گىرۇزىيە ئاساسىي قانۇن مەھكىمىسى پىرېزىدېنت سالومې زۇرابىشۋىلىنىڭ ئۆتكەن ئۆكتەبىر ئېيىدا ئۆتكۈزۈلگەن تالاش-تارتىشلىق پارلامېنت سايلىمىنىڭ نەتىجىسىنى بىكار قىلىش دەۋاسىنى رەت قىلدى.

ئۆتكەن جۈمە كۈنى چىقىرىلىپ، سەيشەنبە كۈنى ئالىي سوت مەھكىمىسىنىڭ تور بېتىدە ئېلان قىلىنغان قاراردا، زۇرابىشۋىلى تەرىپىدىن ئېچىلغان دەۋانىڭ «ئاساسلىق تەكشۈرۈش»كە ئېلىنمايدىغانلىقى بىلدۈرۈلدى.

مەھكىمە يەنە گىرۇزىيە چۈشى پارتىيەسى كۆپ سانلىقنى قولغا كەلتۈرگەن سايلام نەتىجىسىگە قارشى، 30 ئۆكتىچى پارلامېنت ئەزاسى سۇنغان باشقا بىر دەۋانىمۇ رەت قىلدى.

ئاساسىي قانۇن مەھكىمىسى قارارنىڭ ھەل قىلغۇچ قارار ئىكەنلىكىنى، ئۇنىڭغا ئېتىراز بىلدۈرۈشكە ياكى قايتا قاراپ چىقىشقا بولمايدىغانلىقىنى بىلدۈردى.

داۋاملىشىۋاتقان نامايىشلار

زۇرابىشۋىلى 19-نويابىردا ئاساسىي قانۇن مەھكىمىسىگە ئەرز سۇنۇپ، 26-ئۆكتەبىر سايلام نەتىجىسىنىڭ بىكار قىلىنىشىنى تەلەپ قىلغانىدى. گىرۇزىيە چۈشى پارتىيەسى ئاۋازلارنىڭ 53.93 پىرسەنتىنى ئېلىپ، 150 ئورۇنلۇق پارلامېنتتا 89 ئورۇن بىلەن كۆپ سانلىقنى ئىگىلىگەنىدى.

باش مىنىستىر ئىراكلى كوباخىدزې ۋە پارتىيەنىڭ پەخرىي رەئىسى بىدزىنا ئىۋانىشۋىلى قاتارلىق گىرۇزىيە چۈشى پارتىيەسى مەسئۇللىرى نەتىجىلەردىن مەمنۇن ئىكەنلىكىنى بىلدۈردى.

ئەمما زۇرابىشۋىلى نەتىجىلەرنى ئېتىراپ قىلمىغانلىقىنى ۋە ئاۋاز بېرىشنىڭ رۇسىيە مۇداخىلىسىگە ئۇچرىغانلىقىنى ئوتتۇرىغا قويغان. ئۆكتىچى پارتىيەلەر بولسا، سايلامغا «ئوغرىلانغان» دەپ باھا بېرىپ، ھۆكۈمەتكە قارشى نامايىشلارنى ئۇيۇشتۇرغان ۋە ياۋروپا ئىتتىپاقى ئەزالىق سۆھبىتى توختىتىپ قويۇلغانىدى.

كوباخىدزې سايلامدا ساختىپەزلىك قىلىنغان دېگەن ئەيىبلەشلەرنى رەت قىلىپ، سايلامدا يۈز بەرگەن ھەرقانداق «مۇقىمسىزلىق»نى دۇنيانىڭ باشقا جايلىرىدىكى سايلاملاردىمۇ كۆرۈلىدىغان تىپىك ئەھۋال دەپ ئاتىدى.

پىرېزىدېنت ھازىرچە مەھكىمىنىڭ قارارىغا باھا بەرمىدى.