رۇسىيە تەرەپ پەيشەنبە كۈنى بايانات ئېلان قىلىپ ئۇكرائىنا بىلەن تىنچلىق سۆھبىتى ئۆتكۈزۈشكە سورۇن ھازىرلاپ بەرگەنلىكى ئۈچۈن تۈركىيەگە تەشەككۈر ئېيتتى. شۇنىڭ بىلەن بىرگە، تاشقى ئىشلار مىنىستىرلىقى باياناتچىسى مارىيا زاخاروۋا ھەرقانداق بىر مۇزاكىرە شەكلىنىڭ ئەمەلىي نەتىجە بېرەلەيدىغان سىياسىي، دىپلوماتىك ياكى ئىنسانپەرۋەرلىك لايىھەلىرىنى سۇنغان ئەھۋالدىلا ئەھمىيەتكە ئىگە بولىدىغانلىقىنى تەكىتلەپ: «بىز مۇزاكىرە جەريانىغا ساھىبخانلىق قىلىدىغان دۆلەتلەرنىڭ تەشەببۇسلىرىنى ياكى بۇنىڭ قانداق ئېلىپ بېرىلىدىغانلىقى ھەققىدىكى مېخانىزم، ئەندىزە ۋە قاراشلىرىنى ھەرۋاقىت قەدىرلەيمىز» دېدى.
تۈركىيە مۇزاكىرىلەرگە ساھىبخانلىق قىلىش تەكلىپىنى كۆپ قېتىم ئوتتۇرىغا قويغان بولۇپ، ھازىر تۆتىنچى يىلىغا قەدەم قويغان ئۇرۇش جەريانىدا بۇنى ئەمەلىيەتتە كۆرسەتكەن ساناقلىقلا دۆلەتلەرنىڭ بىرى ھېسابلىنىدۇ.
زاخاروۋا ئۇكرائىنانىڭ سەلبىي پوزىتسىيەسىگە قارىماي، موسكۋانىڭ ھەرۋاقىت ئىنسانلارنىڭ مەنپەئەتى، ئىنسانپەرۋەرلىك مەسىلىلىرىنى ھەل قىلىش ۋە تىنچلىقنى ئىلگىرى سۈرۈش مەقسىتىدە ئالاقىنى ساقلاپ كەلگەنلىكىنى بىلدۈرۈپ: «بىراق، ئىستانبۇل سۆھبەتلىرىنىڭ كىيېۋ رېجىمى تەرىپىدىن بۇزغۇنچىلىققا ئۇچرىغانلىقىنى كۆرۈۋاتىمىز. يېقىنقى بارلىق تەكلىپلىرىمىزنىڭ ئۇلار تەرىپىدىن توسۇپ قېلىنغانلىقى سىلەرگىمۇ ئايان. ئۇلار ئۆز نىيىتىنى قايتا جاكارلىغاندىن كېيىن، پۈتۈنلەي ئەكسىچە ئىش تۇتتى. تېخىمۇ توغرىسىنى ئېيتقاندا، ھېچ ئىش قىلمىدى.» دېگەنلەرنى قەيت قىلدى.
ئۇ يەنە: «بىز ھەرۋاقىت مىننەتدارلىقىمىزنى بىلدۈرىمىز. بولۇپمۇ بۇ قېتىمقىدەك ئالاھىدە ئەھۋالدا، رۇسىيە-ئۇكرائىنا مۇزاكىرىلىرى ئۈچۈن سورۇن ھازىرلاپ بېرىشتىكى مېھماندوستلۇقى ۋە سەمىمىيىتى ئۈچۈن تۈركىيە تەرەپكە رەھمەت ئېيتىمىز. بىز بۇ شەكىلنى رەت قىلمىدۇق، رەت قىلغىنى كىيېۋ رېجىمى بولدى» دېگەنلەرنى سۆزلىرىگە ئىلاۋە قىلدى.
زاخاروۋا ئىيۇل ئېيىدىن بۇيان ئۇكرائىنانىڭ رۇسىيەنىڭ تەكلىپلىرىگە جاۋاب بەرمەي مۇزاكىرىلەرنى توختىتىپ قويغانلىقىنى، بۇ تەكلىپلەر ئارىسىدا سىياسىي، ھەربىي ۋە ئىنسانپەرۋەرلىك مەسىلىلىرىگە ئائىت ئۈچ خىزمەت گۇرۇپپىسى قۇرۇشنىڭمۇ بارلىقىنى تىلغا ئېلىپ: «ئۇلار ھەيئەت دەرىجىسىنى ئۆستۈرۈش تەكلىپىگىمۇ جاۋاب بەرمىدى» دېدى.
