مىنىستىرلار كابىنېتى ئارىدىن ئىككى ھەپتە ئۆتكەندىن كېيىن، قويۇق كۈنتەرتىپ بىلەن يىغىن چاقىرىدۇ؛ جۇمھۇر رەئىس رەجەپ تاييىپ ئەردوغاننىڭ رىياسەتچىلىكىدە ئۆتكۈزۈلىدىغان يىغىننىڭ ئەڭ مۇھىم تېمىسى، ئوتتۇرا شەرقتە ھەل قىلىنىشقا تىرىشىلىۋاتقان كىرىزىس بولىدۇ.
ئامېرىكا بىلەن ئىران ئوتتۇرىسىدىكى مۇزاكىرە مۇساپىسىمۇ يېقىندىن كۆزىتىلمەكتە.
رايوندا يېڭى بىر خەۋپسىزلىك ئەندىزىسى بەرپا قىلىش ئۈچۈن ھەرىكەت قىلىۋاتقان ئەنقەرەنىڭ ئالدىنقى نىشانى، دائىمىي تىنچلىقنىڭ كېچىكمەستىن ئورنىتىلىشى بولۇپ، بۇ يولدا جۇمھۇر رەئىس ئەردوغان يېقىنقى بىر ھەپتە ئىچىدە ئامېرىكا پىرېزىدېنتى ترامپ ۋە ئىرانلىق مەنسەپدىشى پەزەشكىياننى ئۆز ئىچىگە ئالغان بىر قاتار رەھبەرلەر بىلەن كۆرۈشتى.
كابىنېت يىغىنىدا، تۈركىيەنىڭ ئەردوغاننىڭ رەھبەرلىكىدە ئېلىپ بېرىۋاتقان تىنچلىق دىپلوماتىيەسى مۇزاكىرە قىلىنىدۇ.
ئىقتىساد پىلانى بىلەن بازارلاردىكى ئەڭ يېڭى ئەھۋال مۇھاكىمە قىلىنىدۇ
ئوتتۇرا شەرقتىكى تەرەققىياتلار ۋە ئالاھىدە قىلىپ ئېيتقاندا ھورمۇز بوغۇزىدىكى ئېنىقسىزلىقلار يەر شارى خاراكتېرلىك ئىقتىساد ۋە سودىغا بولغان سەلبىي تەسىرىنى داۋاملاشتۇرماقتا. كابىنېت يىغىنىدا، بۇ تەسىرلەرنى ئەڭ تۆۋەن سەۋىيەدە تۇتۇپ تۇرۇش ۋە پۇل پاخاللىقىنى تىزگىنلەش مۇساپىسنىڭ داۋاملىشىشىغا كاپالەتلىك قىلىش ئۈچۈن تاشلىنىدىغان قەدەملەر كۈنتەرتىپكە كېلىدۇ. ئوتتۇرا مەزگىللىك پىلان ۋە 12-نۆۋەتلىك تەرەققىيات پىلانى رامكىسىدا يولغا قويۇلۇۋاتقان ئىقتىساد پىلانى بىلەن بازارلاردىكى ئەڭ يېڭى ئەھۋال باھالىنىدۇ.
«تېررورسىز تۈركىيە» كۈنتەرتىپى
«تېررورسىز تۈركىيە» نىشانىمۇ كابىنېتنىڭ كۈنتەرتىپىدىن ئورۇن ئالىدۇ. دۆلەتنىڭ ئالاقىدار ئورگانلىرى تېررورلۇق تەشكىلاتىنى يوقىتىش مۇساپىسنى تېزلىتىدىغان ئوخشىمىغان ئۇسۇللار ئۈستىدە تەتقىقاتىنى داۋاملاشتۇرماقتا. يىغىندا ھەم بۇ خىزمەتلەر، ھەم بۇ مۇساپىگە ئالاقىدار تاشلىنىشى پىلانلانغان قانۇنىي قەدەملەرنىڭ مۇزاكىرە قىلىنىشى كۈتۈلمەكتە.
