تۈركىيە جۇمھۇرىيىتى مەدەنىيەت ۋە ساياھەت مىنىستىرلىقى بېرلىندا ئۆتكۈزۈلىدىغان بۇ كۆرگەزمىنىڭ گۆبەكلتەپەنىڭ دۇنيا مىقياسىدا تونۇلۇشىنى نىشان قىلىدىغانلىقىنى، شەھەرنىڭ «مۇزېي ئارىلى» دەپ ئاتىلىدىغان رايونىدىكى تۈر بىلەن بىرلىكتە، چەت ئەللەردىمۇ باشقا پائالىيەتلەرنىڭ پىلانلىنىۋاتقانلىقىنى بىلدۈردى.

تۈركىيەنىڭ شەرقىي جەنۇبىغا جايلاشقان، ب د ت مائارىپ، ئىلىم – پەن ۋە مەدەنىيەت تەشكىلاتى «UNESCO» نىڭ دۇنيا مىراسلىرى تىزىملىكىگە كىرگۈزۈلگەن گۆبەكلتەپەنىڭ 96 پارچە ئەسىرى 2026-يىلى گېرمانىيەدە كۆرگەزمە قىلىنىدۇ.

تۈركىيە مۇئاۋىن  مەدەنىيەت ۋە ساياھەت مىنىستىرى گۆكخان يازگى ئانادولۇ ئاگېنتلىقىغا بەرگەن باياناتىدا، مىنىستىرلىقنىڭ گۆبەكلتەپەنى ھەم تۈركىيەدە ھەم چەت ئەللەردە تونۇشتۇرۇش ئۈچۈن بىرلا ۋاقىتتا تۈرلەرنى يولغا قويۇۋاتقانلىقىنى بىلدۈردى.

يازگى ئالدىنقى يىلى رىمدىكى كولىزېي مۇزېيىدا «گۆبەكلتەپە: مۇقەددەس بىر جاينىڭ سىرى» ناملىق كۆرگەزمە ئۆتكۈزۈلگەنلىكىنى ئەسكەرتتى، ھەمدە بۇ كۆرگەزمىنىڭ 6 مىليوندىن ئارتۇق زىيارەتچىنى كۈتۈۋالغانلىقىنى ئىپادىلىدى.

يازگى بۇ قېتىم گۆبەكلتەپەنىڭ بېرلىندا «تاشتىكى ئەپسانىلەر: گۆبەكلتەپە ۋە ئاخىرقى ئوۋچىلار دۇنياسى» تېمىسىدا تونۇشتۇرۇلىدىغانلىقىنى بىلدۈردى، ھەمدە نېئولىت دەۋرىدىكى مىراسلارنى تونۇشتۇرۇشقا قارىتىلغان قەدەملەرنىڭ تېزلەشكەنلىكىنى ئەسكەرتىپ مۇنداق دېدى:

«تاش دۆڭلۈكلىرى تۈرى دۇنيادا ئوخشىشى بولمىغان بىر تۈر. بۇ تۈر بىلەن گۆبەكلتەپە دۇنيا ساياھەت ۋە ئارخېئولوگىيە ساھەلىرىدە ئۆزگىچە ئورۇنغا ئايلاندى. بۇ يىل كىرگەندىن بۇيان 500 مىڭدىن ئارتۇق زىيارەتچىنى كۈتۈۋالدۇق، زىيارەتچىلەرنىڭ سانى كۈنسېرى كۆپەيمەكتە. گۆبەكلتەپەنىڭ نېئولىت دەۋرىدىكى رولىنى ۋە دۇنيا ئارخېئولوگىيەسىدىكى ئورنىنى گەۋدىلەندۈرۈش ئۈچۈن ئالاھىدە بىر توپلام تەييارلاندى.

گۆبەكلتەپەنىڭ دۇنيا ئارخېئولوگىيەسىدىكى ئورنىنى، تاش دۆڭلۈكلىرى تۈرىنىڭ قانچىلىك ئالاھىدە بىر تۈر ئىكەنلىكىنى پۈتۈن دۇنياغا تونۇشتۇرىمىز. دۆلىتىمىز ۋە شەھىرىمىزنىڭ ساياھەتتە لايىق ئورۇنغا ئېرىشىشى ئۈچۈن قولىمىزدىن كەلگەن بارلىق ئىشلارنى قىلىمىز.»

بېرلىندىكى كۆرگەزمىنىڭ گۆبەكلتەپەنىڭ  دۇنيا مىقياسىدا تونۇشتۇرۇلۇشىدىكى ئەڭ يېڭى قەدەم ئىكەنلىكىنى تەكىتلىگەن يازگى، مىنىستىرلىقنىڭ بېرلىندىكى مۇزېي ئارىلىدا چوڭ بىر تۈرنى ئىشقا كىرىشتۈرۈشكە باشلايدىغانلىقىنى ۋە باشقا دۆلەتلەردىمۇ مۇشۇنىڭغا ئوخشاش تونۇشتۇرۇش پائالىيەتلىرىنى پىلانلىغانلىقىنى تەكىتلەپ مۇنداق دېدى:

«تۈركىيەنىڭ تونۇشتۇرۇلۇشى ۋە دۆلىتىمىزنىڭ مەدەنىيەت ساياھىتىگە تۆھپە قوشىدىغان بۇ ئۆزگىچە بايلىقنىڭ دۇنيا مىقياسىدا تونۇلۇشى ئۈچۈن تىرىشىۋاتىمىز.»

گېرمانىيەنىڭ ياۋروپادىكى ئىستراتېگىيەلىك ئورنىنىڭ ناھايىتى مۇھىملىقىنى ئەسكەرتكەن يازگى، كۆرگەزمىنىڭ ئارخېئولوگىيەگە قىزىقىدىغانلار بىلەن يۈز كۆرۈشىدىغانلىقىنى قەيت قىلدى.

كۆرگەزمىدە گۆبەكلتەپەدىكى 3 ئەسەرنىڭ نۇسخىسى بىلەن گۆبەكلتەپە كۈتۈۋېلىش مەركىزىدە زىيارەتچىلەرنىڭ ياقتۇرۇشىغا سۇنۇلغان كىنولاردىن ئوخشىمىغان تىللاردىكى پارچىلار، ھەرخىل رەقەملىك ئەسەرلەر ۋە ئۇچۇر تاختىلىرىنىڭ ئورۇن ئېلىشى پىلانلانماقتا.

كۆرگەزمە 2026-يىلى فېۋرال ئېيىدا ئېچىلىدۇ ۋە ئۇدا ئالتە ئاي داۋامىدا زىيارەت قىلىشقا بولىدۇ.