ئامېرىكا پىرېزىدېنتى دونالد ترامپ تۈركىيەلىك مەنسەپدىشى رەجەپ تاييىپ ئەردوغاننىڭ رۇسىيە بىلەن ئۇكرائىنا ئوتتۇرىسىدىكى ئۇرۇشنى ئاخىرلاشتۇرۇشتا رول ئوينىيالايدىغانلىقىنى ئېيتتى.

ترامپ دۈشەنبە كۈنى مىسىردىن ئاقسارايغا قايتىش يولىدا «ھاۋا ئارمىيە بىرىنچى نومۇرلۇق» ئايروپىلانىدا مۇخبىرلارغا قىلغان سۆزىدە، رەھبەرلەرنىڭ، بولۇپمۇ ئەردوغاننىڭ رۇسىيە بىلەن ئۇكرائىنا ئوتتۇرىسىدىكى ئۇرۇشقا ياردەم قىلالايدىغان-قىلالمايدىغانلىقى ھەققىدىكى بىر سوئالغا جاۋاب بېرىپ: «ئەردوغان ياردەم قىلالايدۇ» دېدى.

ئۇ يەنە: «ئۇ رۇسىيە تەرىپىدىن ھۆرمەتلىنىدۇ» دېگەنلەرنى سۆزلىرىگە ئىلاۋە قىلدى.

تۈركىيە 2022-يىلى فېۋرالدا باشلانغان رۇسىيە-ئۇكرائىنا ئۇرۇشىنى ئاخىرلاشتۇرۇش ئۈچۈن تىرىشچانلىقلىرىنى داۋاملاشتۇرماقتا.

ئەنقەرە كىيېۋ ۋە موسكۋانى سۆھبەت ئارقىلىق توقۇنۇشنى ئاخىرلاشتۇرۇشقا چاقىرىپ، تىنچلىقنىڭ ئاساسىنى يارىتىش ئۈچۈن ۋاسىتىچىلىكنى ئۆز ئىچىگە ئالغان ھەر تۈرلۈك تەشەببۇسقا تەييار ئىكەنلىكىنى بىلدۈردى.

زېلېنىسكىي بىلەن كۆرۈشۈش

ئامېرىكاغا قايتىش يولىدا ئايروپىلاندىكى مۇخبىرلارنىڭ سوئاللىرىغا جاۋاب بەردى ئۇكرائىنا مەسىلىسى توغرىسىدىكى سوئاللىرىغا جاۋاب بەرگەن ترامپ، جۈمە كۈنى ئاقسارايدا ئۇكرائىنا پىرېزىدېنتى ۋولودىمىر زېلېنىسكىي بىلەن كۆرۈشىدىغانلىقىنى دەلىللىدى.

بۇنىڭدىن سەل بۇرۇن زېلېنىسكىي بىر ئۇكرائىنا ۋەكىللەر ئۆمىكىنىڭ بىر قاتار ئۇچرىشىشلارنى ئۆتكۈزۈش ئۈچۈن ئامېرىكاغا قاراپ يولغا چىققانلىقىنى ۋە جۈمە كۈنى ترامپ بىلەن كۆرۈشىدىغانلىقىنى ئېيتقان ئىدى.

زېلېنىسكىي X سۇپىسىدا ھەمبەھرىلىگەن مەزكۇر ئۇچۇرىدا: «جۈمە كۈنى ۋاشىنگتونغا كېلىپ، پىرېزىدېنت ترامپ بىلەن كۆرۈشۈش پۇرسىتىگە ئېرىشىمەن» دېگەن سۆزلەرنى ئىشلىتىپ، «بىر قاتار قەدەملەرنى مۇزاكىرە قىلىمىز، دەپ ئويلايمەن. دىيالوگىمىز ۋە قوللىغانلىقى ئۈچۈن پىرېزىدېنت ترامپقا مىننەتدارلىق بىلدۈرىمەن» دېگەن ئىدى.

زېلېنىسكىي زىيارەتنىڭ ئاساسلىق نۇقتىسىنىڭ ھاۋا مۇداپىئەسى ۋە ئۇزۇن مۇساپىلىك ھۇجۇم قىلىش ئىقتىدارى ئىكەنلىكىنى، «رۇسىيەگە تىنچلىق نامىدا بېسىم ئىشلىتىش ئۈچۈن» بۇ مەسىلىلەرنىڭ مۇھاكىمە قىلىنىدىغانلىقىنى تەكىتلىگەنىدى.