رۇسىيە مۇئاۋىن تاشقى ئىشلار مىنىستىرى سېرگېي ريابكوۋ، موسكۋانىڭ كانادانىڭ ئانكورىج شەھىرىدە ئامېرىكا بىلەن ھاسىل قىلىنغان پىرىنسىپلارغا ئەمەل قىلىشنى داۋاملاشتۇرىدىغانلىقىنى ئېيتتى.
سېرگېي ريابكوۋ موسكۋا ئۈچۈن ئۇكرائىنادىكى توقۇنۇشنى ھەل قىلىشقا مۇناسىۋەتلىك ھالقىلىق مەسىلىلەردە يول قويۇشنىڭ مۇمكىن ئەمەسلىكىنى ئېيتتى.
موسكۋادا ئۆتكۈزۈلگەن مۇخبىرلارنى كۈتۈۋېلىش يىغىنىدا سۆز قىلغان ريابكوۋ، رۇسىيەنىڭ ئاۋغۇست ئېيىدا ئالياسكادىكى ئانكورىج شەھىرىدە ئۆتكۈزۈلگەن باشلىقلار يىغىنىدا ئامېرىكا بىلەن ھاسىل قىلىنغان پىرىنسىپلارغا داۋاملىق ئەمەل قىلىدىغانلىقىنى تەكىتلەپ مۇنداق دېدى:
«بۇ ھەقتە يول قويۇشقا بولمايدۇ؛ دۇچ كەلگەن ئاساسىي مەسىلىلەرنى ھەل قىلىشقا قارىتىلغان ئۇسۇللىرىمىزدىن ۋاز كېچىشكە بولمايدۇ؛ بۇ ئەھۋال ‹مەخسۇس ھەربىي ھەرىكىتىمىز› دائىرىسىدىكى مەسىلىلەرنىمۇ ئۆز ئىچىگە ئالىدۇ. ئانكورىج كېلىشىمىنىڭ ھەربىر مەزمۇنىنىڭ ئۆزلۈكىدىن كېلىشتۈرۈش چارىلىرىنى ئىپادىلەيدىغانلىقىنى تەكىتلەشنى خالايمەن.»
ريابكوۋ رۇسىيە تەرەپنىڭ ئامېرىكا پىرېزىدېنتى دونالد ترامپنىڭ ئۇكرائىناغا ئائىت پىلانىنىڭ تەپسىلاتلىرىنىڭ جەمئىيەتتە مۇھاكىمە قىلىنىشىغا قارشى ئىكەنلىكىنى، چۈنكى بۇنداق بىر مۇھاكىمىنىڭ تىنچلىق باسقۇچىغا زىيان يەتكۈزۈشى مۇمكىنلىكىنى ئەسكەرتىپ مۇنداق دېدى:
«ئانكورىجدا قولغا كەلتۈرۈلگەن نەتىجىلەرگە ئەمەل قىلىشنى داۋاملاشتۇرىمىز. نۆۋەتتىكى ئۆزگىرىشلەرنى نەزەردە تۇتۇپ، ئۇ يەردە ئىككى پىرېزىدېنت تەرىپىدىن بېكىتىلگەن ئاساسىي نۇقتىلارنى بويلاپ ھەرىكەت قىلىشنى داۋاملاشتۇرىمىز.»
ئۇ، رۇسىيە تاشقى ئىشلار مىنىستىرى سېرگېي لاۋروۋ بىلەن ئامېرىكا تاشقى ئىشلار مىنىستىرى ماركو رۇبىيو ئوتتۇرىسىدىكى ئۇچرىشىشلار ھەققىدە سورالغان سوئالغا، «زۆرۈر تېپىلغاندا بۇ ئۇچرىشىشلارنى تېزلا ئورۇنلاشتۇرۇشقا بولىدۇ» دەپ جاۋاب بەردى.
ئامېرىكا پىلانى
ۋاشىنگتون نۆۋەتتە ئۇرۇشنى ئاخىرلاشتۇرۇش ئۈچۈن تۈزگەن يېڭى پىلان ئۈستىدە ھەم موسكۋا ھەم كىيېۋ بىلەن ئالاقىلەشمەكتە.
