ترامپ ئامېرىكا كۆچمەنلەر ۋە تاموژنا ئىدارىسىنىڭ بىر ئايالنى ئۆلتۈرۈشىنى «قانۇنىي قوغدىنىش» دېدى

مىننېئاپولىستا ئامېرىكا كۆچمەنلەر ۋە تاموژنا ئىدارىسىنىڭ بىر قېتىملىق ھەرىكىتى جەريانىدا بىر ئايالنىڭ ئۆلتۈرۈلۈشىدىن كېيىن، فېدېراتسىيە ۋە يەرلىك دائىرىلەر بىر-بىرىگە زىت باياناتلارنى ئېلان قىلدى.

ئامېرىكا پىرېزىدېنتى دونالد ترامپ مىننېئاپولىستا بىر ئايالنىڭ كۆچمەنلەر ۋە تاموژنا ئىدارىسى خادىمى تەرىپىدىن ئۆلتۈرۈلۈشىنىڭ قانۇنىي قوغدىنىشتەك كۆرۈنىدىغانلىقىنى جاكارلىدى، ئەمما يەرلىك ۋە ئىشتات دائىرىلىرى بۇ باياناتنى رەت قىلىپ، تەكشۈرۈش ئېلىپ بېرىش چاقىرىقىدا بولدى.

ترامپ ئاممىۋى ئورتاقلىشىش تور بېتى Truth Social سەھىپىسىدە ئېلان قىلغان باياناتىدا، «ئاپتوموبىل ھەيدەۋاتقان ئايالنىڭ ئامېرىكا كۆچمەنلەر ۋە تاموژنا ئىدارىسى ئەمەلدارىنىڭ ئۈستىدىن زورلۇق بىلەن، قەستەن ۋە ۋەھشىيلەرچە ئۆتۈپ كەتكەنلىكىنى ۋە خادىمنىڭ ئۆزىنى قوغداش ئۈچۈن ئوق چىقارغاندەك كۆرۈنىدىغانلىقىنى» بىلدۈردى.

فېدېراتسىيە دائىرىلىرى ۋەقەنىڭ چارشەنبە كۈنى بىر تەكشۈرۈش ھەرىكىتى جەريانىدا يۈز بەرگەنلىكىنى ئۇقتۇردى.

ئىچكى بىخەتەرلىك ئىشلىرى مىنىستىرلىقى 37 ياشلىق ئايالنىڭ ئاپتوموبىلى بىلەن ئەمەلدارلارنى سوقۇۋەتمەكچى بولغانلىقىنى، بۇنىڭ بىلەن بىر خادىمنىڭ ئوق چىقارغانلىقىنى قەيت قىلدى.

ئىچكى بىخەتەرلىك ئىشلىرى مىنىستىرى كرىستى نوئېم ئامېرىكا كۆچمەنلەر ۋە تاموژنا ئىدارىسىنىڭ بىر خادىمىنىڭ «تېز ۋە قوغدىنىش مەقسىتىدە ھەرىكەت قىلغانلىقىنى» بىلدۈرۈپ، ئايالنىڭ ئوق تەگكەندىن كېيىن ھاياتىدىن ئايرىلغانلىقىنى بىلدۈردى.

مىننېئاپولىس شەھەر باشلىقى جېيكوب فرېي ۋەقەنىڭ سىن كۆرۈنۈشلىرىنى تەكشۈرگەنلىكىنى ۋە ئوق چىقىرىشنىڭ يوللۇق ئەمەس، دەپ ئويلايدىغانلىقىنى ئېيتىپ، بۇ باياناتنى رەت قىلدى.

فرېي كۈچ ئىشلىتىشنى پەرۋاسىزلىق دەپ قاراپ، فېدېراتسىيە كۆچمەنلەر ئىدارىسى خادىملىرىنىڭ شەھەرنى تەرك ئېتىشىنى تەلەپ قىلدى.

فرېي: «ئامېرىكا كۆچمەنلەر ۋە تاموژنا ئىدارىسىنىڭ شەھەرنى دەرھال تەرك ئېتىشىنى تەلەپ قىلىمىز. بىز كۆچمەن ۋە مۇساپىر جامائەتلىرىمىزنى قوللايمىز» دېدى.

مىننېسوتا ۋالىيسى تىم ۋالزمۇ شەھەر باشلىقى ئوتتۇرىغا قويغان ئەندىشىلەرنى تەكرارلاپ، ئىچكى بىخەتەرلىك ئىشلىرى مىنىستىرلىقىنىڭ «تەشۋىقات ماشىنىسى» غا قارىتا خەلقنى ئاگاھلاندۇردى.

ۋالز ئىشتاتنىڭ «تولۇق، ئادىل ۋە تېز بىر تەكشۈرۈش» ئېلىپ بارىدىغانلىقىنى بىلدۈردى.

ۋالز يەنە مىننېسوتا دۆلەت مۇداپىئە ئارمىيەسىنىڭ ئىشتاتتا ئورۇنلاشتۇرۇلۇشىغا تەييارلىق قىلىش ئۈچۈن بىر ئاگاھلاندۇرۇش بۇيرۇقى چۈشۈرگەنلىكىنىمۇ سۆزلىرىگە ئىلاۋە قىلدى.