بىريۇسسېل دائىرىلىرى خىتاينىڭ ئېلېكترونلۇق سودا گىگانتى «AliExpress» نىڭ بىخەتەر بولمىغان ۋە سۈپەتسىز مەھسۇلاتلارنىڭ سېتىلىشىنى توسۇشتا مەغلۇپ بولغانلىقىنى بېكىتتى ۋە «دىگىتال مۇلازىمەت قانۇنى» (DSA) دائىرىسىدە ئەڭ يۇقىرى جەرىمانە جازاسىنى ئىجرا قىلدى.
ياۋروپا ئىتتىپاقى خىتاينىڭ تور سودا سۇپىسى «AliExpress» قا ئويۇنچۇقلار، گىرىم بۇيۇملىرى ۋە سۈپەتسىز تەقلىد قىلىنغان بۇيۇملاردىن تەشكىل تاپقان ھەم قانۇنسىز، ھەم بىخەتەر بولمىغان مەھسۇلاتلارنىڭ سېتىلىشىنىڭ ئالدىنى ئالالمىغانلىقى سەۋەبلىك 550 مىليون ياۋرو (629 مىليون دوللار) لىق رېكورت دەرىجىدە جەرىمانە قويدى.
دۈشەنبە كۈنى ئېلان قىلىنغان بۇ جەرىمانە، چوڭ تور سۇپىلىرىغا قارىتا ئىستېمالچىلارغا قارىتىلغان خەۋپ-خەتەرلەرنى ئېنىقلاش ۋە ئازايتىش مەجبۇرىيىتى يۈكلەيدىغان ياۋروپا ئىتتىپاقىنىڭ مۇھىم بۇرۇلۇش نۇقتىسى خاراكتېرىدىكى «دىگىتال مۇلازىمەت قانۇنى» (DSA) دائىرىسىدە ھازىرغىچە بېرىلگەن ئەڭ يۇقىرى جەرىمانە بولدى.
ياۋروپا ئىتتىپاقى مەسئۇللىرى ئېلىپ بېرىلغان تەكشۈرۈشلەردە «ئالىئېكسپرەس» نىڭ قانۇنسىز مەھسۇلاتلارنى ئۆز سۇپىسىدىن ئۈنۈملۈك شەكىلدە ئېلىپ تاشلىمىغانلىقىنى، مەسىلە بېكىتىلگەندىن كېيىنمۇ ھەپتىلەرگىچە نۇرغۇن كۆرسىتىلمىلەرنىڭ سۇپىدا ئىجرا قىلىنماي ئۆز پىتى داۋاملاشقانلىقىنى ئاشكارىلىدى.
ياۋروپا ئىتتىپاقىنىڭ تېخنىكا ئېشلىرىغا مەسئۇل مۇئاۋىن باشلىقى ھەننا ۋىرككۇنېن: «ئىستېمالچىلارنىڭ تور مۇھىتىدا بىخەتەر سودا قىلالىشى ئۈچۈن، خەۋپ-خەتەرلەرنى سىستېمىلىق شەكىلدە ئېنىقلاش ۋە بىر تەرەپ قىلىش كېرەك» دېدى.
بىخەتەر بولمىغان مەھسۇلاتلار ۋە ساختا ماللار جىددىي تەكشۈرۈلمەكتە
ياۋروپا ئىتتىپاقى كومىتېتى «AliExpress» نىڭ قانۇنسىز مەھسۇلاتلارنى ئېنىقلاشقا قارىتىلغان سىستېمىلىرىنىڭ ئۈنۈمىنى مۇبالىغىلەشتۈرۈپ كۆرسەتكەنلىكىنى، ئېلىپ تاشلانغان مىليونلارچە چەكلەنگەن مەھسۇلاتلارنىڭ بولسا كېيىنچە يەنە قايتىدىن سۇپىدا سېتىشقا قويۇلغانلىقىنى ئاشكارىلىدى.
دائىرىلەر يەنە قانۇنسىز مەھسۇلات ساتىدىغان نۇرغۇن سودىگەرلەرنىڭ سۇپىدا داۋاملىق پائالىيەت قىلىۋاتقانلىقىنى ۋە «AliExpress» نىڭ ماركا ھوقۇقىنى شەرت قىلىدىغان سىستېمىسىنىڭ، يالغان مەھسۇلاتلارنىڭ كىرگۈزۈلۈشىنىڭ ئالدىنى ئالمىغانلىقىنى بېكىتتى.
2024-يىلى مارتتا باشلانغان تەكشۈرۈش، سۇپىدا سېتىشقا قويۇلغان بىر قىسىم مەھسۇلاتلارنىڭ ياۋروپا ئىتتىپاقىنىڭ مۇھىت ۋە ئىستېمالچىلار بىخەتەرلىكى ئۆلچەملىرىگە توشمايدىغانلىقى جەزملەشتۈرۈلگەن ئىدى.
«AliExpress» نىڭ ئېتىرازى
«AliExpress» بېرىلگەن جەرىمانىنى «مۇۋاپىق ئەمەس» دەپ باھالىدى، بۇنىڭ شىركەتنىڭ قانۇن-بەلگىلىمىلەرگە ئۇيغۇنلىشىش ئاساسىنى ۋە ئەمەلگە ئاشۇرغان ياخشىلىنىشلىرىنى ئەكس ئەتتۈرمەيدىغانلىقىنى ئىلگىرى سۈردى. شىركەت ئۆزلىرىنىڭ قانۇنىي تاللاشلىرىنى باھالاۋاتقانلىقىنى ئېلان قىلدى.
ياۋروپا ئىتتىپاقى جەرىمانىنىڭ يۇقىرى بولۇشى قانۇنغا خىلاپلىق قىلىش ھەرىكەتلىرىنىڭ ماھىيىتى، داۋاملىشىش مۇددىتى ۋە ياۋروپالىق ئىستېمالچىلارغا كۆرسەتكەن تەسىرى ئېتىبارغا ئېلىنىپ بەلگىلەنگەنلىكىنى بىلدۈردى.
خىتاينىڭ «Alibaba» گۇرۇھى تەۋەلىكىدە پائالىيەت قىلىدىغان «AliExpress» نىڭ ياۋروپا ئىتتىپاقىدا تەخمىنەن 193 مىليون ئىشلاتكۈچىسى بار بولۇپ، بۇ ئەھۋال ياۋروپا ئىتتىپاقىنى شىركەتنىڭ ئەڭ چوڭ بازىرىغا ئايلاندۇرغان. شىركەت ئەمدىلىكتە جەرىمانىنى تۆلىشى شۇنداقلا 20-ئۆكتەبىرگىچە بەلگىلىمىگە ماسلىشىش پىلانىنى تەقدىم قىلىشى كېرەك، بولمىسا قوشۇمچە جازالارغا دۇچ كېلىدۇ.
بۇ قارار، ئىلگىرى «Temu» غا كېسىلگەن 200 مىليون ياۋرو (228.7 مىليون دوللار) جەرىمانە ۋە «X» سۇپىسىغا بېرىلگەن 120 مىليون ياۋرو (137.2 مىليون دوللار) جەرىمانىنىمۇ ئۆز ئىچىگە ئالغان DSA دائىرىسىدىكى باشقا مۇھىم جازالاردىن كېسىلدى. بۇ ئەھۋال بىريۇسسېل دائىرىلىرىنىڭ چوڭ تور سۇپىلىرىغا قارىتىلغان تەپتىشىنى كۈنسېرى كۈچەيتىۋاتقانلىقىنى ئوتتۇرىغا قويدى.
