فىرانسىيەنىڭ غەربىي شىمالىدا 44 كىشى يارىلانغان ۋە بىر كىشى ئېغىر بولغان پويىز ۋەقەسىنىڭ، قەستەن بۇزغۇنچىلىق قىلىنغان بولۇش ئېھتىماللىقى يۈزىسىدىن تەكشۈرۈلۈۋاتقانلىقى بىلدۈرۈلدى.
186 يولۇچى ئولتۇرغان مەزكۇر پويىز جۈمە كۈنى سائەت 19:45 ئەتراپىدا نورماندىيە رايونىدىكى روۋېن (Rouen) ۋە كائېن (Caen) شەھەرلىرى ئوتتۇرىسىدا كېتىۋاتقاندا رېلىستىن چىقىپ كەتكەن.
بىر ساقچى مەنبەسىنىڭ بىلدۈرۈشىچە، تۆمۈريول لىنىيەسى ئۈستىدە بىر تۆمۈر پارچىسى بايقالغاندىن كېيىن، مەسئۇللار بۇ ۋەقەنىڭ قەستەن سادىر قىلىنغان بىر ھەرىكەت بولۇش ئېھتىماللىقىنى تەكشۈرۈشنىڭ ئاساسلىق نۇقتىسى دەپ قارىماقتا.
كەڭ كۆلەملىك جىددىي قۇتقۇزۇش ھەرىكىتى قانات يايدۇرۇلدى
ۋەقەدىن كېيىن كۆپلىگەن يارىلانغۇچىلارنى قۇتقۇزۇش پىلانى ئىشقا كىرىشتۈرۈلدى. نەق مەيدانغا 130 ئوت ئۆچۈرگۈچى، بەش سەھىيە ئەترىتى ۋە 80 ئاپتوموبىل ئەۋەتىلدى.
روۋېن شەھىرى مۇپەتتىشى سېباستىيېن گاللوۋايىس 44 كىشىنىڭ يارىلانغانلىقىنى، ئۇلارنىڭ ئارىسىدا 18 ياشلىق بىر قىزنىڭ ئەھۋالى ئېغىر ھالەتتە دوختۇرخانىغا ئېلىپ بېرىلغانلىقىنى ئېلان قىلدى.
مۇپەتتىش گاللوۋايىس پويىز شوپۇرىغا ئېلىپ بېرىلغان ئىسپىرت ۋە زەھەرلىك چېكىملىك تەكشۈرۈش نەتىجىسىنىڭ مەنپىي چىققانلىقىنى (يەنى ئىستېمال قىلمىغانلىقىنى) بىلدۈردى.
فىرانسىيە تۆمۈريول تورىنى باشقۇرىدىغان «SNCF Reseau» شىركىتى، جىددىي قۇتقۇزۇش ئەترەتلىرىنىڭ بىخەتەر ھالدا خىزمەت قىلالىشى ئۈچۈن لىنىيەدىكى پويىز قاتنىشىنىڭ توختىتىلغانلىقىنى ۋە رېلىسلارغا بېرىلگەن توكنىڭ ئۈزۈۋېتىلگەنلىكىنى ئۇقتۇردى.
تەكشۈرگۈچىلەر ۋەقەنىڭ ئەھۋالىنى ۋە نەق مەيداندىن تېپىلغان تۆمۈر پارچىسىنى تەكشۈرۈشنى داۋاملاشتۇرماقتا.
