رۇسىيەنىڭ كراسنودار رايونىدىكى بىر نېفىت پىششىقلاپ ئىشلەش زاۋۇتىدا، ئۇچقۇچىسىز ھاۋا ئاپپاراتى ھۇجۇمىدىن كېيىن ئوت ئاپىتى يۈز بەردى. مەزكۇر ھۇجۇمدا ئىككى كىشى ھاياتىدىن ئايرىلدى.
كراسنودار ۋالىيسى ۋېنىيامىن كوندىراتيېۋ ئېلان قىلغان يازما باياناتىدا، كېچە سائەتلىرىدە رايوندىكى پۇقراۋى ئەسلىھەلەرنىڭ ئۇچقۇچىسىز ھاۋا ئاپپاراتلىرىنىڭ ھۇجۇمىغا ئۇچرىغانلىقىنى بىلدۈردى. ئۇچقۇچىسىز ھاۋا ئاپپاراتىنىڭ پارچىلىرى ئافىپسكىي ئولتۇراق رايونىدىكى بىر پويىز ئىستانسىسىغا چۈشكەنلىكىنى ئەسكەرتكەن كوندىراتيېۋ، ھۇجۇم نەتىجىسىدە ئىككى كىشىنىڭ ھاياتىدىن ئايرىلغانلىقىنى، ئىككى كىشىنىڭ يارىلغانلىقىنى يەتكۈزدى.
ۋالىي كوندىراتيېۋ يەنە ئافىپسكىي ئولتۇراق رايونىدا كەم دېگەندە 10 شەخسىي قورۇنىڭ زىيانغا ئۇچرىغانلىقىنى، ئۆيلەرنىڭ بىرىگە ئوت كەتكەنلىكىنى قەيت قىلدى. رايوندىكى نېفىت پىششىقلاپ ئىشلەش زاۋۇتىدىمۇ ئوت ئاپىتى يۈز بەرگەنلىكىنى ئەسكەرتكەن كوندىراتيېۋ، ئوت ئۆچۈرۈش ئەترەتلىرى بىلەن جىددىي ئەھۋاللارغا تاقابىل تۇرۇش خادىملىرىنىڭ خىزمەتلىرىنى داۋاملاشتۇرۇۋاتقانلىقىنى ئىپادىلىدى.
