختاپ قالغانلىقىنى ئېلان قىلدى.

فىلوتنىڭ تەشكىللىگۈچىلىرى ئىسرائىلىيە ھەربىي پاراخوتلىرىنىڭ ئۇچۇر-ئالاقىنى ئۈزۈپ تاشلاپ،  ئەترەتنى توسۇشقا ئۇرۇنغان چاغدا تارقىتىشلارنىڭ توختاپ قالغانلىقىنى بىلدۈردى.

ئىسىرائىلىيەنىڭ بۇ ھەرىكىتنىڭ ھەددىدىن زىيادە ئىنكاس بولغان-بولمىغانلىقى توغرىسىدا سوئال سورالغاندا، سەھنىدىكى ئۈچ رەھبەر (كوستا، فرېدېرىكسېن ۋە فوندېر لېيېن) جاۋاب بېرىشتىن ئۆزىنى قاچۇردى.

كوستا بىر ئاز جىمجىت تۇرغاندىن كېيىن: «بىر نەرسە دېيەلمەيمەن، باشقا گېپىم يوق» دېدى ۋە كېڭەش يىغىنى جەريانىدا ۋەقە ھەققىدە ئۇچۇرغا ئېرىشەلمىگەنلىكلىرىنى ئەسكەرتتى.

ياۋروپا ئىتتىپاقى ئىسرائىلىيەنىڭ غەززە ئۇرۇشىدىكى پوزىتسىيەسىدە چوڭقۇر ئىختىلاپقا دۇچ كېلىۋاتىدۇ. بۇ مەسىلىنىڭ كېيىنكى يىغىنلاردا تالاش-تارتىش قوزغايدىغانلىقى مۆلچەرلەنمەكتە.

مۇناسىۋەتلىك ئۇچۇرلارTRT World - Russia, US coordinate new talks as Ukraine rules out compromise