تۈركىيەنىڭ تۇنجى دالا تەبىئىي گاز قىدىرىپ تەكشۈرۈش - ئىشلەپچىقىرىش پاراخوتى «ئوسمان غازى» شەنبە كۈنى قارادېڭىز قىرغىقىدىكى فىليوس پورتىغا يېتىپ باردى.
بۇ غايەت زور پاراخوت ئىستانبۇلنىڭ فەتھى قىلىنىشىنىڭ 572-يىللىق خاتىرە كۈنى بولغان 29-ماي كۈنى، ئىستانبۇلدىكى جۇمھۇر رەئىسلىك مەھكىمىسىنىڭ دولماباھچە سارىيىدىكى ئىشخانىسىدىن جۇمھۇر رەئىس رەجەپ تاييىپ ئەردوغان، تۈركىيە ئېنېرگىيە ۋە تەبىئىي بايلىقلار مىنىستىرىنىڭ قاتنىشىشى بىلەن ئۆتكۈزۈلگەن مۇراسىم ئارقىلىق يولغا سېلىپ قويۇلغان، كېيىنچە ئىستانبۇل بوغۇزىدىن ئۆتكەنىدى.
كۈندىلىك ئەڭ يۇقىرى 10 مىليون 500 مىڭ كۇب مېتىر تەبىئىي گاز ئىشلەپچىقىرىش ۋە 10 مىليون كۇب مېتىر يۆتكەش ئىقتىدارىغا ئىگە بۇ پاراخوت، قارادېڭىزدىكى تەبىئىي گاز ئىشلەپچىقىرىش مىقدارىنى كۈنىگە 20 مىليون كۇب مېتىرغا يەتكۈزىدۇ.
تۈركىيەدىكى تەخمىنەن 8 مىليون ئائىلىنىڭ تەبىئىي گاز ئېھتىياجىنى قاندۇرۇشى كۈتۈلۈۋاتقان بۇ پاراخوت، ئۇدا 20 يىل بۇ ساھەدە پائالىيەت ئېلىپ بارىدۇ.
140 خادىم ئىشلىيەلەيدىغان بۇ پاراخوتنىڭ ئۇزۇنلۇقى 298.5 مېتىر، كەڭلىكى 56 مېتىر ۋە چوڭقۇرلۇقى 29.5 مېتىر كېلىدۇ. بۇ پاراخوتنىڭ 2026-يىلىنىڭ ئوتتۇرىلىرى ئىشقا كىرىشتۈرۈلۈشى مۆلچەرلەنمەكتە.
