ئامېرىكا پىرېزىدېنتى دونالد ترامپ، ئۇكرائىنا ھۆكۈمىتىنىڭ رۇسىيە بىلەن بولغان ئۇرۇشنى ئاخىرلاشتۇرۇش تىرىشچانلىقلىرىغا «نۆل مىننەتدارلىق» كۆرسەتكەنلىكىنى ۋە توقۇنۇش سەۋەبىدىن ئۆزىدىن بۇرۇنقى رەھبەرنى ئەيىبلىگەنلىكىنى ئېيتتى.
ترامپ يەكشەنبە كۈنى ئىجتىمائىي تاراتقۇ سۇپىسى Truth Social دا: «ئۇكرائىنا "رەھبەرلىكى" تىرىشچانلىقلىرىمىزغا قارىتا نۆل مىننەتدارلىق كۆرسەتتى ۋە ياۋروپا تېخىچە رۇسىيەدىن نېفىت سېتىۋېلىشنى داۋاملاشتۇرۇۋاتىدۇ» دەپ يازدى.
ئەينى چاغدا ھەم ئامېرىكادا، ھەم ئۇكرائىنادا كۈچلۈك ۋە توغرا رەھبەرلىك بولغان بولسا ئىدى، ئۇرۇشنىڭ ھەرگىز چىقمايدىغانلىقىنى ئىلگىرى سۈرگەن ترامپ، ئۇرۇشنىڭ «مۈگىدەك جو بايدىن ھۆكۈمىتى» مەزگىلىدە پارتلىغانلىقىنى ئەسكەرتتى.
2020-يىلدىكى سايلامنىڭ «ھىيلە ئىشلىتىلگەن ۋە ئوغرىلانغان» سايلام ئىكەنلىكىنى ئىلگىرى سۈرۈپ، ئەگەر بۇ ئىش يۈز بەرمىگەن بولسا ئىدى، رۇسىيە پىرېزىدېنتى ۋىلادىمىر پۇتىننىڭ «ھەرگىز ھۇجۇم قىلمايدىغانلىقىنى» ئوتتۇرىغا قويدى.
ترامپ: «ھەرگىز بولماسلىقى كېرەك بولغان بىر ئۇرۇشقا ۋارىسلىق قىلدىم. بۇ ئۇرۇش ھەممەيلەن ئۈچۈن زىيان تارتىدىغان بىر توقۇنۇشتۇر، بولۇپمۇ بىھۇدە يەرگە ئۆلگەن مىليونلىغان ئىنسانلار ئۈچۈن» دېدى.
ئامېرىكانىڭ تىنچلىق پىلانى
بۇ باياناتلار، يۇقىرى دەرىجىلىك ئامېرىكا ۋە ئۇكرائىنا ئەمەلدارلىرىنىڭ جەنۋەدە 28 ماددىلىق بىر ئامېرىكا تىنچلىق پىلانى ئۈستىدە سۆھبەتلەر ئېلىپ بېرىۋاتقان پەيتتە ئېلان قىلىندى.
لايىھە پىلانى ئۇكرائىنانىڭ رۇسىيەگە نۆۋەتتە ئىشغال ئاستىدىكىدىن تېخىمۇ كۆپ تۇپراق قالدۇرۇشى، ئارمىيەسىنىڭ كۆلىمىنى چەكلىشى ۋە شىمالىي ئاتلانتىك ئەھدى تەشكىلاتى (NATO) ئەزالىقىدىن رەسمىي ۋاز كېچىشى قاتارلىق ماددىلارنى ئۆز ئىچىگە ئالىدۇ.
ترامپ بۇ پىلاننىڭ «ئاخىرقى تەكلىپى» بولمايدىغانلىقىنى ئەسكەرتىپ، ئۇكرائىنا پىرېزىدېنتى ۋولودىمىر زېلېنسكىيغا جاۋاب بېرىش ئۈچۈن پەيشەنبە كۈنىگىچە ۋاقىت بەردى.
زېلېنسكىي، ترامپنىڭ پىلانى ئېلان قىلىنغاندىن كېيىن ھەمبەھرىلىگەن بىر سىنلىق ئۇچۇردا، «غۇرۇرىمىزنى يوقىتىش بىلەن مۇھىم بىر شېرىكنى يوقىتىش خەۋپى ئوتتۇرىسىدىكى بىر تاللاش»قا دۇچ كەلگەنلىكىنى ئېيتقان ئىدى.
شەنبە كۈنى، توققۇز ياۋروپا دۆلىتىنىڭ رەھبەرلىرى بىلەن ياپونىيە، كانادا ۋە ياۋروپا ئىتتىپاقى ئەمەلدارلىرى، ئۇكرائىنا قوراللىق كۈچلىرىگە قويۇلغان تەكلىپ خاراكتېرلىك چەكلىمىلەردىن ئەندىشە قىلىۋاتقانلىقىنى بىلدۈرۈپ، بۇنىڭ «ئۇكرائىنانى كەلگۈسىدىكى ھۇجۇملارغا قارشى قوغدىنىشسىز ھالغا چۈشۈرۈپ قويىدىغانلىقى» توغرىسىدا ئاگاھلاندۇردى.
يەنە بىر تەرەپتىن مۇتەخەسسىسلەر، رۇس نېفىتىنى تېخىچە ئىمپورت قىلىۋاتقانلارنىڭ پەقەت ياۋروپا ئىتتىپاقى ئىچىدىكى ئاشكارا رۇسىيە تەرەپدارى ئىككى دۆلەت بولغان ۋېنگىرىيە ۋە سلوۋاكىيە ئىكەنلىكىنى تەكىتلەپ، ترامپنىڭ باياناتىدا نىشاننى «ياۋروپا» دەپ كېڭەيتىشىدە قەستەنلىك بارلىقىنى ۋە بۇ خىل پوزىتسىيەنىڭ ئۇنىڭ تەنقىدىنى پاكىتلاردىن بەكرەك سىياسىي بىر بۇرمىلاش ئاساسىغا قۇرغانلىقىنىڭ ئىپادىسى ئىكەنلىكىنى بىلدۈرمەكتە.
