گىرېتسىيەدە ئادەتتىن تاشقىرى ئىسسىق ھاۋا رايى سەۋەبىدىن بۈگۈن ئوچۇق ھاۋا مەيدانلىرىدا سائەت 13:00 تىن 17:00 گىچە بولغان ئارىلىقتا خىزمەت قىلىش چەكلەندى.

گىرېتسىيە خىزمەت ۋە ئاممىۋى بىخەتەرلىك مىنىستىرلىقى تەرىپىدىن ئېلان قىلىنغان يازما باياناتتا، بۈگۈن ھاۋا تېمپېراتۇرىسىدا ئادەتتىن تاشقىرى ئۆرلەش ھېس قىلىنىشى مۆلچەرلىنىۋاتقانلىقى بىلدۈرۈلدى.

شۇ سەۋەبتىن خىزمەتچىلەرنىڭ بىخەتەرلىكىگە كاپالەتلىك قىلىش ئۈچۈن ھاۋا تېمپېراتۇرىسى ئىنتايىن يۇقىرى بولىدىغان ئوتتۇرا گىرېتسىيە، تەسالىيە، مورا يېرىم ئارىلى ۋە پايتەخت ئافىنا قاتارلىق رايونلاردا سائەت 13:00 تىن 17:00 گىچە بولغان ئارىلىقتا قۇرۇلۇش، كېمىسازلىق زاۋۇتى، كۇرىئېرلىق مۇلازىمىتىگە ئوخشاش ئوچۇق ھاۋادا قىلىنىدىغان خىزمەتلەر چەكلەندى.

ئىشخانا خادىملىرىدىن سالامەتلىكىدە مەسىلە بارلار بىلەن ياشانغانلار ۋە ھامىلىدارلارغا ئوخشاش خەتەرلىك گۇرۇپپىدا ئورۇن ئالغانلارنىڭ بولسا ئۆيدە ئولتۇرۇپ خىزمەت قىلىشى قارار قىلىندى.

گىرېتسىيە مېتېئورولوگىيە ئىدارىسىنىڭ مۆلچەرلىشىچە، 19-ئىيۇلدىن بىرى داۋاملاشتۇرۇۋاتقان ئىسسىق ھاۋا ئېقىمى سەۋەبىدىن بۈگۈن ئاتتىكى، ۋىئوتىيا، فىتىئوتىدا، ئارگولىدا، تەسالىيە ۋە كورىنت رايونلىرىدا ھاۋا تېمپېراتۇرىسى 40 گرادۇستىن ئېشىپ كېتىدىكەن. تەسالىيەدە بولسا تېمپېراتۇرىنىڭ 43 گرادۇسقا يېتىشى مۆلچەرلەنمەكتە.

يەنە بىر تەرەپتىن، گېرىت ئارىلى، مورا يېرىم ئارىلى، جەنۇبىي ئەگە ئاراللىرى ئالدىنقى ئورۇندا بولۇپ نۇرغۇن رايوندا ئىسسىق ھاۋا بىلەن بىرگە چاڭ-توزاننىڭمۇ تەسىر كۆرسىتىشى كۈتۈلمەكتە.