ئەنگلىيە ئىستىخبارات ئورگىنى MI5 نىڭ «خىتاي جاسۇسلۇق تەھدىتلىرى» ئاگاھلاندۇرۇشىدىن كېيىن، خىتاي ئەنگلىيەنى قاتتىق سۆزلەر بىلەن تەنقىد قىلىپ: «بۇ خىيالىي دەۋالار ۋە خاتا پەرەزلەرگە ئەمدى خاتىمە بېرىلىشى كېرەك» دېدى.
ئاخبارات ئېلان قىلىش يىغىنىنىڭ خاتىرىلىرىگە ئاساسلانغاندا، خىتاي تاشقى ئىشلار مىنىستىرلىقىنىڭ باياناتچىسى ماۋ نىڭ چارشەنبە كۈنى ئۆتكۈزۈلگەن بىر ئاخبارات ئېلان قىلىش يىغىنىدا، خىتاينىڭ «باشقا دۆلەتلەرنىڭ ئىچكى ئىشلىرىغا ھەرگىز ئارىلاشمايدىغانلىقىنى ۋە ئەنگلىيە پارلامېنتىغا مۇناسىۋەتلىك ئاتالمىش ‹جاسۇسلۇق› بىلەن ھېچقانداق ئالاقىسى يوقلۇقىنى» ئىلگىرى سۈردى.
ئەنگلىيە بىخەتەرلىك مىنىستىرى دان جارۋىس MI5 نىڭ پارلامېنتقا بىر جاسۇسلۇق ئاگاھلاندۇرۇشى يوللىغاندىن كېيىن، سەيشەنبە كۈنى ئەنگلىيەنىڭ دېموكراتىيەسىگە مۇداخىلە قىلىۋاتقان «خىتاي جاسۇسلۇق تەھدىتلىرى» ھەققىدە ئاگاھلاندۇرۇش بەرگەن ئىدى.
دان جارۋىس خىتاينىڭ پارلامېنتقا ئالاقىدار سەزگۈر ئۇچۇرلارنى قولغا كەلتۈرۈش مەقسىتىدە پارلامېنت ئەزالىرى ۋە لوردلار بىلەن ئالاقىلىشىشقا ئۇرۇنغانلىقىنى ئىلگىرى سۈرۈپ: «بۇ 2021-يىلى خىتاي دۆلىتىگە چېتىشلىق ئاكتىيورلارنىڭ پارلامېنتنىڭ ئېلخەتلىرىنى نىشان قىلغان تور ھەرىكەتلىرى بولۇپ، 2022-يىلى كرىستىن لىنىڭ ئارىلىشىش ئۇرۇنۇشلىرى ۋە باشقا تېخىمۇ يېقىنقى ۋەقەلەردە خىتاينىڭ پائالىيەت ئەندىزىسىنى نامايان بولغانلىقىنى ئاساس قىلىدۇ» دېدى.
جارۋىس ھۆكۈمەتنىڭ ئىتتىپاقداشلىرى ۋە شېرىكلىرى بىلەن ھەمكارلىشىشنىمۇ ئۆز ئىچىگە ئالغان ھالدا، دۆلەت مەنپەئەتىنى، پۇقرالارنى ۋە دېموكراتىك تۇرمۇش ئۇسۇلىنى قوغداش ئۈچۈن زۆرۈر بولغان بارلىق تەدبىرلەرنى ئالىدىغانلىقىنى بىلدۈردى.
بىخەتەرلىك مىنىستىرى ھۆكۈمەتنىڭ خىتاينىڭ رۇسىيە ۋە ئىران بىلەن بىرلىكتە چەت ئەل تەسىرىنى تىزىملاش سىستېمىسى (FIRS) نىڭ ئىلغار دەرىجىسىگە كىرگۈزۈلۈپ-كىرگۈزۈلمەيدىغانلىقىغا تېخى قارار بەرمىگەنلىكىنى بىلدۈردى. بۇ سىستېما، چەت ئەل كۈچى نامىدىن ئەنگلىيەدە سىياسىي تەسىر كۆرسىتىش پائالىيەتلىرى ئېلىپ بېرىش ئۈچۈن تۈزۈلگەن كېلىشىملەرنىڭ تىزىملىتىلىشىنى تەلەپ قىلىدۇ.
