ئەردوغان بىلەن ئەل سانى بىر-بىرىگە تەزىيە بىلدۈردى
ئەردوغان بىلەن ئەل سانى تىك ئۇچار چۈشۈپ كېتىش ۋەقەسى مۇناسىۋىتى بىلەن بىر-بىرىگە تەزىيە بىلدۈردى، رايون خاراكتېرلىك مەسىلىلەرنى مۇزاكىرە قىلدى.
قاتار ئەمىرى شەيخ تەمىم ئەل سانى ئەردوغانغا «رايوندىكى ئۇرۇشنى توختىتىش» ئۈچۈن كۆرسەتكەن تىرىشچانلىقلىرىغا رەھمەت ئېيتتى. سۈرەت: ئانادولۇ ئاگېنتلىقى. / AA
تۈركىيە جۇمھۇر رەئىسى رەجەپ تاييىپ ئەردوغان بىلەن قاتار ئەمىرى شەيخ تەمىم بىن ھەمەد ئەل سانى تېلېفوندا كۆرۈشۈپ، تىك ئۇچار چۈشۈپ كېتىش ۋەقەسى مۇناسىۋىتى بىلەن بىر-بىرىگە تەزىيە بىلدۈردى.
تۈركىيە جۇمھۇر رەئىسلىك مەھكىمىسى ئۇچۇر-ئالاقە ئىدارىسىنىڭ بىلدۈرۈشىچە، تۈركىيە جۇمھۇر رەئىسى رەجەپ تاييىپ ئەردوغان بىلەن قاتار ئەمىرى شەيخ تەمىم بىن ھەمەد ئەل سانى تېلېفوندا كۆرۈشۈپ، تىك ئۇچار چۈشۈپ كېتىش ۋەقەسى مۇناسىۋىتى بىلەن بىر-بىرىگە تەزىيە بىلدۈرگەن.
باياناتتا دېيىلىشىچە، ئىككى رەھبەر يەنە رايوندىكى ئەڭ يېڭى ئۆزگىرىشلەر ئۈستىدىمۇ ئۆزئارا پىكىر ئالماشتۇرغان.
ئەردوغان بىلەن شەيخ تەمىم «قاتار-تۈركىيە بىرلەشمە قىسىم قوماندانلىق مەركىزى» دە يۈز بەرگەن تىك ئۇچار چۈشۈپ كېتىش ۋەقەسى مۇناسىۋىتى بىلەن ئۆزئارا تەزىيە ئالماشتۇرغان.
تۈركىيە دۆلەت مۇداپىئە مىنىستىرلىقىنىڭ خەۋەر قىلىشىچە، ۋەقە جۈمە (2026-يىلى 20-مارت) كۈنى كەچتە يۈز بەرگەن بولۇپ، قاتار قوراللىق قىسىملىرىنىڭ بىر تىك ئۇچارى قاتار-تۈركىيە بىرلەشمە قىسىم قوماندانلىق مەركىزىنىڭ مەشىق ئۇچۇشى جەريانىدا تېخنىكىلىق كاشىلا سەۋەبىدىن دېڭىزغا چۈشۈپ كەتكەن.
بۇ ۋەقەدە 7 كىشى قازا قىلغان. ئۇلارنىڭ ئىچىدە قاتار قوراللىق قىسىملىرىنىڭ تۆت خادىمى، تۈركىيە قوراللىق قىسىملىرىنىڭ بىر خادىمى ۋە ئاسەلسان (ASELSAN) مۇداپىئە شىركىتىنىڭ ئىككى تېخنىكى بار ئىكەن.
سۆھبەت جەريانىدا، شەيخ تەمىم ئەردوغاننىڭ «رايوندىكى ئۇرۇشنى توختىتىش» ئۈچۈن كۆرسەتكەن تىرىشچانلىقلىرىغا رەھمەت ئېيتقان.
باياناتتا يەنە، ئۇنىڭ «ئىككى دۆلەت خىزمەت گۇرۇپپىلىرىنىڭ داۋاملىق ئۈزلۈكسىز ئالاقىدە بولىدىغانلىقى» نى ئېيتقانلىقى قەيت قىلىنغان.