ياۋروپا ئىتتىپاقى قاماققا ھۆكۈم قىلىنغان ۋە تۈرمىدە ئۆلگەن ئۇرۇش جىنايەتچىسى راتكو ملادىچنىڭ «ئۇلۇغلىنىشى» نى ئەيىبلەپ، ئۇرۇش جىنايەتچىلىرىنىڭ ھەرقانداق شەكىلدە ئۇلۇغلىنىشىنىڭ «ياۋروپا ئىتتىپاقىدا ئورنى يوقلۇقى» نى بىلدۈردى.
«بوسنىيە قاسساپى» دەپ بىلىنىدىغان ملادىچ، ب د ت مەھكىمىسى تەرىپىدىن 1995-يىلىدىكى سىرېبرېنىتسا قىرغىنچىلىقىدا ئوينىغان رولىنىمۇ ئۆز ئىچىگە ئالغان ئىرقىي قىرغىنچىلىق، ئۇرۇش جىنايەتلىرى ۋە ئىنسانىيەتكە قارشى جىنايەتلەر بىلەن ئەيىبلەنگەن ئىدى.
ملادىچ گاگادىكى تۈرمىدە جازا مۇددىتىنى ئۆتەۋاتقاندا 27-ئاۋغۇست كۈنى سالامەتلىك سەۋەبىدىن ئۆلگەن ئىدى.
ياۋروپا ئىتتىپاقى باياناتچىسى دۈشەنبە كۈنى ئېلان قىلغان باياناتىدا: «ئۇرۇش جىنايەتچىلىرىنىڭ ھەرقانداق شەكىلدە ئۇلۇغلىنىشى، ئىرقىي قىرغىنچىلىقنىڭ ئىنكار قىلىنىشى ۋە رېۋىزىيونىزم (تارىخنى بۇرمىلاش قىلمىشلىرى) ياۋروپانىڭ ئەڭ تۈپكى قىممەت قاراشلىرىغا خىلاپتۇر ھەمدە ياۋروپا ئىتتىپاقىدا ياكى ياۋروپا ئىتتىپاقىغا ئەزا بولۇشقا نامزات دۆلەتلەردە بۇنىڭغا ئورۇن يوقتۇر» دېدى.
ياۋروپا ئىتتىپاقى باياناتچىسى ملادىچنىڭ ئۇرۇش جىنايەتلىرى، ئىرقىي قىرغىنچىلىق ۋە ئىنسانىيەتكە قارشى جىنايەتلەرنى ئۆتكۈزگەنلىكى سەۋەبىدىن قاماققا ھۆكۈم قىلىنغان بىر ئۇرۇش جىنايەتچىسى ئىكەنلىكىنى ئەسكەرتىپ، ياۋروپا ئىتتىپاقىنىڭ سابىق يۇگوسلاۋىيە دۆلەتلىرىدىكى ئۇرۇش جىنايەتلىرىدىن زىيان تارتقان بارلىق قۇربانلار، ئامان قالغانلار ۋە ئۇلارنىڭ ئائىلە-تاۋابىئاتلىرى بىلەن ھەمدەمدە بولىدىغانلىقىنى ئىپادىلىدى.
بۇ بايانات ملادىچنىڭ جەسىتىنىڭ گاگادىن بېلگرادقا ئېلىپ كېلىنىشى ۋە دۈشەنبە كۈنى پىلانلانغان دەپنە مۇراسىمىدىن بىرنەچچە كۈن بۇرۇن بېلگرادتا بىر پەخرىي قاراۋۇللار ئەترىتى تەرىپىدىن كۈتۈۋېلىنىشىنىڭ ئارقىسىدىنلا ئېلان قىلىندى.
بۇنىڭدىن ئىلگىرى ياۋروپا ئىتتىپاقىنىڭ كېڭىيىش ئىشلىرىغا مەسئۇل كومىسسارى مارتا كوس، قاماققا ھۆكۈم قىلىنغان ئۇرۇش جىنايەتچىسىنىڭ ئۆلۈمىنىڭ ئارقىسىدىن ئېلىپ بېرىلغان بۇ خىل «ئۇلۇغلاش» قىلمىشى سەۋەبىدىن سېربىيە زىيارىتىنى بىكار قىلغان ئىدى.
سېربىيە 2012-يىلىدىن بۇيان ياۋروپا ئىتتىپاقىغا ئەزا بولۇشقا نامزات دۆلەت بولۇپ، 2014-يىلىدىن بېرى ئىتتىپاق بىلەن ئەزا بولۇش سۆھبەتلىرىنى داۋاملاشتۇرماقتا.
سېربىيە پرېزىدېنتى ئالېكساندېر ۋۇچىچ، ملادىچ ئۈچۈن سېربىيەدە دەپنە مۇراسىمى ئۇيۇشتۇرۇش تەكلىپىنى ئوتتۇرىغا قويغان ئىدى.
