كرېمىل سارىيى باياناتىدا، رۇسىيەنىڭ ئوتتۇرا شەرقتە داۋاملىشىۋاتقان جىددىيچىلىك جەريانىدا ئىرانغا ھەر خىل شەكىللەردە ياردەم قىلىشقا تەييار ئىكەنلىكى، ئەمما بۇنىڭ تېھراننىڭ ئېھتىياجىغا باغلىق ئىكەنلىكىنى بىلدۈردى.
دۈشەنبە كۈنى ئۆتكۈزۈلگەن بىر مۇخبىرلارنى كۈتۈۋېلىش يىغىنىدا مۇخبىرلارغا سۆز قىلغان كرېمىل سارىيىنىڭ باياناتچىسى دىمىترى پېسكوۋ: «بىز مۇرەسسەچىلىك تىرىشچانلىقىمىزنى ئوتتۇرىغا قويدۇق. بۇ كونكرېت بىر قەدەم. بىز مەيدانىمىزنى ئىپادىلىدۇق، بۇمۇ ئىران تەرەپكە بېرىلگەن قوللاشنىڭ مۇھىم بىر ئىپادىسىدۇر» دېدى.
تەل-ئاۋىۋنىڭ ئىراننىڭ ھەربىي ۋە يادرو ئوبيېكتلىرىنى ئۆز ئىچىگە ئالغان ھەر خىل نىشانلىرىغا تۇيۇقسىز ھۇجۇم قىلىشىدىن كېيىن، تېھراننىڭ ئۆچ ئېلىش ھۇجۇملىرىنى باشلىشى بىلەن ئىسرائىلىيە ۋە ئىران 13-ئىيۇندىن بۇيان ھاۋا ئۇرۇشى قىلماقتا.
شۇنىڭ بىلەن بىر ۋاقىتتا ئامېرىكا يەكشەنبە كۈنى ئەتىگەندە ئىراننىڭ ئۈچ چوڭ يادرو ئوبيېكتىغا ھۇجۇم قىلغان بولۇپ، ئامېرىكا پىرېزىدېنتى دونالد ترامپ بۇ ئوبيېكتلاردا ئېغىر زىيان پەيدا بولغانلىقىنى ۋە «ۋەيران قىلىنغانلىقىنى» ئىلگىرى سۈرگەن ئىدى.
رۇسىيە پىرېزىدېنتى ۋلادىمىر پۇتىن بىلەن ئىران تاشقى ئىشلار مىنىستىرى ئابباس ئەراقچىنىڭ موسكۋادىكى ئۇچرىشىشلىرى ھەققىدە سۆز قىلغان پېسكوۋ، بۇ سۆھبەتلەرنىڭ پىكىر ئالماشتۇرۇش پۇرسىتى يارىتىدىغانلىقىنى ۋە تېھراننىڭ نۆۋەتتىكى ۋەزىيەتكە مۇناسىۋەتلىك تەكلىپ-پىكىرلىرىنى ۋە كۆز قاراشلىرىنى موسكۋاغا يەتكۈزۈش پۇرسىتىگە ئېرىشىدىغانلىقىنى ئېيتتى.
مۇستەقىل جەريانلار
پېسكوۋ نۆۋەتتىكى جىددىي ۋەزىيەتتە ئاكتىيورلار سانىنىڭ كۆپىيىۋاتقانلىقىنى بىلدۈرۈپ: «ئەلۋەتتە بىز بۇنى ئەيىبلەيمىز ۋە بۇ ھەقتە چوڭقۇر ئەپسۇسلىنىدىغانلىقىمىزنى بىلدۈرىمىز» دېدى.
پېسكوۋ ئىران مەسىلىسىنىڭ پۇتىن بىلەن ترامپ ئوتتۇرىسىدىكى يېقىنقى سۆھبەتلەردە كۆپ قېتىم كۈنتەرتىپكە كەلگەنلىكىنى، ئەمما رۇسىيە رەھبىرىگە يەكشەنبە كۈنىدىكى ھۇجۇملار ھەققىدە مەلۇمات بېرىلمىگەنلىكىنى ئېيتتى.
پېسكوۋ ترامپنىڭ ئىراندا ھاكىمىيەت ئۆزگەرتىش توغرىسىدىكى سۆزلىرىگە ئائىت سورالغان سوئالغا: «بىر دۆلەتنىڭ ھاكىمىيىتىنىڭ تەقدىرىنى ئۈچىنچى دۆلەتلەر ياكى ئۈچىنچى دۆلەتلەرنىڭ ھۆكۈمەتلىرى ئەمەس، شۇ دۆلەتنىڭ خەلقى بەلگىلىشى كېرەك» دەپ جاۋاب بەردى.
پېسكوۋ ئامېرىكانىڭ ئىرانغا قاراتقان ھۇجۇملىرىنىڭ موسكۋا بىلەن ۋاشىنگتون ئوتتۇرىسىدىكى دىئالوگقا تەسىر كۆرسەتمەيدىغانلىقىنى، چۈنكى بۇلارنىڭ «مۇستەقىل جەريانلار» ئىكەنلىكىنى بىلدۈردى.
پېسكوۋ: «بۇ يادرو ئوبيېكتلىرىدا نېمە ئىش بولغانلىقىنى، رادىئاتسىيە خەۋپى بار-يوقلۇقىنى كۆرۈش كېرەك. خەلقئارا ئاتوم ئېنېرگىيەسى ئورگىنىدىن (UAEA) ھازىرچە رادىئاتسىيەلىك بۇلغىنىش ئالامەتلىرى يوقلۇقىغا دائىر بىر بايانات ئاڭلىدۇق. ئەمما بۇلار، ئەلۋەتتە، ئورۇنلۇق ئەندىشىلەرنى پەيدا قىلىدىغان سوئاللار» دېگەنلەرنى قەيت قىلدى.
