تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان ئانتاليەدە ئۆتكۈزۈلگەن بەشىنچى نۆۋەتلىك ئانتاليە دىپلوماتىيە مۇنبىرى دائىرىسىدە سلوۋېنىيە پىرېزىدېنتى ناتاشا پىرك مۇسار، كومور ئاراللىرى پىرېزىدېنتى ئازالى ئاسوماني ۋە كونگو دېموكراتىك جۇمھۇرىيىتى پىرېزىدېنتى فېلىكىس تىشىسېكېدى بىلەن كۆرۈشتى.
بۇنىڭدىن ئىلگىرى ئەردوغان خىزمەت ناشتىسىدا بوسنىيە-گېرتسېگوۋىنا دۆلەت رەئىسلىك كېڭىشىنىڭ ئەزالىرى جېلكا سىۋىجانوۋىچ، دېنىس بېكىروۋىچ ۋە جېلكو كومسىچ بىلەن كۆرۈشۈپ، ئۆزئارا مۇناسىۋەتلەر بىلەن بىرگە رايونلۇق ۋە يەر شارى خاراكتېرلىك ئۆزگىرىشلەرنى مۇزاكىرە قىلغان ئىدى.
تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر-ئالاقە ئىدارىسىنىڭ بىلدۈرۈشىچە، جۇمھۇر رەئىس ئەردوغان تۈركىيەنىڭ بوسنىيە-گېرتسېگوۋىنانىڭ كەلگۈسى ئۈچۈن تاشلىنىدىغان بارلىق ئىجادىي قەدەملەرنى قوللايدىغانلىقىنى ۋە بۇ دۆلەتنىڭ بالقان رايونىنىڭ مۇقىملىقىدا ئاچقۇچلۇق ئورۇنغا ئىگە ئىكەنلىكىنى تەكىتلىگەن.
ئەردوغان تۈركىيەنىڭ بوسنىيە-گېرتسېگوۋىنانىڭ زېمىن پۈتۈنلۈكى ۋە ئاساسىي قانۇن تەرتىپىنى شەرتسىز قوللايدىغانلىقىنى يەنە بىر قېتىم مۇقىملاشتۇرغان.
يېقىنقى مەزگىللەردە بوشناق خەلقىنى نىشان قىلغان بۆلگۈنچى ۋە قۇتراتقۇلۇق خاراكتېرلىك سۆز-چۆچەكلەرنىڭ كۆپىيىپ قالغانلىقى ھەققىدىمۇ توختىلىپ، بالقان رايونىدا مۇقىملىقنى خەۋپكە ئىتتىرىدىغان مەسئۇلىيەتسىز قەدەملەرنىڭ ھېچكىمگە پايدىسى بولمايدىغانلىقىنى بىلدۈرگەن.
ئۇ يەنە ئۈچ ئاساسلىق خەلق (بوشناق، سېرب ۋە كىرودىيەلىكلەر) ئىناق ياشىيالايدىغان بىر بوسنىيە-گېرتسېگوۋىنانى بەرپا قىلىشنىڭ مۇھىملىقىنى ئەسكەرتكەن.
تۈركىيە بىلەن بوسنىيە-گېرتسېگوۋىنا ئوتتۇرىسىدىكى ئۆزئارا سودىنى ئاشۇرۇش ۋە قاتناش بىلەن ئېنېرگىيە قاتارلىق ساھەلەردىكى ھەمكارلىقنى تېزلىتىشنىڭ زۆرۈرلۈكى تەرەپكە دىققەتلەرنى دىققەت تارتقان.
بۇ سۆھبەتلەر جۇمھۇر رەئىس ئەردوغاننىڭ جەنۇبتىكى ئانتاليە شەھىرىدە ئۆتكۈزۈلگەن بەشىنچى نۆۋەتلىك ئانتاليە دىپلوماتىيە مۇنبىرىنىڭ ئىككىنچى كۈنىدىكى پىلانى دائىرىسىدە ئېلىپ بېرىلدى.
بوسنىيە-گېرتسېگوۋىنا ئاساسىي قانۇنىغا ئاساسەن، دۆلەتتىكى ئۈچ خەلققە ۋەكىللىك قىلىدىغان ئۈچ ئەزالىق ئورگان نۆۋەت بىلەن پىرېزىدېنتلىق ۋەزىپىسىنى ئۆتەيدۇ. مارت ئېيىدىن باشلاپ بوشناق ئەزا بېكىروۋىچ نۆۋەتتىكى رەئىسلىك ۋەزىپىسىنى يۈرگۈزمەكتە.
بۇ يىللىق يەر شارى خاراكتېرلىك ئېنىقسىزلىقلارنى باشقۇرۇشقا ئەھمىيەت بېرىلگەن مۇنبەر يىغىنى مۇناسىۋىتى بىلەن دۇنيا رەھبەرلىرى ۋە يۇقىرى دەرىجىلىك ھۆكۈمەت ئەمەلدارلىرى يەكشەنبە كۈنىگىچە تۈركىيەدە بولىدۇ.
مۇنبەر جۇمھۇر رەئىس ئەردوغاننىڭ رىياسەتچىلىكىدە تاشقى ئىشلار مىنىستىرلىقى تەرىپىدىن تەشكىللەنگەن بولۇپ، بۇ يىل «ئەتە ئۈچۈن خەرىتە سىزىش، ئېنىقسىزلىقلارنى باشقۇرۇش» تېمىسىدا ئۆتكۈزۈلمەكتە.
