گوللاندىيەنىڭ پايتەختى ئامستېردامدا غەززەنى قوللاش مەقسىتىدە ئۆتكۈزۈلگەن 4- قېتىملىق «قىزىل سىزىق» نامايىشىغا 200 مىڭدىن ئارتۇق كىشى قاتنىشىپ، ھۆكۈمەتنىڭ ئىسرائىلىيەپەرەس سىياسىتىگە نارازىلىق بىلدۈردى.
نۇرغۇنلىغان خەلقئارالىق ۋە يەرلىك ئاممىۋى تەشكىلاتلارنىڭ بىرلىكتە تەشكىللىشى بىلەن ئۆتكۈزۈلگەن نامايىش مۇزېيلار مەيدانىدا باشلاندى. قىزىل سىزىققا سىمۋول قىلىش مەقسىتىدە قىزىل رەڭلىك كىيىملەرنى كىيگەن نامايىشچىلار، ئامستېردام كوچىلىرىدا پىيادە ماڭغاندىن كېيىن يەنە مۇزېيلار مەيدانىغا قايتىپ كەلدى.
پائالىيەتكە خەلقئارالىق ئاممىۋى تەشكىلاتلارنىڭ گوللاندىيە شۆبىلىرىنىمۇ ئۆز ئىچىگە ئالغان 130 دىن ئارتۇق تەشكىلات قاتناشتى. تەشكىللىگۈچىلەر نامايىشقا 200 مىڭدىن كۆپ كىشىنىڭ قاتناشقانلىقىنى ئۇقتۇردى.
نامايىشتا سۆزلەنگەن نۇتۇقلاردا، گوللاندىيە ھۆكۈمىتى ئىسرائىلىيەنىڭ غەززەدىكى قىلمىشلىرى ئالدىدا سۈكۈت قىلىش بىلەن ئەيىبلەندى. نامايىشچىلار ھۆكۈمەتتىن ئىسرائىلىيەگە قارىتا تېخىمۇ قاتتىق سىياسەت يۈرگۈزۈشنى، ئۇنىڭغا بېرىلىۋاتقان ھەربىي ۋە سىياسىي قوللاشنى توختىتىشنى ھەمدە ئىسرائىلىيەگە ئېمبارگو يۈرگۈزۈشنى تەلەپ قىلدى.
«ئىرقىي قىرغىنچىلىقنى توختات» دەپ يېزىلغان پىلاكاتنى كۆتۈرۈپ ماڭغان نامايىشچىلار «تىنچلىق پىلانى ئەمەس، ئىمپېرىيالىزم»، «ئىسرائىلىيەنى بايقۇت قىل»، «ئىسرائىلىيەنى دەرھال توختات» ۋە «فىلوتتىن قولۇڭنى تارت» دەپ يېزىلغان ۋىۋىسكىلارنى كۆتۈرۈۋالدى.
نامايىشچىلار يەنە «ھۆكۈمەت نومۇس قىل، قولۇڭ قانغا بويالغان»، «ئەركىن پەلەستىن»، «ئىشغالىيەت ئاستىدىكى زېمىنلاردا تىنچلىق بولمايدۇ»، «ئىرقىي قىرغىنچىلىقنى توختات» ۋە «بالىلارنى ئۆلتۈرۈشنى توختات» دەپ شۇئار توۋلىدى.
مەمۇرىي پايتەخت لاھېيدا «قىزىل سىزىق» نامى ئاستىدا 2025-يىلى 18-مايدا ئۆتكۈزۈلگەن 1-قېتىملىق نامايىشقا تەخمىنەن 100 مىڭ، 2025-يىلى 15-ئىيۇندىكى 2-قېتىملىق نامايىشقا تەخمىنەن 150 مىڭ كىشى قاتناشقان ئىدى. 2025-يىلى ئۆكتەبىردە ئامستېردامدا ئۆتكۈزۈلگەن 3-قېتىملىق نامايىشقا بولسا تەخمىنەن 250 مىڭ كىشى قاتناشقان ئىدى.