رۇسىيە 2022 - يىلى فېۋرالدا ئۇكرائىنانىڭ «ناتسىستلاردىن تازىلىنىشى» ۋە «قورالىسىزلاندۇرۇلۇشى» مەقسىتىدە «مەخسۇس ھەربىي ھەرىكەت» باشلىدى.
موسكۋا كېلىشىم دائىرىسىدە ئۇكرائىنا ئارمىيەسىگە قويۇلىدىغان چەكلىمىلەرنىڭ ۋە ناتو ئەزالىقىنىڭ توسۇلۇشىنىڭ سىرتىدا، رۇس تىلىنىڭ ئۇكرائىنادا رەسمىي تىل بولۇشىنىمۇ تەلەپ قىلماقتا.
ئامېرىكا – رۇسىيە مۇناسىۋەتلىرىنىڭ نۆۋەتتىكى ئەھۋالى ھەققىدە توختالغان ريابكوۋ، ۋاشىنگتوننىڭ نورماللىشىش توغرىسىدا باياناتلارنى بېرىۋاتقان بولۇشىغا قارىماي، ئەمەلىيەتتە بۇنىڭ دەل ئەكسىچە ھەرىكەت قىلىۋاتقانلىقىنى ئېيتىپ مۇنداق دېدى:
«مەلۇم شەرتلەر ئاستىدا، رۇسىيە – ئامېرىكا ئوتتۇرىسىدا كېيىنكى كەڭ دائىرىلىك سىياسىي ۋە دىپلوماتىك ھەل قىلىش چارىلىرىنىڭ ئاساسى ھەققىدە بىردەكلىك ھاسىل قىلىندى. لېكىن كىيېۋگە قورال - ياراغ ۋە ئىستىخبارات يەتكۈزۈشنىڭ داۋاملىشىشى بۇ جەريانغا زىتتۇر.»
ريابكوۋ رۇسىيەنىڭ ئامېرىكادىكى ئىچكى سىياسىي توقۇنۇشلارنى چۈشىنىدىغانلىقىنى ۋە دىيالوگ جەريانىدا سەۋر – تاقەتلىك بولغانلىقىنى بىلدۈردى.
ئىككى دۆلەت ئوتتۇرىسىدا ھاۋا قاتنىشىنىڭ قايتا باشلىنىشى ياكى رۇسىيەنىڭ كونسۇلخانا بىناسىنىڭ قايتۇرۇپ بېرىلىشى مەسىلىسىدە ھېچقانداق ئىلگىرىلەش بولمىغاچقا، رۇسىيە - ئامېرىكا مۇناسىۋەتلىرى نورماللىشىشنىڭ دەسلەپكى باسقۇچىدا تۇرماقتا.
ئىستراتېگىيەلىك ھۇجۇم قوراللىرىنى كېمەيتىش كېلىشىمىنىڭ مۇددىتىنىڭ فېۋرال ئېيىدا توشىدىغانلىقىنى قەيت قىلغان ريابكوۋ، ئامېرىكا كېلىشىم مۇددىتى توشقاندىن كېيىن رۇسىيەنىڭ چەكلەش تەكلىپىنى قوبۇل قىلمىسا، يەر شارى خاراكتېرلىك بىخەتەرلىكنىڭ تېخىمۇ يامانلىشىپ كېتىدىغانلىقى ھەققىدە ئاگاھلاندۇردى.
رۇسىيە پىرېزىدېنتى ۋلادىمىر پۇتىن 22 - سېنتەبىردە، موسكۋانىڭ ئىستراتېگىيەلىك ھۇجۇم قوراللىرىنى كېمەيتىش كېلىشىمىنىڭ مۇددىتىنىڭ 2026 - يىلى 5 - فېۋرالدا ئاخىرلىشىشىدىن كېيىن بىر يىلغىچە مەركىزىي سانلىق چەكلىمىلىرىگە ئەمەل قىلىشقا تەييار ئىكەنلىكىنى، لېكىن بۇنىڭ ۋاشىنگتوننىڭمۇ ئوخشاش شەكىلدە ھەرىكەت قىلىشى شەرتى بىلەن مۇمكىن بولىدىغانلىقىنى ئېيتتى.
