ترامپ ئۇكرائىنا بىلەن رۇسىيەنىڭ تىنچلىق سۆھبەتلىرىنىڭ ھازىرقى ئەھۋالىدىن «ئىنتايىن نارازى» ئىكەن

ئاقساراي تەرەپنىڭ بىلدۈرۈشىچە، ئامېرىكا پىرېزىدېنتى دونالد ترامپ بۇ ھەپتە ئاخىرى ياۋروپادا ئۆتكۈزۈلىدىغان ئۇكرائىنا سۆھبەتلىرىگە، پەقەت ھەقىقىي بىر تىنچلىق كېلىشىمى ئىمزالاش ئۈمىدى بولغاندىلا ۋەكىل ئەۋەتىدىكەن.

ترامپنىڭ ئاخبارات كاتىپى كارولىن لېۋىت پەيشەنبە كۈنى مۇخبىرلارغا قىلغان سۆزىدە، ترامپنىڭ ئۇرۇشنى ئاخىرلاشتۇرۇشقا ھېچقانداق پەيدىسى يوق نۇرغۇنلىغان يىغىنلاردىن تويغانلىقىنى ئېيتتى.

لېۋىت: «پىرېزىدېنت بۇ ئۇرۇشنىڭ ھەر ئىككى تەرىپىدىن قاتتىق ئۈمىدسىزلەندى ۋە پەقەت يىغىن ئۆتكۈزۈلگەن بولسۇن دەپلا ئورۇنلاشتۇرۇلغان كۆرۈشۈشلەردىن بىزار بولدى» دېدى.

كىيېۋ ھازىر ئاقساراينىڭ تېزدىن تىنچلىق ئورنىتىش بېسىمىغا دۇچ كېلىۋاتقان بولسىمۇ، ئۆتكەن ئايدا ئوتتۇرىغا قويۇلغان ۋە نۇرغۇن كىشىلەر تەرىپىدىن موسكۋاغا پايدىلىق دەپ قارالغان ئامېرىكا پىلانىغا قارشى تۇرماقتا.

ترامپ چارشەنبە كۈنى فىرانسىيە، گېرمانىيە ۋە ئەنگلىيە رەھبەرلىرى بىلەن تېلېفوندا كۆرۈشكەنلىكىنى، بۇ ھەپتە ئاخىرى ياۋروپادا ئۆتكۈزۈلۈشى پىلانلانغان يىغىنلارنى ئۆز ئىچىگە ئالغان بىر قاتار مەسىلەر توغرىسىدا ئۇلار بىلەن قىزغىن مۇنازىرە ئېلىپ بارغانلىقىنى تىلغا ئالدى.

لېۋىت سۆزىنى داۋاملاشتۇرۇپ: «پىرېزىدېنت بۇ ئۇرۇشنىڭ ئاخىرلىشىشى ئۈچۈن ئەمەلىي قەدەم تاشلىنىشىنى خالايدۇ. ھۆكۈمىتىمىز يېقىنقى بىرنەچچە ھەپتە ئىچىدىلا رۇسلار، ئۇكرائىنالىقلار ۋە ياۋروپالىقلار بىلەن 30 سائەتتىن ئارتۇق سۆھبەت ئۆتكۈزدى. بۇ ھەپتە ئاخىرىدىكى يىغىنلاردا نېمە بولىدىغانلىقىنى كۆرىمىز؛ دىققىتىڭلار بىزدە بولسۇن» دېدى.

سۆھبەت ھارغىنلىقى

ترامپنىڭ ئېيتىشىچە، ئەگەر رۇسىيەنىڭ شەرقىي ياۋروپادىكى قوشنىسىغا قاراتقان ئۇرۇشىنى ئاخىرلاشتۇرۇش پىلانى بويىچە كېلىشىم ھاسىل قىلىشتا «ياخشى بىر ئىمكانىيەت» بار دەپ قارالسا، ئامېرىكا شەنبە كۈنى ياۋروپادىكى يىغىنغا ھەيئەت ئەۋەتىدىكەن.

ترامپ: «يىغىنغا قاتنىشىش-قاتناشماسلىقىمىزنى ۋەزىيەتكە قاراپ بەلگىلەيمىز. ئۇلار مېنىڭ قاتنىشىشىمنى، بىزنىڭ ئۇ يەردە بولۇشىمىزنى خالايدۇ. ئەگەر ياخشى بىر ئۈمىد بار دەپ ئويلىساق، شەنبە كۈنىدىكى يىغىنغا قاتنىشىمىز؛ ۋاقىتنى بىھۇدە ئىسراپ قىلىشنى خالىمايمىز. بىز ۋەزىيەتنى سەلبىي دەپ قارايمىز ۋە بۇنىڭ ھەل بولۇشىنى، نۇرغۇن ھاياتنىڭ ساقلاپ قېلىنىشىنى خالايمىز» دېدى.

ترامپ سۆھبەتنىڭ قەيەردە ئۆتكۈزۈلىدىغانلىقىنى ئېنىق ئېيتمىغان بولسىمۇ، «Axios» خەۋەرلەر تورى يىغىننىڭ پارىژدا ئۆتكۈزۈلىدىغانلىقىنى ۋە ھەرقايسى دۆلەتلەرنىڭ دۆلەت بىخەتەرلىك مەسلىھەتچىلىرىنىڭ قاتنىشىدىغانلىقىنى خەۋەر قىلدى.