رۇسىيە تاشقى ئىشلار مىنىستىرى سېرگېي لاۋروۋ يەكشەنبە كۈنى (TASS) ئاگېنتلىقى تەرىپىدىن ئېلان قىلىنغان باياناتىدا، ياۋروپا قىسىملىرى ئۇكرائىناغا ئورۇنلاشتۇرۇلغان تەقدىردە رۇسىيە دۆلەت خەۋپسىزلىك كۈچلىرى ئۈچۈن قانۇنلۇق ھۇجۇم نىشانىغا ئايلىنىدىغانلىقىنى بىلدۈردى.
لاۋروۋ يەنە ياۋروپا سىياسەتچىلىرىنى «كىيېۋ بىلەن بولغان مۇناسىۋەتتە <شۆھرەتپەرەسلىك> نىڭ يېتەكچىلىكىدە ھەرىكەت قىلىۋاتىدۇ، شۇنداقلا ئۇكرائىنا خەلقىگە ۋە ئۆز خەلقىگە سەل قارىۋاتىدۇ» دەپ ئەيىبلىدى.
بۇنىڭدىن ئىلگىرى لاۋروۋ موسكۋانىڭ ياۋروپا قوشۇنلىرىنى ئۇكرائىناغا ئورۇنلاشتۇرغان ياكى كىيېۋنى قوللاش مەقسىتىدە رۇسىيەنىڭ توڭلىتىپ قويۇلغان مال-مۈلۈكلىرىنى ئىشلىتىشكە ئورۇنغان تەقدىردە بۇنىڭ جاۋابىنى بېرىدىغانلىقىنى ئېيتقان ئىدى. ئۇ يەنە رۇسىيەنىڭ ياۋروپا بىلەن ئۇرۇش قىلىش نىيىتى يوقلۇقىنى تەكىتلەپ مۇنداق دېدى:
«ئەمما ھەرقانداق شەكىلدىكى دۈشمەنلەرچە ھەرىكەتكە، جۈملىدىن ياۋروپا ھەربىي قىسىملىرىنىڭ ئۇكرائىناغا ئورۇنلاشتۇرۇلۇشى ۋە رۇسىيەنىڭ مال-مۈلۈكلىرىنىڭ تارتىۋېلىنىشىغا تاقابىل تۇرىمىز. بىز بۇنداق ئىنكاس قايتۇرۇشقا ئاللىقاچان تەييارمىز.»
رۇسىيە تەيۋەن مەسىلىسىدە ياپونىيەنى ئاگاھلاندۇردى
رۇسىيەنىڭ ئەڭ يۇقىرى دەرىجىلىك دىپلوماتى، تەيۋەن ئارىلىنىڭ ھەرقانداق شەكىلدە مۇستەقىل بولۇشىغا قارشى تۇرىدىغانلىقىنى يەنە بىر قېتىم تەكرارلاپ، تەيۋەننىڭ خىتاينىڭ ئايرىلماس بىر قىسمى ئىكەنلىكىنى ئېيتتى.
رۇسىيەنىڭ دۆلەتلىك خەۋەر ئاگېنتلىقى (TASS) بىلەن ئۆتكۈزۈلگەن بىر سۆھبەتتە، تاشقى ئىشلار مىنىستىرى سېرگېي لاۋروۋ ياپونىيەنى بۇنىڭ ھەربىيلىشىشكە ئېلىپ بارىدىغان يول ئىكەنلىكىنى ئەسكەرتىپ، «ياخشى ئويلىنىش» ھەققىدە ئاگاھلاندۇردى.
لاۋروۋ ئۆكتەبىر ئېيىدا ئېلان قىلىنغان بىر ماقالىدە، ئامېرىكا قوشما ئىشتاتلىرى ۋە ئىتتىپاقداشلىرىنى تەيۋەن بوغۇزىدىكى جىددىيچىلىكنى قەستەن ئەۋج ئالدۇرۇۋېتىش بىلەن ئەيىبلىگەن ئىدى؛ ۋاشىنگتوننىڭ رەسمىي ھالدا «بىر خىتاي» سىياسىتىگە ئەمەل قىلىدىغانلىقىنى ئىلگىرى سۈرىشىگە قارىماي، تەيۋەن دائىرىلىرى بىلەن بولغان ئالاقىسىنى كۈچەيتىۋاتقانلىقىنى ئوتتۇرىغا قويغان ئىدى.
خىتاي تەيۋەننىڭ ئۆز زېمىنىنىڭ ئايرىلماس بىر قىسمى ئىكەنلىكىنى ئىلگىرى سۈرمەكتە.
رۇسىيە بىلەن خىتاي دىپلوماتىك مۇناسىۋەتلىرىنىڭ 75 - يىللىقىنى تەبرىكلەۋاتقان بىر پەيتتە، موسكۋا ئىككى دۆلەتنىڭ ئاسىيا-تىنچ ئوكيان رايونىدا غەربنىڭ كېڭەيمىچىلىكى كەلتۈرۈپ چىقارغان خەتەرلەر مەسىلىسىدە ئوخشاش قاراشقا ئىگە ئىكەنلىكىنى بىلدۈرمەكتە.
