ئامېرىكا قوشما ئىشتاتلىرى رۇسىيەنىڭ ئۇكرائىناغا ئالاقىدار قاتتىق تەلەپلىرىدە چىڭ تۇرۇۋېلىشى سەۋەبىدىن، پىرېزىدېنت دونالد ترامپ بىلەن رۇسىيە پىرېزىدېنتى ۋلادىمىر پۇتىن ئوتتۇرىسىدا ۋېنگىرىيەنىڭ پايتەختى بۇداپېشتتا ئۆتكۈزۈلۈشى پىلانلانغان يۇقىرى دەرىجىلىكلەر ئۇچرىشىشىنى بىكار قىلدى. بۇ ئۇچۇرنى جۈمە كۈنى «Financial Times» گېزىتى خەۋەر قىلدى.

گېزىتنىڭ ئەھۋالدىن خەۋەردار كشىلەرنىڭ سۆزلىرىنى نەقىل كەلتۈرۈپ بىلدۈرۈشىچە، بۇ قارار، ئىككى دۆلەتنىڭ يۇقىرى دەرىجىلىك دىپلوماتلىرى ئوتتۇرىسىدىكى جىددىي تېلېفون سۆھبىتىدىن كېيىن چىقىرىلغان.

ئاق ساراي تېخىچە بۇ ھەقتە رەسمىي بايانات ئېلان قىلمىدى.

ترامپ ئۇكرائىنانىڭ ھازىرقى چېگرالىرى ئاساسىدا دەرھال ئۇرۇش توختىتىش چاقىرىقىنى قوللىغان ئىدى.

ترامپ بىلەن پۇتىننىڭ، رۇسىيەنىڭ ئۇكرائىنادىكى ئۇرۇشىنى ئاخىرلاشتۇرۇش چارىلىرىنى مۇزاكىرە قىلىش ئۈچۈن ۋېنگىرىيەنىڭ پايتەختىدە ئۇچرىشىش قارارىغا كەلگىنىدىن بىر قانچە كۈن كېيىن، رۇسىيە تاشقى ئىشلار مىنىستىرلىقى ۋاشىنگتونغا بىر ئەسلەتمە ئەۋەتتى. بۇ ئەسلەتمىدە، پۇتىننىڭ توقۇنۇشنىڭ «تۈپ سەۋەبلىرى» دەپ ئاتىغان مەسىلىلىرىنىڭ مۇزاكىرە قىلىنىشى كېرەكلىكى تەكىتلەندى. بۇ مەسىلىلەر: زېمىن جەھەتتە يول قويۇش، ئۇكرائىنا قوراللىق قىسىملىرىنى زور دەرىجىدە قىسقارتىش ۋە ئۇكرائىنانىڭ ناتوغا ھەرگىز قوشۇلمايدىغانلىقىغا كاپالەتلىك قىلىش قاتارلىقلارنى ئۆز ئىچىگە ئالاتتى.

ئامېرىكا قوشما ئىشتاتلىرى رۇسىيە تاشقى ئىشلار مىنىستىرى سېرگېي لاۋروۋ بىلەن ئامېرىكا تاشقى ئىشلار مىنىستىرى ماركو رۇبىيو ئوتتۇرىسىدىكى تېلېفون سۆھبىتىدىن كېيىن، يۇقىرى دەرىجىلىكلەر ئۇچرىشىشىنى بىكار قىلدى. سۆھبەتتىن كېيىن رۇبىيو ترامپقا موسكۋانىڭ سۆھبەتلىشىشكە ھېچقانداق كۆڭلى يوقلۇقىنى يەتكۈزدى. بۇ ئۇچۇرمۇ «FT» نىڭ خەۋىرىدە ئورۇن ئالدى.

ئۇكرائىنا پىرېزىدېنتى ۋولۇدىمىر زېلېنىسكىي بۇ ئايدا قىلغان سۆزىدە، ئۇكرائىنانىڭ تىنچلىق سۆھبىتىگە تەييار ئىكەنلىكىنى، بىراق موسكۋا تەلەپ قىلغاندەك قوشۇمچە زېمىنلاردىن ئەسكەر چېكىندۈرمەيدىغانلىقىنى بىلدۈردى.