ئانتىيوكېنو تولۇق ئوتتۇرا مەكتىپى ئوقۇغۇچىلىرى ئولتۇرغان ئاپتوبۇس مەكتەپ ساياھىتىدىن كېيىن كارىب دېڭىزى بويىدىكى تولۇ يېزىسىدىن مېدەللىنغا قاراپ كېتىۋاتاتتى.
ۋالىينىڭ بەرگەن مەلۇماتىغا قارىغاندا، كولومبىيەنىڭ شىمالىغا جايلاشقان بىر يېزىدا مەكتەپ ئوقۇغۇچىلىرى ئولتۇرغان بىر ئاپتوبۇسنىڭ ھاڭغا چۈشۈپ كېتىشى نەتىجىسىدە 17 ئادەم ھاياتىدىن ئايرىلغان، 20 ئادەم يارىلانغان.
ئانتىيوكىيا ۋالىيسى ئاندرېس جۇلىيان يەكشەنبە كۈنى ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، ئانتىيوكېنو تولۇق ئوتتۇرا مەكتىپى ئوقۇغۇچىلىرى ئولتۇرغان ئاپتوبۇسنىڭ مەكتەپ ساياھىتىدىن كېيىن كارىب دېڭىزى بويىدىكى تولۇ يېزىسىدىن مېدەللىنغا قاراپ كېتىۋاتقانلىقىنى، ئوقۇغۇچىلارنىڭ ساھىلدىكى ئوقۇش پۈتتۈرۈش پائالىيىتىنى تەبرىكلىگەنلىكىنى بىلدۈرۈپ: «بۇ، دېكابر ئېيىدا پۈتكۈل جەمئىيەت ئۈچۈن ئېيىتقاندا ناھايىتى ئېچىنىشلىق بىر خەۋەر» دېدى.
رېندوننىڭ ئىجتىمائىي تاراتقۇغا يوللىغان بىر سىن كۆرۈنۈشىدە، ھايات قالغانلاردىن بىرىنىڭ: «مەن ئۇخلاۋاتاتتىم، تۇيۇقسىز ۋارقىرىغان ئاۋازلارنى ئاڭلىدىم، شۇنىڭدىن كېيىن نېمە بولغانلىقىنى ھېچ ئەسلىيەلمەيمەن» دېگەن سۆزلىرى ئورۇن ئالدى.
ئىزدەش - قۇتقۇزۇش ئەترەتلىرى ھايات قالغانلارنى خەتەرلىك ھاڭدىن زەمبىللەر بىلەن چىقىرىشقا مەجبۇر بولدى.
كولومبىيە پىرېزىدېنتى گۇستاۋو پېترو ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، ھادىسىدە تالاپەتكە ئۇچرىغان ئائىلىلەرگە تەزىيە بىلدۈرۈپ: «ياشلارنىڭ ئۆلۈپ كېتىشىنى ياقتۇرمايمەن. بولۇپمۇ ئۇلارنىڭ دەرس ئوقۇۋاتقاندا ياكى خۇشال - خۇرام دەم ئېلىۋاتقاندا ھاياتىدىن ئايرىلىشىنى كۆرۈشنى ھەرگىزمۇ خالىمايمەن» دېدى.
