ئەنگلىيە تاشقى ئىشلار ۋەزىرى ئېد مىلىباند ئىسرائىلىيەنىڭ قىلمىشلىرى سەۋەبىدىن ئىككى دۆلەتلىك ھەل قىلىش چارىسىنىڭ ئىلگىرى كۆرۈلۈپ باقمىغان دەرىجىدە زور تەھدىتكە دۇچ كېلىۋاتقانلىقى توغرىسىدا ئاگاھلاندۇردى.
ئەنگلىيە تاشقى ئىشلار ۋەزىرى ئېد مىلىباند ئىسرائىلىيەنىڭ قانۇنسىز كۆچمەنلەر ئولتۇراق رايونلىرىنى نىشان قىلغان تەدبىرلىرىنىڭ، دۆلىتىنىڭ ئىككى دۆلەتلىك ھەل قىلىش چارىسىنىڭ يوقىتىلىشىغا «قول قوۋۇشتۇرۇپ ئولتۇرۇۋەرمەيدىغانلىقى» نى كۆرسىتىپ بېرىدىغانلىقىنى ئەسكەرتتى. ئۇ بۇ ھەل قىلىش چارىسىنىڭ ئىلگىرى كۆرۈلۈپ باقمىغان دەرىجىدە زور تەھدىت ئاستىدا قالغانلىقىنى تەكىتلىدى.
ئېد مىلىباند پەيشەنبە كۈنى ئاممىۋى ئورتاقلىشىش تور بېتى X سەھىپىسىدە ئېلان قىلغان ۋىدېيولۇق ئۇچۇرىدا، ئەنگلىيەنىڭ بىر يىل ئىلگىرى بىرلەشكەن دۆلەتلەر تەشكىلاتىدا پەلەستىن دۆلىتىنى ئېتىراپ قىلغانلىقىنى ئەسكەرتىپ، بۇ قەدەمنى «ئۇزۇندىن بۇيان تاشلىنىشى كېرەك بولغان بىر ھەرىكەت» دەپ تەرىپلەپ مۇنداق دېدى:
«ئىسرائىلىيە ھۆكۈمىتىنىڭ قىلمىشلىرى سەۋەبىدىن ئىككى دۆلەتلىك ھەل قىلىش چارىسى ئىلگىرى كۆرۈلۈپ باقمىغان دەرىجىدە زور تەھدىت ئاستىدا قالدى.»
ئۇ، ئەنگلىيەنىڭ ئىسرائىلىيەنىڭ قانۇنسىز كۆچمەنلەر ئولتۇراق رايونلىرىدا ئىشلەپچىقىرىلغان مەھسۇلاتلارنى ئىمپورت قىلىشنى مەنئىي قىلىش، شۇنداقلا بۇ ئولتۇراق رايونلارنىڭ كېڭىيىشىگە تۈرتكە بولىدىغان مەبلەغ، قۇرۇلۇش ۋە باشقا مۇلازىمەتلەرنى توختىتىش ئۈچۈن ھەرىكەتكە ئۆتكەنلىكىنى تەكىتلەپ مۇنداق دېدى:
«مەن ئېلان قىلغان بۇ بىر يۈرۈش تەدبىرلەر ئىسرائىلىيە ھۆكۈمىتىگە، ئىشغالىيەت ئاستىدىكى زېمىنلاردا ياشاۋاتقان پەلەستىنلىكلەرگە ۋە پۈتۈن دۇنياغا، بىزنىڭ ئىككى دۆلەتلىك ھەل قىلىش چارىسىنىڭ ۋەيران قىلىنىشىغا قاراپ تۇرمايدىغانلىقىمىز ھەققىدە ئېنىق سىگنال بېرىدۇ.»
ئىنسانىي ياردەم مەسىلىسىدە توختالغان ئېد مىلىباند، ئەنگلىيەنىڭ مۇشۇ ھەپتە ئىچىدە قورشاۋ ئاستىدىكى غەززە ۋە ئىشغالىيەت ئاستىدىكى ئىيوردان دەرياسىنىڭ غەربىي قىرغىقىدىكى پەلەستىنلىكلەر ئۈچۈن قوشۇمچە ئىنسانىي ياردەم بېرىش پىلانىنى ئېلان قىلىدىغانلىقىنى جاكارلىدى. ئۇ يەنە ئىسرائىلىيە ھۆكۈمىتىنى «ياردەم بويۇملىرىغا قويۇلغان چەكلىمىلەرنى دەرھال ۋە مەڭگۈلۈك ئەمەلدىن قالدۇرۇشقا» چاقىردى.
ئېد مىلىباند ئەنگلىيەنىڭ جاۋابكارلىقنى سۈرۈشتۈرۈش ۋە ئىسرائىلىيەنىڭ تاجاۋۇزچىلىقىغا خاتىمە بېرىش يۆنىلىشىدىكى خەلقئارالىق تىرىشچانلىقلارنى داۋاملاشتۇرىدىغانلىقىنى ئىپادىلىدى.
ئىسرائىلىيە 2023-يىلى ئۆكتەبىردىن بۇيان غەززەدە ئېلىپ بېرىۋاتقان ئىرقىي قىرغىنچىلىقتا، كۆپىنچىسى ئاياللار ۋە بالىلاردىن تەشكىل تاپقان تەخمىنەن 74 مىڭ پەلەستىنلىكنى ئۆلتۈردى، 175 مىڭدىن ئارتۇق كىشىنى يارىلاندۇردى. ئىسرائىلىيە ئۇرۇش توختىتىش كېلىشىمىگە خىلاپلىق قىلىشنى داۋاملاشتۇرماقتا. ئىسرائىلىيەنىڭ ئۇرۇش توختىتىش مەزگىلىدە ئېلىپ بارغان ھۇجۇملىرىدا 1408 پەلەستىنلىك ھاياتىدىن ئايرىلدى، 4916 كىشى يارىلاندى.
