رۇسىيەنىڭ كېچە بويىچە داۋاملاشتۇرۇغان كەڭ كۆلەملىك ئۇچقۇچىسىز ھاۋا ئاپپاراتى ۋە باشقۇرۇلىدىغان بومبا ھۇجۇملىرىدا ئۇكرائىنا مىقياسىدا تۆت كىشى ھاياتىدىن ئايرىلدى، ئونلارچە كىشى يارىلاندى. بۇ قېتىمقى زەربىدە دنىپرو شەھىرى ئەڭ ئېغىر تالاپەتكە ئۇچرىغان رايونلارنىڭ بىرى بولۇپ قالدى.
رۇسىيەنىڭ تۈن بويى ئۇكرائىناغا قاراتقان چوڭ تىپتىكى ھۇجۇمىدا جەمئىي تۆت كىشى قازا قىلىپ، 30 دىن ئارتۇق كىشى يارىلاندى. موسكۋا ئۇكرائىنانىڭ غەربىي شىمالىدىكى دنىپرو شەھىرى ۋە باشقا رايونلارنى نىشانلىغان بۇ ھۇجۇمدا 660 تىن ئارتۇق ئۇچقۇچىسىز ھاۋا ئاپپاراتى ۋە باشقۇرۇلىدىغان بومبا ئىشلەتتى.
ئۇكرائىنا پىرېزىدېنتى ۋولۇدىمىر زېلىنىسكىي ئىجتىمائىي تاراتقۇدا بايانات ئېلان قىلىپ: «رۇسلار پۈتۈن كېچە دېگۈدەك دنىپرو ۋە باشقا شەھەرلىرىمىز بىلەن ئاھالىلەر رايونلىرىمىزنى بومباردىمان قىلدى» دېدى ھەمدە ھۇجۇمغا ئۇچرىغان ئورۇنلارنىڭ كۆپىنچىسىنىڭ شەھەر ئۇل ئەسلىھەلىرى ئىكەنلىكىنى بىلدۈردى.
رايون ۋالىيسى ئولېكساندىر خانژانىڭ مەلۇماتىغا قارىغاندا، دنىپرودا رۇسىيە ھۇجۇمىغا ئۇچرىغان بىر بىنانىڭ خارابىلىكىدىن ئىككى كىشىنىڭ جەسىتى چىقىرىلغان، يەنە بەش كىشىنىڭ خارابىلىك ئاستىدا قالغان بولۇشى مۇمكىنلىكى تەخمىن قىلىنماقتا. خانژا شەھەردە يەنە 21 كىشىنىڭ يارىلانغانلىقىنى بىلدۈردى. شىمالدىكى چېرنىخىۋ رايونىنىڭ ۋالىيسىمۇ باشقۇرۇلىدىغان بومبا ۋە ئۇچقۇچىسىز ھاۋا ئاپپاراتى ھۇجۇملىرىدا ئىككى كىشىنىڭ ھاياتىدىن ئايرىلغانلىقىنى، يەتتە كىشىنىڭ يارىلانغانلىقىنى ئۇقتۇردى.
زېلىنىسكىي سۆزىدە: «بۇ خىلدىكى ھەر بىر ھۇجۇم شېرىكلىرىمىزگە ۋەزىيەتنىڭ جىددىي ئىكەنلىكىنى، كەسكىن قەدەملەرنى بېسىش ۋە ھاۋا مۇداپىئە ئىقتىدارىمىزنى تېزدىن كۈچەيتىش زۆرۈرلۈكىنى ئەسكەرتىشى كېرەك» دېدى.
ئۇكرائىنا ھاۋا ئارمىيەسى تېلېگرامدا ئېلان قىلغان باياناتىدا، رۇسىيەنىڭ ئۇكرائىناغا جەمئىي 619 ئۇچقۇچىسىز ھاۋا ئاپپاراتى ۋە 47 باشقۇرۇلىدىغان بومبا بىلەن ھۇجۇم قىلغانلىقىنى، بۇلاردىن 580 ئۇچقۇچىسىز ھاۋا ئاپپاراتى ۋە 30 باشقۇرۇلىدىغان بومبىنىڭ ئېتىپ چۈشۈرۈلگەنلىكىنى جاكارلىدى. رۇسىيە ئۇكرائىناغا ھەر كېچىسى ئونلارچە ئۇچقۇچىسىز ھاۋا ئاپپاراتى بىلەن كىچىك كۆلەملىك ھۇجۇملارنى قىلىپ تۇرسىمۇ، پات-پات يۈزلىگەن ئۇچقۇچىسىز ھاۋا ئاپپاراتى ۋە ئونلارچە باشقۇرۇلىدىغان بومبا ئىشلىتىلىدىغان كەڭ كۆلەملىك ھۇجۇملارنىمۇ ئېلىپ بارماقتا.
