ئىسرائىلىيە مۇداپىئە مىنىستىرى يىسرائىل كاتز رايوندىكى جىددىيچىلىكنى پەسەيتىش (يۇمشىتىش) مەقسىتىدىكى رايون خاراكتېرلىك ۋە خەلقئارالىق تىرىشچانلىقلارغا قارىماي، ئىسرائىلىيەنىڭ لىۋان، سۈرىيە، غەززە ۋە يەمەندىكى ھۇجۇملىرىنى داۋاملاشتۇرىدىغانلىقىنى، بۇ مەيدانىدىن ھەرگىز چېكىنمەيدىغانلىقىنى بىلدۈردى.
ئىسرائىلىيەنىڭ «مائارىۋ» گېزىتىنىڭ خەۋەر قىلىشىچە، كاتز ئىسرائىلىيە ھاۋا ئارمىيەسى ئۇچقۇچىلىرىنى تەربىيەلەش كۇرسىدا سۆز قىلىپ: «ئىسرائىلىيە لىۋان، سۈرىيە، غەززە ۋە يەمەندىكى ھەربىي ھەرىكەتلىرىنى داۋاملاشتۇرىدۇ» دېگەن.
مەزكۇر پائالىيەتكە بېنيامىن نېتانياھۇ ۋە باش ئىشتاب باشلىقى ئېيال زامىرمۇ قاتناشقان.
كاتز سۆزىدە: «لىۋاندا ھىزبۇللاھقا قارشى ئەڭ زور كۈچ بىلەن زەربە بېرىشنى داۋاملاشتۇرىمىز؛ ئىسرائىلىيە سۈرىيەدىكى جەبەل شەيخ (ھەرمون تېغى) ۋە بىخەتەرلىك رايونىدىن چېكىنمەيدۇ؛ غەززەدە بولسا، ئىسرائىلىيە ھاماسنى يوقىتىش ۋە رايوننى قورالسىزلاندۇرۇشنى قەتئىي قارار قىلدى» دېگەنلەرنى تەكىتلىگەن. ئۇ يەمەن مەسىلىسى ھەققىدە توختالغاندا: «ھۇسىي كۈچلىرىنىڭ ھەربىي ئىقتىدارىنى تەرەققىي قىلدۇرۇشىنىڭ ئالدىنى ئېلىش ئۈچۈن، ھەربىي ھەرىكەتلىرىمىزنى داۋاملاشتۇرىمىز» دېگەنلەرنى سۆزلىرىگە ئىلاۋە قىلغان.
تېھران بىلەن بولغان سۈركىلىش ئۈستىدىمۇ توختالغان كاتز، ئىسرائىلىيەنىڭ ئىراننىڭ يادرو ۋە ئىستراتېگىيەلىك ئىقتىدارىغا «ئېغىر زىيان» سالغانلىقىنى ئىلگىرى سۈرگەن.
كاتز يەنە: «ئامېرىكالىق شېرىكلىرىمىز بىلەن ماسلاشقان ھالدا ئىرانغا كۈچلۈك زەربە بەرگەنلىكىمىزگە ئائىت دوكلاتلارنى كۆزىتىۋاتىمەن، بىخەتەرلىك ئورگانلىرىمىزمۇ ۋەزىيەتنى يېقىندىن كۆزىتىپ كەلمەكتە. تەبىئىيكى، بۇ ھەقتە تېخىمۇ كۆپ تەپسىلات بېرەلمەيمەن» دېگەن.
