كۆرۈشۈشلەردە تېررورلۇققا قارشى تۇرۇشتىن غەززەدىكى ئەڭ يېڭى ۋەزىيەتكىچە، ئىككى تەرەپلىك مۇناسىۋەتلەرنىڭ قۇرۇلمىلىشىشىدىن رايون بىخەتەرلىكىگىچە بولغان ھالقىلىق تېمىلار مۇزاكىرە قىلىنىدۇ.
تۈركىيە تاشقى ئىشلار مىنىستىرلىقى مەنبەلىرىدىن ئېلىنغان ئۇچۇرلارغا ئاساسلانغاندا، تاشقى ئىشلار مىنىستىرى خاقان فىدان بىلەن سۈرىيەلىك مەنسەپدىشى ئەسئەد ھەسەن شەيبانى ئوتتۇرىسىدا ئۆتكۈزۈلىدىغان كۆرۈشۈشتە، سۈرىيەدە مەڭگۈلۈك مۇقىملىق ۋە بىخەتەرلىك ئورنىتىش ئۈچۈن تۈركىيەنىڭ قوللىشى بىلەن يولغا قويۇلغان كۆپ تەرەپلىك تىرىشچانلىقلار ئەتراپلىق باھالىنىدۇ.
دىپلوماتىك مەنبەلەرگە قارىغاندا، مۇزاكىرىدە سۈرىيەنىڭ تېررورلۇققا قارشى تۇرۇش ئىقتىدارىنىڭ يۈكسىلىشى ئالاھىدە تەكىتلىنىپ، تۈركىيەنىڭ بۇ ساھەدە سۈرىيە بىلەن بولغان ھەمكارلىقنى تېخىمۇ يۇقىرى پەللىگە كۆتۈرۈش ئىرادىسى ئوتتۇرىغا قويۇلىدۇ. بۇنىڭدىن باشقا، سۈرىيەنىڭ شەرقىي شىمالىنىڭ مەركىزىي ھۆكۈمەتكە قوشۇلۇش مۇساپىسىدە يەتكەن ئەڭ يېڭى باسقۇچىمۇ كۈنتەرتىپتىكى مۇھىم تېمىلار قاتارىدىن ئورۇن ئالىدۇ.
رايون ۋەزىيىتى
كۆرۈشۈش كۈنتەرتىپىنىڭ رايون ۋەزىيىتىگە ئائىت قىسمىدا، ئىسرائىلىيەنىڭ سىياسەتلىرى مۇھىم ئورۇندا تۇرىدۇ. ئىسرائىلىيەنىڭ سۈرىيەنىڭ مۇقىملىقىغا بۇزغۇنچىلىق قىلىشقا قارىتىلغان ھەرىكەتلىرىنىڭ قوبۇل قىلىنمايدىغانلىقى تەكىتلىنىش بىلەن بىرگە، غەززەدىكى ھۇجۇملارنىڭ تېزدىن توختىتىلىشى ۋە لىۋاندىكى ئىسرائىلىيە ئىشغالىيىتىگە خاتىمە بېرىلىشىنىڭ رايون بىخەتەرلىكى ئۈچۈن قانچىلىك مۇھىملىقى ئوتتۇرىغا قويۇلىدۇ.
مىنىستىر فىداننىڭ، تۈركىيەنىڭ ئامېرىكا بىلەن ئىران ئوتتۇرىسىدا ئۇرۇش توختىتىشنى ئىشقا ئاشۇرۇش، ھورمۇز بوغۇزىنىڭ قاتنىشىنى ئېچىۋېتىش ۋە رايوندا مەڭگۈلۈك تىنچلىق ئورنىتىش ئۈچۈن ئېلىپ بېرىۋاتقان دىپلوماتىك تىرىشچانلىقلىرىنى ئىزچىل قوللايدىغانلىقىنى مەنسەپدىشىگە يەتكۈزۈشى مۆلچەرلەنمەكتە.
