تۈركىيە تاشقى ئىشلار مىنىستىرلىقى شىمالىي قىبرىس تۈرك جۇمھۇرىيىتىنىڭ گىرنە پورتىدىن مەرسىندىكى تاشئۇجۇ پورتىغا قاراپ يولغا چىققان يولۇچىلار كېمىسىنىڭ ئۆرۈلۈپ كېتىشى نەتىجىسىدە يۈز بەرگەن تالاپەتلەردىن چوڭقۇر قايغۇرغانلىقىنى بىلدۈردى.

مىنىستىرلىق تەرىپىدىن ئېلان قىلىنغان يازما باياناتتا: «بۈگۈن شىمالىي قىبرىس تۈرك جۇمھۇرىيىتىنىڭ گىرنە پورتىدىن مەرسىن تاشئۇجۇغا قاراپ يولغا چىققان بىر يولۇچىلار كېمىسىنىڭ ئۆرۈلۈپ كېتىشى نەتىجىسىدە يۈز بەرگەن ۋەقەدە ھاياتىدىن ئايرىلغانلارنىڭ بارلىقىدىن چوڭقۇر قايغۇرىمىز. قازادا ۋاپات بولغانلارغا ئاللاھتىن رەھمەت تىلەيمىز، ئۇلارنىڭ يېقىنلىرىغا، مىللىتىمىزگە ۋە شىمالىي قىبرىس تۈرك خەلقىگە تەزىيە بىلدۈرىمىز» دېيىلدى.

باياناتتا يەنە، شىمالىي قىبرىس تۈرك جۇمھۇرىيىتى دائىرىلىرى تەرىپىدىن ئېلىپ بېرىلىۋاتقان قويۇق ئىزدەش-قۇتقۇزۇش خىزمەتلىرىگە تۈركىيە تەرەپنىڭ تولۇق ياردەم بېرىۋاتقانلىقى، تۈركىيەدىن ئىككى تىك ئۇچار ئايروپىلان، ئىككى كېمە ۋە بىر غەۋۋاسلار ئەترىتى بىلەن دېڭىز ئارمىيەسى قوماندانلىق ئىشتابىنىڭ ئىككى ئۇرۇش پاراخوتىنىڭ قۇتقۇزۇش پائالىيەتلىرىگە قاتناشقانلىقى بىلدۈرۈلدى.

ۋەقە ھەققىدە تەپسىلات:

گىرنە پورتى بىلەن مەرسىننىڭ تاشئۇجۇ پورتى ئارىسىدا قاتنايدىغان «Filo Jet» ناملىق تېز سۈرئەتلىك يولۇچىلار كېمىسى، چۈش تەرەپلەردە گىرنەدىن يولغا چىققاندىن كېيىنلا ئالدى تەرىپىدىن سۇ كىرىشكە باشلىغان. كېمە گىرنە پورتىغا قايتىشقا تىرىشىۋاتقان پەيتتە ئۆرۈلۈپ كەتكەن. كېمىدە 259 يولۇچى ۋە 8 كېمە خادىمىنى ئۆز ئىچىگە ئالغان جەمئىي 267 كىشىنىڭ بارلىقى، بۇلاردىن 241 كىشىنىڭ قۇتقۇزۇۋېلىنغانلىقى، 8 كىشىنىڭ ھاياتىدىن ئايرىلغانلىقى ئېنىقلاندى. نۆۋەتتە يەنە 18 كىشىنى ئىزدەش خىزمىتى داۋاملاشماقتا.