ئىران ئارمىيەسى ئامېرىكىنىڭ ئاخىرقى ھۇجۇملىرىغا قارىتا ئۆچ ئېلىش سۈپىتىدە بەھرەيىن، ئىيوردانىيە ۋە كۇۋەيتتىكى ئامېرىكا ھەربىي نىشانلىرىغا ھۇجۇملارنى ئېلىپ بارغانلىقىنى ئېلان قىلدى.
ئىران ئىنقىلابىي مۇھاپىزەتچىلىرىمۇ جۈمە كۈنى بەھرەيىندىكى ئەمازونغا ئائىت بىر ئۇچۇر مەركىزىنى نىشانغا ئالغانلىقىنى ئىلگىرى سۈردى. ئەمما نە ئامېرىكا تېخنىكا شىركىتى نە بەھرەيىن ھۆكۈمىتى بۇ ھەقتە ھېچقانداق بايانات ئېلان قىلمىدى.
ئامېرىكامۇ ئۆز ئورۇنلىرىنىڭ ياكى خادىملىرىنىڭ نىشانغا ئېلىنغانلىقىنى جەزملەشتۈرمىدى.
ئىران ئارمىيەسى دۆلەت تېلېۋىزىيەسىدە ئېلان قىلىنغان باياناتىدا: «ئەتىگەندە بەھرەيىندىكى ئىسا ھاۋا بازىسىدا ئامېرىكا تېررور ئارمىيەسىگە ئائىت يېقىلغۇ ئامبارلىرى، چوڭ جابدۇق ئامبارلىرى، سىلو ۋە كېسەلخانىلار ئاراش كامىكازە ئۇچقۇچىسىز ئاپپاراتلىرى بىلەن نىشانغا ئېلىندى» دېدى.
بەھرەيىندە تۇرۇۋاتقان بىر AFP مۇخبىرى جۈمە كۈنى پارتلاش ئاۋازى ئاڭلانغانلىقىنى ۋە ئاگاھلاندۇرۇش سىگناللىرىنىڭ چېلىنغانلىقىنى ئۇقتۇردى. ئەمما ئىككى ۋەقە ئوتتۇرىسىدا باغلىنىش بار-يوقلىقى تېخى ئېنىق ئەمەس.
بەھرەيىن ھۆكۈمىتى كېيىنچە «ئىراننىڭ بىر قىسىم ھاۋا ھۇجۇملىرىنىڭ» ئالدى ئېلىنغانلىقىنى ۋە ھاۋا ئاپپاراتلىرىنىڭ يوقىتىلغانلىقىنى ئېلان قىلدى. بەھرەيىن دائىرىلىرى ئىراننى پۇقرالارنى نىشانغا ئېلىش بىلەن ئەيىبلىدى.
ئىران ئارمىيەسى ئىيوردانىيەدىكى ئەل-ئەزراق بازىسىدا ئايروپىلان ئىسكىلاتلىرى، رېمونت ئىسكىلاتلىرى ۋە بىر ئەسكەرلەر تۇشلۇق بىناغا ئۇچقۇچىسىز ئاپپاراتلار بىلەن زەربە بەرگەنلىكىنى ئىلگىرى سۈردى.
ئىيوردانىيە ئارمىيەسى بولسا ئىراننىڭ جۈمە كۈنى ئاتقان يەتتە باشقۇرۇلىدىغان بومبىسى ۋە ئالتە ئۇچقۇچىسىز ئاپپاراتىنىڭ ئالدى ئېلىنغانلىقىنى، ھۇجۇملاردا ئادەم ئۆلمىگەنلىكىنى ياكى ماددى زىيان مەيدانغا كەلمىگەنلىكىنى ئېلان قىلدى.
ئىران ئارمىيەسى يەنە كۇۋەيتتىكى كامپ ئودايرىدا تۇرۇشلۇق ئامېرىكا ئامبارلىرى بىلەن كامپ دوھا ۋە كامپ ئارىفجاندىكى ئامېرىكا ئەسكەرلىرى ئورۇنلاشقان مەيدانلارغا ئۇچقۇچىسىز ئاپپارات بىلەن ھۇجۇم قىلغانلىقىنى بىلدۈردى.
ئىران ئىنقىلابىي مۇھاپىزەتچىلىرى، كۇۋەيتتىكى ئالى ئەس-سالىم ھاۋا بازىسىغىمۇ ھۇجۇم قىلغانلىقىنى، بىر ئوق-دورا ئامبىرىنى ۋەيران قىلغانلىقىنى ھەمدە ئامېرىكا خادىملىرى ئارىسىدا ئادەم ئۆلۈش ۋە يارىلىنىشقا سەۋەب بولغانلىقىنى ئىلگىرى سۈردى.
ئىران ئارمىيەسى يەنە كامپ ئودايرىدىكى جابدۇق ساقلاش ئىسكىلاتلىرى بىلەن بەھرەيىندىكى ئامېرىكا بەشىنچى فلوتىغا ئائىت بىر كۆزىتىش مۇنارىنى پاچاقلاپ تاشلىغانلىقىنى ئىلگىرى سۈردى.
تېھران ئامېرىكا ئارمىيەسىنىڭ ئىرانغا ھۇجۇم قىلىش مەقسىتىدە ئىشلەتكەن ئوتتۇرا شەرقتىكى ھەر بىر ئورۇن ياكى بازىنىڭ قانۇنىي ئۆچ ئېلىش نىشانى ئىكەنلىكىنى بىلدۈرمەكتە.
ئىران خاتەمۇل ئەنبىيا مەركىزىي قوماندانلىق ئىشتابى قوماندانى ئەلى ئابدۇللاھىمۇ جۈمە كۈنى رايوندىكى ئامېرىكا ئەسكەرلىرىگە تەھدىت سېلىپ: «سىلەر ئۈچۈن جەھەننەمگە ھەقسىز، بىر تەرەپلىك بېلەتلەرنى تەييارلىدۇق» دېدى.
ئابدۇللاھى دۆلەت تېلېۋىزىيەسىدىكى سۆزىدە: «ئىسلام جۇمھۇرىيىتىنىڭ شېھىت قىلىنغان ھەر بىر شەرەپلىك پۇقراسى ئۈچۈن بىر ئامېرىكا ئەسكىرى جەھەننەمگە ئەۋەتىلىدۇ» دېگەن سۆزلەرنى ئىشلەتتى.
