جۇمھۇر رەئىس رەجەپ تايىپ ئەردوغان ئۇكرائىنالىق مەنسەپدىشى ۋولۇدىمىر زېلېنىسكىي بىلەن ئۆتكۈزگەن مۇخبىرلارنى كۈتۈۋېلىش يىغىنىدا، ئۇكرائىنا ئۇرۇشىغا ئالاقىدار «ئىستانبۇل مۇساپىسى»نىڭ تېخىمۇ كەڭ دائىرىلىك مەزمۇن بىلەن، جىددىيلىشىپ كەتكەن مەسىلىلەرنى ھەل قىلىش مەقسىتىدە قايتا ئىشقا كىرىشتۈرۈلۈشىنىڭ پايدىلىق بولىدىغانلىقىغا ئىشىنىدىغانلىقىنى ئېيتتى.
ئەردوغان چارشەنبە كۈنى مۇنداق دېدى: «ھەر ئىككى تەرەپ ئۈچۈن ئۇرۇشنىڭ ۋەيران قىلغۇچ تەسىرى بارغانسېرى چوڭقۇرلىشىۋاتقان بىر پەيتتە، ئىستانبۇل سۆھبەتلىرىنىڭ مەسىلىنى دىپلوماتىك يول بىلەن ھەل تىرىشچانلىقلىرنىڭ مۇھىم بىر باسقۇچى ئىكەنلىكىگە ئىشىنىدىغانلىقىمىزنى تەكىتلىدۇق.»
ئۇ ئەنقەرەنىڭ ئۇرۇش توختىتىشنى تېزلىتىدىغان ھەمدە ئادىل، ئۇزۇن مۇددەتلىك تىنچلىققا ئاساس سالىدىغان ھەر تۈرلۈك تەكلىپنى رۇسىيە بىلەن كۆرۈشۈشكە تەييار ئىكەنلىكىنى بىلدۈردى. تۈركىيە تەرەپ يەنە، رۇسىيە بىلەن ئۇكرائىنا ئارىسىدىكى قان تۆكۈلۈشنى توختىتىشنى خالايدىغان بارلىق تەرەپلەرنىڭ ئىستانبۇل مۇساپىسىگە ئىجابىي پوزىتسىيە تۇتۇشىنى كۈتىدىغانلىقىنى ئىپادىلىدى.
تۈركىيەنىڭ دىپلوماتىك تىرىشچانلىقلىرى
زېلېنىسكىي بولسا، ئۇكرائىنانىڭ يىل ئاخىرىغىچە رۇسىيە بىلەن ئۇرۇش ئەسىرلىرىنى ئالماشتۇرۇش خىزمىتىنى قايتا جانلاندۇرۇشنى ئۈمىد قىلىدىغانلىقىنى ئېيتتى.
ئۇكرائىنانىڭ ئۇرۇشنى ئاخىرلاشتۇرۇش يولىدا تۈركىيەنىڭ دىپلوماتىك تىرىشچانلىقلىرىغا ئىشىنىدىغانلىقىنى سۆزلىرىگە ئىلاۋە قىلغان ئۇكرائىنا رەھبىرى زېلېنىسكىي: «ئەلۋەتتە دىپلوماتىيە توغرىسىدا ئەمەلىي قەدەملەر ھەققىدە سۆزلەشتۇق. ھازىر نۇرغۇنلىغان مۇساپىلەر تېخىمۇ ئاكتىپ ھالغا كەلدى ۋە بىز بارلىق پائالىيەتلەرنىڭ تىنچلىققا قارىتىلغان بولۇشىغا كاپالەتلىك قىلىشقا تىرىشىۋاتىمىز،» دېدى.
