چارشەنبە كۈنى بالىكئەسىردە چۈشۈپ كەتكەن ئۇرۇش ئايروپىلانىدا بىر ئۇچقۇچى شاھىت بولدى.
تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان، بالىكئەسىردە تۈركىيەنىڭ ھاۋا ئارمىيەسىگە تەۋە بىر F-16 ئۇرۇش ئايروپىلانىنىڭ چۈشۈپ كېتىشى نەتىجىسىدە ئۇچقۇچىنىڭ شاھىت بولغانلىقىنى ۋە ۋەقەنىڭ سەۋەبىنى ئېنىقلاش ئۈچۈن زۆرۈر بولغان تەكشۈرۈش ۋە تەتقىقات خىزمەتلىرىنىڭ باشلانغانلىقىنى بىلدۈردى.
چارشەنبە كۈنى ئەنقەرەدە بىر پائالىيەتتە سۆز قىلغان جۇمھۇر رەئىس ئەردوغان، بۇ يوقۇتۇشتىن تولىمۇ ئەپسۇسلانغانلىقىنى تىلغا ئېلىپ، ھاۋا ئارمىيەسى ئۇچقۇچىسى مىڭبېشى ئىبراھىم بولات ئۈچۈن دۇئا قىلدى. ئۇچقۇچىنىڭ ئائىلىسىگە، تۈركىيە ھاۋا ئارمىيەسىگە ۋە تۈركىيە خەلقىگە تەزىيە بىلدۈردى.
دۆلەت مەسئۇللىرىنىڭ ۋەقەنىڭ يۈز بېرىش شارائىتىنى ئېنىقلاش ئۈچۈن ئەتراپلىق تەكشۈرۈش باشلىغانلىقىنى ئېيتقان جۇمھۇر رەئىس ئەردوغان، مۇناسىۋەتلىك ئورۇنلار تەرىپىدىن بارلىق زۆرۈر بولغان تەرتىپلەرنىڭ بېجىرىلىۋاتقانلىقىنى سۆزىگە ئىلاۋە قىلدى.
دۆلەت مۇداپىئە مىنىستىرلىقى بۇنىڭدىن ئىلگىرى ئايروپىلان بىلەن بولغان سىمسىز ئالاقە ۋە ئىز قوغلاش ئۇچۇرلىرى ئۈزۈلۈپ قالغاندىن كېيىن، ئۇرۇش ئايروپىلانىنىڭ چۈشۈپ كەتكەنلىكىنى ئېلان قىلغان ئىدى.
مىنىستىرلىقنىڭ باياناتىغا ئاساسلانغاندا، ئايروپىلان سەيشەنبە كۈنى يەرلىك ۋاقىت سائەت 00:56 تە بالىكئەسىردىكى 9-ئاساسىي رېئاكتىپ ئايروپىلان بازىسى قوماندانلىق ئىشتىبىدىن قوزغالغان ئىدى.
