يەرلىك تاراتقۇلارنىڭ خەۋىرىگە قارىغاندا، مىسىر ئاۋام پالاتاسى ئەزالىرىنى سايلاش ئۈچۈن پارلامېنت سايلىمىنىڭ تۇنجى باسقۇچىنى باشلىدى.
دۆلەت كونتروللۇقىدىكى ئەل-قاھىرە خەۋەر قانىلى دۈشەنبە كۈنى، تەخمىنەن 63 مىليون سايلىغۇچىنىڭ، ئىككى باسقۇچلۇق سايلامدا ئاۋام پالاتاسىنىڭ 568 ئەزاسىنى سايلاش ئۈچۈن ئاۋاز بېرىدىغانلىقىنى بىلدۈردى.
سايلامنىڭ بىرىنچى باسقۇچى ئىككى كۈن داۋامىدا ئىسكەندەرىيە، ئەسيۇت، ئەسۋان، بۇھەيرە، بېنى سۇۋەيف، فەييۇم، گىزە، لۇكسور، ماتروھ، مىنيا، يېڭى ۋادى، قېنا، قىزىل دېڭىز ۋە سۇھاژ ئۆلكىلىرىنىڭ 70 سايلام رايونىدىكى 5606 كىچىك كومىتېتتا ئېلىپ بېرىلىدۇ.
جەمئىي 1287 نامزات رىقەبەتلەشمەكتە؛ بۇلارنىڭ 1143 ى يەككە سىستېما ئاستىدا مۇستەقىل، 142 ى بولسا پارتىيە تىزىملىك سىستېمىسى بىلەن رىقابەتكە چۈشمەكتە.
مىسىرنىڭ 596 ئورۇندۇقلۇق ئاۋام پالاتاسى، 284 ى يېپىق تىزىملىك سىستېمىسى بىلەن ۋە 284 ى يەككە سىستېما بىلەن سايلانغان جەمئىي 568 سايلانغان ئەزادىن باشقا، پىرېزىدېنت پەرمانى بىلەن بىۋاسىتە تەيىنلەنگەن 28 ئەزانى ئۆز ئىچىگە ئالىدۇ.
بىرىنچى باسقۇچنىڭ نەتىجىسى 18-نويابىر ئېلان قىلىنىدۇ.
كەڭ كۆلەملىك بىخەتەرلىك پىلانى
ئىچكى ئىشلار مىنىستىرلىقى، سايلام ساندۇقلىرىنى قوغداش ئۈچۈن كەڭ كۆلەملىك بىخەتەرلىك پىلانىنىڭ يولغا قويۇلغانلىقىنى دەلىللىدى.
ھۆكۈمەتنىڭ تاراتقۇ مەركىزىگە ئاساسلانغاندا، چەت ئەلدىكى سايلىغۇچىلارنىڭ ئاۋاز بېرىشى 7-8-نويابىر كۈنلىرى 117 دۆلەتتىكى مىسىر ئەلچىخانىلىرى ۋە كونسۇلخانىلىرىدا ئېلىپ بېرىلغان.
ئىككىنچى باسقۇچ چەت ئەلدىكى سايلىغۇچىلار ئۈچۈن 21-22-نويابىر، دۆلەت ئىچىدىكى پۇقرالار ئۈچۈن بولسا، قالغان 13 ئۆلكىدە 24 – ۋە 25-نويابىر كۈنلىرى ئۆتكۈزۈلىدۇ. ئىككىنچى باسقۇچنىڭ نەتىجىسى 2-دېكابىر ئېلان قىلىنىدۇ.
بۇ سايلاملار، پارلامېنت ئۈستۈنكى پالاتاسى بولغان كېڭەش پالاتاسى ئۈچۈن ئۆتكۈزۈلگەن سايلاملاردىن بىر نەچچە ئاي كېيىن ئېلىپ بېرىلدى.
ئاۋام پالاتاسى، ئاساسىي قانۇن رامكىسى ئىچىدە قانۇن چىقىرىش ۋە نازارەت قىلىش ھوقۇقىنى ئىشلىتىدىغان مىسىر سىياسىي سىستېمىسىنىڭ ئاچقۇچلۇق ئۇل تاشلىرىدىن بىرى ھېسابلىنىدۇ.
2020-يىلى ئاخىرىدا سايلانغان ھازىرقى پارلامېنت، بەش يىللىق ۋەزىپە ئۆتەش مۇددىتىنى 2026-يىلى 1-ئايدا تاماملايدۇ.
