تۈركىيەنىڭ دۆلەتلىك پۇتبول كوماندىسى 2026-يىللىق خەلقئارا پۇتبولچىلار بىرلەشمىسىنىڭ دۇنيا لوڭقىسىنى تالىشىش ياۋروپا رايونى تاللاش مۇسابىقىسىنىڭ قوشۇمچە شاللاش يېرىم ھەل قىلغۇچ مۇسابىقىسىدە رۇمىنىيەنى 1-0 نەتىجە بىلەن مەغلۇپ قىلىپ، شاللاش بويىچە ھەل قىلغۇچ مۇسابىقىسىگە كۆتۈرۈلۈشكە مۇۋەپپەق بولدى.
تۈركىيە ئاردا گۈلەرنىڭ ئۇنتۇلماس لەھزىلىرىدىن كېيىن فەردى قادى ئوغلۇنىڭ ئىككىنچى مەيداندىكى توپى بىلەن قوشۇمچە شاللاش يېرىم ھەل قىلغۇچ مۇسابىقىسىدە رۇمىنىيەنى 1-0 نەتىجە بىلەن يېڭىپ دۇنيا لوڭقىسىغا قايتىشقا پەقەت بىر مەيدان مۇسابىقە قالغان جىددىي پەيتكە يېتىپ كەلدى.
بەشىكتاش باغچىسى (Beşiktaş Park) تەنتەربىيە مەيدانىدا ئۆتكۈزۈلگەن مەزكۇر مۇسابىقىدە تەڭپۇڭلۇق 53-مىنۇتتا بۇزۇلدى؛ رېئال مادرىد ئوتتۇرا مەيدان ماھىرى ئاردا گۈلەر مۇداپىئەنى يېرىپ ئۆتكەن ئاجايىپ بىر پاس بىلەن فەردى قادى ئوغلۇغا پۇرسەت ياراتتى. قادى ئوغلو توپنى كونترول قىلىپ سوغۇققانلىق بىلەن زەربە بېرىپ تۈركىيەنى ئۈستۈنلۈككە ئىگە قىلدى.
گۈلەر TV8 قانىلىغا بەرگەن باياناتىدا، توپ كىرگۈزۈش پىلانىنىڭ دەم ئېلىش ۋاقتىدا كىيىم ئالماشتۇرۇش ئۆيىدە سۆزلىشىلگەنلىكىنى ھەمدە پىلاننىڭ ئۆزى توپنى ئېلىش ۋە فەردىنىڭ جازا رايونىغا قاراپ يۈگۈرۈشى ئۈستىگە قۇرۇلغانلىقىنى بايان قىلىپ: «ئىككىنچى مەيدان باشلىنىشتىن بۇرۇنقى دەم ئېلىشتا توپ كىرگۈزۈش ھەققىدە پاراڭلاشتۇق. مەن توپنى ئالاتتىم فەردى جازا رايونىغا قاراپ يۈگۈرەتتى. پۈتۈنلەي پىلانلىغىنىمىزدەك بولدى» دېدى.
تۈركىيە ئۈستۈنلۈكنى ئىگىلىگەندىن كېيىن ئۆزىگە بولغان ئىشەنچى ئاشتى ۋە ئارقىدىنلا جۇۋېنتۇس ماھىرى كەنان يىلدىزنىڭ سول قاناتتىن ئىچكىرىگە كىرىپ قىلغان ئاجايىپ ئەگمە زەربىسى بىلەن پەرقنى ئىككىگە چىقىرىش پۇرسىتىگە ئىنتايىن يېقىنلاشتى؛ ئەمما توپ كول تۈۋرۈكىگە تېگىپ قايتىپ كەلدى.
رۇمىنىيە نەتىجىنى تەڭلەشتۈرۈش ئۈچۈن بېسىم قىلغان بولسىمۇ تۈركىيە مۇداپىئەنى قوغداپ نومۇر ئۈستۈنلۈكىنى ساقلاپ قالدى ۋە مۇسابىقىدە غەلىبە قىلدى.
بۇ غەلىبە تۈركىيەنى 31-مارتتىكى قوشۇمچە شاللاش بويىچە ھەل قىلغۇچ مۇسابىقىگە قاتنىشىش پۇرسىتىگە ئىگە قىلدى؛ تۈركىيە بۇ يەردە سلوۋاكىيە ياكى كوسوۋو بىلەن 2026-يىللىق دۇنيا لوڭقىسىغا قاتنىشىش ھوقۇقىنى قولغا كەلتۈرۈش ئۈچۈن مۇسابىقىگە چۈشىدۇ.
