ئىران پەيشەنبە كۈنى ئېلان قىلغان باياناتىدا، ھورمۇز بوغۇزىنىڭ دۇنيا دېڭىز قاتنىشىغا ئوچۇق بولىدىغانلىقىنى، ئەمما دۈشمەنلىرى ۋە دۈشمەنلىرىنىڭ رايوندىكى بازىلىرى ئۈچۈن «تاقاق» بولىدىغانلىقىنى بىلدۈردى.
ئىران دىنىي رەھبىرى مۇجتەبا خامەنېينىڭ مەسلىھەتچىسى ئەلى ئەكبەر ۋېلايىتى ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، ئۇرۇشنىڭ نەتىجىسىنىڭ رەقىبلىرىنىڭ «خىيالىي تەسەۋۋۇرلىرى» تەرىپىدىن ئەمەس، بەلكى ئىراننىڭ ئىستراتېگىيەسى تەرىپىدىن بەلگىلىنىدىغانلىقىنى ئېيتتى.
ئەلى ئەكبەر ۋېلايىتى: «ھورمۇز بوغۇزى دۇنياغا ئوچۇق، ئەمما ئىران خەلقىنىڭ دۈشمەنلىرى ۋە ئۇلارنىڭ رايوندىكى بازىلىرى ئۈچۈن تاقاق پېتى قالىدۇ» دېدى.
ئۇرۇشنىڭ ئىراننىڭ شەرتلىرىگە ئاساسەن ئاخىرلىشىدىغانلىقىنىمۇ تىلغا ئالغان ۋېلايىتى: «ئۇرۇش تاجاۋۇزچىلارنىڭ مەستلىكى ۋە خىيالىي تەسەۋۋۇرلىرى بىلەن ئەمەس، ئىراننىڭ ئىستراتېگىيەسى ۋە ھەق – ھوقۇقلىرىغا ئاساسەن ئاخىرلىشىدۇ» دېدى.
بۇ باياناتلار ئامېرىكا پىرېزىدېنتى دونالد ترامپنىڭ ئاقسارايدىن تارقىتىلغان تېلېۋىزىيە نۇتىقىدا، ئىراننىڭ «ناھايىتى ئاز» باشقۇرۇلىدىغان بومبا قويۇپ بېرىش سۇپىسى قالغانلىقىنى ھەمدە باشقۇرۇلىدىغان بومبا ۋە ئۇچقۇچىسىز ھاۋا ئاپپاراتى قويۇپ بېرىش ئىقتىدارىنىڭ «تىراگېدىيەلىك شەكىلدە چەكلەنگەنلىكىنى» ئېيتقىنىدىن بىرنەچچە سائەت كېيىن ئېلان قىلىندى.
ترامپ ئۇرۇشنىڭ يەنە ئىككى-ئۈچ ھەپتە داۋاملىشىشىنى مۆلچەرلەيدىغانلىقىنى، ئەمما توقۇنۇشنىڭ «ئاخىرىلىشىش» قا يېقىنلاشقانلىقىغا ئىشىنىدىغانلىقىنى بىلدۈردى.
تېھران ئاسىيا دۆلەتلىرىگە ئېنېرگىيە يەتكۈزۈشتىكى ناھايىتى زور ئەھمىيەتكە ئىگە سۇ يولى بولغان ھورمۇز بوغۇزىنىڭ كونتروللۇقىنى قولدىن بەرمەي، بۇ يەردىن ئۆزى «دوست دۆلەتلەر» دەپ ئاتىغان دۆلەتلەرنىڭ پاراخوتلىرىنىڭ ئۆتۈشىگە يول قويماقتا.
رايوندىكى جىددىيچىلىك ئىسرائىلىيە بىلەن ئامېرىكا قوشما ئىشتاتلىرى 28-فېۋرالدا ئىرانغا قارشى ئورتاق ھۇجۇم باشلىغاندىن بۇيان تېخىمۇ كەسكىنلىشىپ كەتتى. بۇ ھۇجۇملاردا ئەينى ۋاقىتتىكى دىنىي رەھبەر ئەلى خامەنېينىمۇ ئۆز ئىچىگە ئالغان 1 مىڭ 340 تىن ئارتۇق كىشى ھاياتىدىن ئايرىلدى.
ئىران بولسا ئىسرائىلىيە، ئىيوردانىيە، ئىراق ۋە ئامېرىكا ھەربىي كۈچلىرى تۇرۇشلۇق پارىس قولتۇقى دۆلەتلىرىنى نىشان قىلغان ئۇچقۇچىسىز ھاۋا ئاپپاراتى ۋە باشقۇرۇلىدىغان بومبا ھۇجۇملىرى بىلەن جاۋاب قايتۇردى. بۇ ھۇجۇملار جانغا زامىن بولۇش ۋە ئۇل ئەسلىھەلەرنىڭ ۋەيران بولۇشىنى كەلتۈرۈپ چىقىرىش بىلەن بىرگە، دۇنياۋى پۇل-مۇئامىلە بازارلىرى ۋە ئاۋىياتسىيە ئىشلىرىغا تەسىر كۆرسەتتى.
