رۇسىيە دۆلەت مۇداپىئە مىنىستىرلىقى ئۇكرائىنانىڭ غەربىي رايونلىرىدا، ياۋروپا دۆلەتلىرىدىن ھەربىي يۈكلەرنى توشۇشقا ئىشلىتىلىدىغان تۆمۈريول ئۇل ئەسلىھەلىرىگە قارىتىلغان ھۇجۇملارنى داۋاملاشتۇرغانلىقىنى جاكارلىدى.
مىنىستىرلىقنىڭ باياناتىدا رۇسىيە قوراللىق قىسىملىرىنىڭ ئۇكرائىنادىكى ھەرىكەتلىرى ھەققىدە ئۇچۇر بېرىلدى.
باياناتتا، رۇسىيە ئارمىيەسىنىڭ شۇ كۈنى ئۇكرائىنادىكى نىشانلارغا ھۇجۇم قىلغانلىقى بىلدۈرۈلدى. ئودېسسا شەھىرى ۋە ئودېسسا رايونىدا ھەربىي يۈكلەرنى ساقلاش ۋە تارقىتىشقا ئىشلىتىلىدىغان ئەشيا ئوبوروت مەركەزلىرى بىلەن ئۇچقۇچىسىز ھاۋا ئاپپاراتى ئىشلەپچىقىرىش سېخىنىڭ زەربىگە ئۇچرىغانلىقى قەيت قىلىندى.
باياناتتا ئودېسسا پورتىدا ھەربىي يۈك توشۇۋاتقان بىر پاراخوت ۋە پورتلارنىڭ ئىشلىشىنى تەمىنلەيدىغان تىرانسفورموتور پونكىتلىرىنىڭ نىشان قىلىنغانلىقى ئىلگىرى سۈرۈلدى. باياناتتا: «ئۇكرائىنانىڭ غەربىي رايونلىرىدا، ياۋروپا دۆلەتلىرىدىن ھەربىي يۈكلەرنى توشۇشقا ئىشلىتىلىدىغان تۆمۈريول ئۇل ئەسلىھەلىرىگە قارىتىلغان ھۇجۇملار داۋاملاشتۇرۇلدى» دېيىلدى.
مىنىستىرلىقنىڭ بىلدۈرۈشىچە، ھۇجۇملار ھاۋادىن قويۇپ بېرىلىدىغان يۇقىرى ئېنىقلىقتىكى قوراللار ۋە ئۇچقۇچىسىز ھاۋا ئاپپاراتلىرى بىلەن ئېلىپ بېرىلغان.
