ئەنقەرە رايوندىكى جىددىيچىلىكنى ئەۋج ئالدۇرماسلىق ھەققىدە ئاگاھلاندۇرۇش بېرىپ، ھاۋا تەۋەلىكىنى قوغداش سىستېمىلىرىنىڭ تولۇق ئىشقا كىرىشتۈرۈلگەنلىكىنى ئېلان قىلدى؛ ئىتتىپاقداشلارنىڭ ھاۋا مۇداپىئە سىستېمىلىرى غازىئانتەپكە قاراپ كېلىۋاتقان بىر دانە باللىستىك باشقۇرۇلىدىغان بومبىنى ئېتىپ چۈشۈردى.
تۈركىيە دائىرىلىرى ناتو ھاۋا مۇداپىئە سىستېمىلىرىنىڭ ئىران تەرەپتىن تۈركىيەگە تۈركىيەگە قاراپ كېلىۋاتقان بىر دانە باللىستىك باشقۇرۇلىدىغان بومبىنى توسۇپ قالغانلىقىنى ئۇقتۇردى. بۇ يېقىنقى بىر ھەپتە ئىچىدە ئىران باشقۇرۇلىدىغان بومبىلىرىنىڭ تۈركىيە ھاۋا تەۋەلىكىگە ئىككىنچى قېتىم كىرىشى بولۇپ ھېسابلىنىدۇ.
تۈركىيە جۇمھۇرىيىتى دۆلەت مۇداپىئە مىنىستىرلىقى دۈشەنبە كۈنى بايانات ئېلان قىلىپ، مەزكۇر باشقۇرۇلىدىغان بومبىنىڭ شەرقىي ئاقدېڭىز تەۋەلىكىدە بايقالغاندىن كېيىن، ئىتتىپاقداشلارنىڭ ھاۋا ھەمدە باشقۇرۇلىدىغان بومبا مۇداپىئە سىستېمىلىرى تەرىپىدىن توسۇپ قېلىنغانلىقىنى بىلدۈردى.
باشقۇرۇلىدىغان بومبا پارچىلىرى تۈركىيەنىڭ شەرقىي جەنۇبىدىكى غازىئانتەپ ۋىلايىتى شاھىنبەي ناھىيەسىگە چۈشكەن بولۇپ، مەسئۇللار ۋەقەدە ئادەم ئۆلۈش ياكى يارىلىنىش ئەھۋالىنىڭ كۆرۈلمىگەنلىكىنى مەلۇم قىلدى.
ئەنقەرە جىددىيچىلىكنىڭ كەسكىنلىشىشىگە قارشى ئاگاھلاندۇردى
تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر-ئالاقە ئىدارىسى باشلىقى بۇرھانەتتىن دۇران باشقۇرۇلىدىغان بومبىنىڭ تۈركىيە زېمىنىغا يېقىنلاشقان ھامان ناتو مۇداپىئە قىسىملىرى تەرىپىدىن «ۋاقتىدا بىر تەرەپ قىلىنغانلىقى»نى ئەسكەرتتى.
ئۇ ھۆكۈمەت ئاپپاراتلىرىنىڭ ۋەقەنى تۇنجى سېكۇنتتىن باشلاپ يېقىندىن كۈزەتكەنلىكىنى ۋە بارلىق زۆرۈر مۇداپىئە ھەمدە بىخەتەرلىك تەدبىرلىرىنىڭ يولغا قويۇلغانلىقىنى تەكىتلىدى.
ئۇ سۆزىنى داۋاملاشتۇرۇپ: «بۇ دائىرىدە مىللىي مۇداپىئە مىنىستىرلىقى باشچىلىقىدىكى بارلىق ئالاقىدار ئورۇنلىرىمىز تولۇق ماسلاشقان ھالدا ھەرىكەت قىلماقتا. تۈركىيەنىڭ ھاۋا تەۋەلىكىنى ۋە چېگرا بىخەتەرلىكىنى قوغداش مەسىلىسىدە دۆلىتىمىزنىڭ ئىرادىسى قەتئىي، قۇدرىتى ئەڭ يۇقىرى سەۋىيەدىدۇر» دېدى.
ئۇ يەنە رايوندىكى جىددىيچىلىكنىڭ تېخىمۇ ئەۋج ئېلىپ كەتمەسلىكى ئۈچۈن، ئىراننى ئۆز ئىچىگە ئالغان بارلىق تەرەپلەرنى رايون خاراكتېرلىك بىخەتەرلىككە تەھدىت سالىدىغان ۋە پۇقرالارنى خەۋپكە ئىتتىرىدىغان ھەرىكەتلەردىن ساقلىنىشقا چاقىردى.
ئۇ سۆزىدە: «رايوندىكى جىددىيچىلىكنىڭ تېخىمۇ كەسكىنلەشمەسلىكى ۋە توقۇنۇشلارنىڭ تېخىمۇ كەڭ رايونلارغا يېيىلىپ كەتمەسلىكى ئىنتايىن مۇھىم» دېگەنلەرنى سۆزلىرىگە ئىلاۋە قىلدى.
دۇران يەنە پۇقرالارنى ۋە تاراتقۇلارنى پەقەت رەسمىي باياناتلارغىلا تايىنىشقا، جەمئىيەتتە ۋەھىمە پەيدا قىلىدىغان ياكى يالغان ئۇچۇرلارنىڭ تارقىلىشىغا سەۋەب بولىدىغان جەزملەشتۈرۈلمىگەن خەۋەرلەردىن ھوشيار بولۇشقا چاقىردى.
بۇ قېتىملىق جىددىي مۇداخىلە ئۆتكەن ھەپتە تۈركىيە ھاۋا تەۋەلىكىگە كىرگەن ئىرانغا تەۋە باشقا بىر باللىستىك باشقۇرۇلىدىغان بومبا ۋەقەسىدىن كېيىنلا يۈز بەردى. بۇ ئەھۋال ئوتتۇرا شەرقتە كۈنسېرى كېڭىيىۋاتقان توقۇنۇشلارنىڭ ناتو زېمىنلىرىغا يامراپ كېتىش ئېھتىماللىقىغا بولغان ئەندىشىلەرنى تېخىمۇ كۈچەيتىۋەتتى.
