The Wall Street Journal نىڭ خەۋەر قىلىشىچە، ئىسرائىلىيە ئامېرىكاغا مەلۇمات بەرگەن ئاساستا ئىراقنىڭ چۆللۈك رايونىدا مەخپىي بىر ھەربىي بازا قۇرغان ۋە بازىنى بايقاشقا ئازلا ئىراق ئەسكەرلىرىگە ھاۋادىن ھۇجۇم قىلغان.
The Wall Street Journal نىڭ خەۋىرىگە قارىغاندا، ئىسرائىلىيە ئىرانغا قارىتىلغان ھاۋا ھۇجۇملىرىنى قوللاش مەقسىتىدە ئىراقنىڭ چۆللۈك رايونىدا مەخپىي بىر ھەربىي بازا قۇغان.
ئىسرائىلىيە كۈچلىرى توقۇنۇشنىڭ دەسلەپكى مەزگىللىرىدە بازىنى بايقاش ئالدىدا تۇرغان ئىراق ئەسكەرلىرىگە ھاۋادىن ھۇجۇم قىلغان.
گېزىتنىڭ خەۋىرىگە ئاساسلانغاندا، بۇ بازا ئىران ئۇرۇشى باشلىنىشتىن سەل ئىلگىرى ئامېرىكانىڭ خەۋىرى بار، ئەمما ئىراق ھۆكۈمىتىنىڭ خەۋىرى ياكى تەستىقى بولمىغان ھالدا قۇرۇلغان ئىدى.
ئىراق دۆلەت تاراتقۇلىرىنىڭ بىر پادىچىنىڭ گۇمانلىق ھەربىي پائالىيەتلەرنى كۆزەتكەنلىكىنى خەۋەر قىلىشى بىلەن ئىراق ئەسكەرلىرى تەكشۈرۈش باشلىغان ۋە بازا مارت ئېيىنىڭ بېشىدا ئاشكارىلىنىشقا ئازلا قالغان.
ئىسرائىلىيە ئىراق كۈچلىرىنىڭ بازىغا يېتىپ بېرىشىنى توسۇش ئۈچۈن ھاۋادىن ھۇجۇم قىلغان. بۇ ھۇجۇم بىر ئىراق ئەسكىرىنىڭ ھاياتىدىن ئايرىلىشىغا سەۋەب بولغانلىقى ئۈچۈن ئىراق ھۆكۈمىتى تەرىپىدىن ئەيىبلەندى.
ئىراق بىرلەشمە ھەرىكەت قوماندانلىق مەھكىمىسىنىڭ مۇئاۋىن قوماندانى قەيس ئەل مۇھەممەداۋى دۆلەت تاراتقۇلىرىغا بەرگەن باياناتىدا: «بۇ پەرۋاسىز ھەرىكەت ھېچقانداق ماسلىشىش ياكى تەستىقسىز ئېلىپ بېرىلدى» دېدى.
ئىسرائىلىيە كۈچلىرىنىڭ بۇ بازىنى ئىسرائىلىيە ھاۋا ئارمىيەسى ئۈچۈن بىر ئەشيا ئوبوروت مەركىزى سۈپىتىدە ئىشلەتكەنلىكى، ئىزدەش-قۇتقۇزۇش ئەترەتلىرىنىڭمۇ بۇ يەرگە ئورۇنلاشتۇرۇلغانلىقى خەۋەر قىلىندى.
ئىسرائىلىيە ئارمىيەسى بۇ خەۋەرگە قارىتا ھېچقانداق ئىنكاس قايتۇرمىدى.
28-فېۋرالدىن بۇيان رايونلۇق جىددىيچىلىك شىددەت بىلەن كۈچەيدى ۋە ئىراننىڭ ئۆچ ئېلىشىغا ھەمدە ھورمۇز بوغۇزىنىڭ تاقىلىپ قېلىشىغا يول ئاچتى.
8-ئاپرېلدا پاكىستاننىڭ ۋاسىتىچىلىك قىلىشى بىلەن ئۇرۇش توختىتىش كېلىشىمى يولغا قويۇلدى، ئەمما ئامېرىكا پىرېزىدېنتى دونالد ترامپ كېيىنچە ئېنىق بىر ۋاقىت بەلگىلىمىگەن ھالدا ئۇرۇش توختىتىش مۇددىتىنىڭ ئۇزارتىلغانلىقىنى جاكارلىدى.
