ئىران ئامېرىكانىڭ ھۇجۇملىرىنى «ئۇرۇش جىنايىتى» ۋە خەلقئارالىق دېڭىز سودا ترانسپورتىغا بىر تەھدىت دەپ باھالىدى.
ئىران ئامېرىكانىڭ ئۈچ دانە ئىران خام نېفىت توشۇغۇچى پاراخوتىغا قىلغان ھۇجۇملىرىنى «قانۇنسىز ۋە تاجاۋۇزچى» دەپ ئاتاپ، قاتتىق تەنقىد قىلدى ھەمدە ۋاشىنگتوننىڭ ئىران پاراخوتلىرىغا قاراتقان ھۇجۇملىرىنى داۋاملاشتۇرغان تەقدىردە «تېخىمۇ ئېغىر» ئۆچ ئېلىش ھۇجۇملىرىدا بولىدىغانلىقى ھەققىدە ئاگاھلاندۇردى.
ئىران تاشقى ئىشلار مىنىستىرلىقى شەنبە كۈنى ئېلان قىلغان باياناتىدا مۇنداق دېدى: «ئامېرىكانىڭ ئىرانغا قارىتا ئېلىپ بارغان ھەربىي تاجاۋۇزچىلىقىنىڭ داۋامى سۈپىتىدە شۇنداقلا ۋەتنىمىزگە قارشى يولغا قويغان دېڭىز قورشاۋى بىلەن ئىقتىسادىي ئۇرۇشنىڭ بىر قىسمى سۈپىتىدە ئىشقا ئاشۇرۇلغان بۇ قانۇنسىز ۋە تاجاۋۇزچى قىلمىشلار ب د ت نىزامنامىسىنىڭ 2-ماددىنىڭ 4-تارمىقىنى ئاشكارا دەپسەندە قىلغانلىقتۇر، بۇ بىر ئۇرۇش جىنايىتى ۋە خەلقئارالىق دېڭىز سودا تىرانسىپورتىنىڭ بىخەتەرلىكىگە ئاشكارا تەھدىت ھېسابلىنىدۇ»
مىنىستىرلىق ئىراننىڭ ئامېرىكا «دۆلەت تېررورىزمى ۋە تاجاۋۇزچى قىلمىشلىرى» دەپ باھالىغان پوزىتسىيەگە قارشى «ئۆز ئىگىلىك ھوقۇقى ۋە مىللىي مەنپەئەتلىرىنى قەتئىيلىك بىلەن قوغداش» ئىرادىسىنى تەكىتلىدى.
مىنىستىرلىق بۇ خىل قىلمىشلار ئارىسىدا «ئۈزلۈكسىز داۋاملىشىۋاتقان دېڭىز قورشاۋى ۋە ئىقتىسادىي ئۇرۇش ھەم سودا پاراخوتلىرىغا قارىتىلغان ھۇجۇملادىن سىرت، رايوندا داۋاملىشىۋاتقان ئامېرىكانىڭ «تاجاۋۇزچى ۋە ئارىلاشقۇچى قىلمىشلىرى» نىڭ ئاقىۋىتىگە ۋاشىنگتون ۋە ئۇنىڭ «شېرىكلىرى بىلەن ھەمكارلاشقۇچىلىرى» نىڭ جاۋابكار بولىدىغانلىقىنى ئېيتتى.
«تېخىمۇ ئېغىر» ئۆچ ئېلىشلار
يەنە بىر تەرەپتىن، ئىران ئارمىيەسى ۋاشىنگتوننىڭ ئىران پاراخوتلىرىغا قاراتقان ھۇجۇملىرىنى داۋاملاشتۇرغان تەقدىردە ئامېرىكا دېڭىز ئارمىيەسىگە قارشى «تېخىمۇ ئېغىر» ئۆچ ئېلىشلاردا بولىدىغانلىقىنى ئۇقتۇردى.
خاتەمۇل-ئەنبىيا مەركىزى قوماندانلىق ئىشتابى: «ئىران پاراخوتلىرىغا قارىتىلغان دۈشمەنلىك قىلمىشلىرى، ئىشەنچسىزلىك پەيدا قىلىش ۋە ئارتۇقچە ئارىلىشىشلار ھەمدە ئىرانغا يۈرگۈزۈلۈۋاتقان دېڭىز قورشاۋى داۋاملاشقان تەقدىردە، ئىران قوراللىق كۈچلىرىنىڭ رايوندىكى ئامېرىكا ھەربىي پاراخوتلىرىغا قارىتىدىغان ھۇجۇملىرىنىڭ ئىلگىرىكىدىن كۆپ كۈچلۈك بولىدىغانلىقى توغرىسىدا ئامېرىكا ئارمىيەسىنى ئاگاھلاندۇردى، ھەمدە ئۆچ ئېلىش ھەرىكەتلىرىنىڭ كېڭەيتىلىشى مۇمكىنلىكىنىمۇ بىلدۈردى.
بۇ ئاگاھلاندۇرۇشلار، ئامېرىكا مەركىزى قوماندانلىق ئىشتابىنىڭ ئىران ئىنقىلابى مۇھاپىزەتچىلەر قىسمىنىڭ رايون دېڭىزىدا ئىككى ئامېرىكا دېڭىز ئارمىيەسى ئۇرۇش پاراخوتىغا قارىتىپ بالىستىك باشقۇرۇلىدىغان بومبا ئاتقىنىدىن كېيىن، ئىرانغا تەۋە ئۈچ خام نېفىت تانكېرىنى پاچاقلاپ تاشلىغانلىقىنى ئېلان قىلىشىدىن بىر نەچچە سائەت كېيىن ئوتتۇرىغا چىقتى.
ئامېرىكا ۋە ئىسرائىلىيەنىڭ 28-فېۋرالدا ئىرانغا قارىتا ھۇجۇملىرى باشلانغاندىن بۇيان رايون خاراكتېرلىك جىددىيچىلىك كۈچەيدى. ئىران بۇنىڭغا ئىسرائىلىيە ۋە رايون مىقياسىدىكى ئامېرىكا مەنپەئەتلىرىگە قاراتقان باشقۇرۇلىدىغان بومبا ۋە ئۇچقۇچىسىز ئايروپىلان ھۇجۇملىرى بىلەن جاۋاب قايتۇردى.
ئامېرىكا ۋە ئىران ئىيۇن ئېييدا ھۈرمۈز بوغىزىدا دېڭىز قاتنىشىنىڭ ئەركىنلىكى توغرىسىدا پىكىر بىرلىكى كېلىشىمى ئىمزاغان ئىدى. بىراق بوغۇزدىكى بىخەتەرلىك تەرتىپلىرىگە مۇناسىۋەتلىك ئىختىلاپلار سەۋەبىدىن كېلىشىمنىڭ ئىجرا قىلىنىشى توختاپ قالغان ئىدى.
