ئامېرىكا قوشما ئىشتاتلىرى تاشقى ئىشلار مىنىستىرلىقىنىڭ بىلدۈرۈشىچە، ئانتونى بلىنكېن ئىيوردانىيەنىڭ ئەقەبە شەھىرىدىكى ئۇچرىشىشلىرىنى تاماملىغاندىن كېيىن، بۈگۈن كەچتە پايتەخت ئەنقەرەگە يېتىپ كېلىدىكەن.
باياناتتا، بىلىنكېننىڭ كۈنتەرتىپىنى يەكشەنبە كۈنى سۈرىيەدە بەششار ئەسەد ھاكىمىيىتىنىڭ ئاغدۇرۇلۇشىدىن كېيىن باشلانغان ئۆتكۈنچى باسقۇچ خىزمەتلىرى ھەمدە ئۇدا 14 ئايدىن بۇيانقى ئىسرائىلىيەنىڭ ھۇجۇملىرى ئاستىدىكى غەززەدە ئۇرۇش توختىتىش كېلىشىمىگە دائىر تېمىلار تەشكىل قىلىدىغانلىقى تەكىتلىنىپ مۇنداق دېيىلدى:
«مىنىستىر بىلىنكېن ناتونىڭ قىممەتلىك ئىتتىپاقدىشى بولغان تۈركىيەدە ئالىي دەرىجىلىك رەھبەرلەر بىلەن كۆرۈشىدۇ ۋە تېررورلۇق تەشكىلاتلىرىغا قارشى كۈرەشتىن رايوننىڭ مۇقىملىقىغىچە بولغان ئورتاق مۇھىم مەسىلىلەر دائىرىسىدە داۋاملىشىۋاتقان ئىككى تەرەپلىك ھەمكارلىقلار ھەققىدە مۇزاكىرە ئېلىپ بارىدۇ.
بىلىنكېن تۈركىيە ۋە ئىيوردانىيە زىيارەتلىرىدە <ئامېرىكانىڭ سۈرىيە ئۆتكۈنچى ھۆكۈمىتىنى جاۋابكارلىققا تارتالايدىغان ۋە خەلققە ۋەكىللىك قىلالايدىغان شەكىلدە قۇرۇپ چىقىش خىزمەتلىرىنى قوللاش> پوزىتسىيەسىنى تەكرارلاش بىلەن بىرگە، بۇ ئۆتكۈنچى باسقۇچتا ئامېرىكانىڭ سۈرىيەنىڭ قوشنىلىرىنى داۋاملىق قوللايدىغانلىقىنى تەكىتلەيدۇ، شۇنداقلا رايوندىكى يۇرت-ماكانلىرىدىن ئايرىلىپ قالغان سۈرىيەلىكلەرنىڭ ئېھتىياجلىرىنى قامداشقا دائىر مەسىلىلەر ھەققىدە سۆھبەت ئۆتكۈزىدۇ.
بلىنكېننىڭ يەنە بىر مۇھىم كۈن تەرتىپى، غەززەدە ئۇرۇش توختىتىش مۇساپىسى ۋە بۇ دائىرىدە تۇتقۇنلارنى قويۇپ بېرىش ھەمدە غەززەگە تېخىمۇ كۆپ ئىنسانپەرۋەرلىك ياردەم بۇيۇملىرىنى يەتكۈزۈپ بېرىش بولىدۇ.»
