پاكىستاننىڭ شىمالىدىكى بىر ساقچى ئىدارىسىغا قىلىنغان بومبىلىق ۋە قوراللىق ھۇجۇمدا ھاياتىدىن ئايرىلغانلارنىڭ سانى 16 نەپەر ساقچىنىمۇ قوشقاندا 31 كىشىگە يەتتى. يۇقىرى دەرىجىلىك بىر ساقچى ئەمەلدارى شەنبە كۈنى فىرانسىيە ئاخبارات ئاگېنتلىقىغا بەرگەن باياناتىدا توقۇنۇشلارنىڭ داۋاملىشىۋاتقانلىقىنى بىلدۈردى.
تېررورچىلار پاكىستاننىڭ غەربىي شىمالىدىكى خەيبەر پاختۇنخۋا ئۆلكىسىگە جايلاشقان ۋە تەخمىنەن 220 مىڭ كىشى ياشايدىغان كوھات شەھىرىدىكى كونا ساقچى لىنىيەسى قورۇسىغا ھۇجۇم قىلدى. ھۇجۇمدا، ساقچى قورۇسى ئىچىدىكى بىر مەسچىتنىڭ يېنىدا جۈمە نامىزى ئۈچۈن يىغىلغان كىشىلەر نىشان قىلىندى. پارتلاش مەسچىتنىڭ سىرتىدا بىر ئورەك پەيدا قىلدى.
مەزكۇر قورۇ تېررورلۇققا قارشى كۈرەش ئىدارىسى ئالاھىدە شۆبە ۋە باشقا بەزى ساقچى ئورگانلىرىنىڭ مۇھىم ئىشخانىلىرى جايلاشقان ناھىيە دەرىجىلىك ساقچى مەركىزى سۈپىتىدە خىزمەت قىلماقتا ئىدى.
مەسئۇل خادىم: «تېررورلۇق ھۇجۇمى ۋە ئادەم بومبا ھۇجۇمىدا ھازىرغىچە 16 ساقچىنى قوشقاندا كەم دېگەندە 31 كىشى ھاياتىدىن ئايرىلدى، 100 دىن ئارتۇق كىشى يارىلاندى» دېدى.
ئىسمىنى ئاشكارىلىماسلىق شەرتى بىلەن AFP غا سۆز قىلغان ساقچى ئەمەلدارى: «بەزى تېررورچىلار ھېلىھەم كوھات ساقچى مەركىزىنىڭ ئالاھىدە شۆبە قىسمىدا قاپسىلىپ قالغان ئەھۋالدا تۇرۇۋاتىدۇ» دېدى.
كوھات رايونلۇق سەھىيە مەسئۇلىنىڭ جۈمە كۈنى كېچىدە بەرگەن باياناتىدا، مۇتلەق كۆپچىلىكى ساقچى بولۇپ 100 دىن ئارتۇق كىشىنىڭ يارىلانغانلىقى ۋە يارىلانغانلاردىن بەزىلىرىنىڭ ئەھۋالىنىڭ ئېغىر ئىكەنلىكى بىلدۈرۈلدى.
پاكىستان تالىبان ھەرىكىتى تېررورلۇق تەشكىلاتىنىڭ قارمىقىدىكى يەرلىك IMP گۇرۇپپىسى ھۇجۇمنىڭ جاۋابكارلىقىنى ئۈستىگە ئالدى.
پاكىستان خەيبەر پاختۇنخۋا بىلەن جەنۇبتىكى چېگرا ئۆلكىسى بولغان بەلۇجىستاندا ھۇجۇملارنىڭ ئېشىشىنى ئافغانىستان مەنبەلىك تېررورلۇق پائالىيەتلىرى بىلەن چېتىشلىق دەپ قارايدۇ. تالىبان ھۆكۈمىتى بولسا ئافغانىستاننىڭ بۇ ھۇجۇملارغا ئارىلاشقانلىقى توغرىسىدىكى دەۋالارنى رەت قىلماقتا.
پاكىستان باش مىنىستىرى شاھباز شەرىف جۈمە كۈنى ئاخشىمى ھۇجۇمنى ئەيىبلەپ، «پارتلاش نەتىجىسىدە نۇرغۇن كىشىنىڭ يارىلانغانلىقىدىن چوڭقۇر قايغۇرغانلىقىنى» ئىپادىلىدى.
شەرىف يارىلانغانلارنى «ئەڭ ياخشى داۋالاش ياردىمى بىلەن تەمىنلەش» يوليورۇقى بەردى ۋە ھۇجۇمغا ئالاقىدار دوكلات تەييارلىنىشىنى تەلەپ قىلدى.
