ئىسرائىلىيە مۇداپىئە مىنىستىرى يىسراېل كاتز ئىسرائىلىيەنىڭ غەززەنى «ھەرگىز تاشلاپ كەتمەيدىغانلىقى»نى تەكىتلەپ، رايون ئەتراپىدا كەڭ كۆلەملىك بىخەتەرلىك رايونى تەسىس قىلىش ۋە غەززەنىڭ شىمالىدا ئولتۇراق رايونلارغا ئالاقىدار پائالىيەتلەرگە رۇخسەت قىلىش ۋەدىسىنى يەنە بىر قېتىم ئوتتۇرىغا قويدى.
ئىسرائىلىيەنىڭ «ھائارېتس» گېزىتىنىڭ خەۋىرىگە ئاساسلانغاندا، بىر قېتىملىق تەربىيەلەش يىغىنىدا سۆز قىلغان كاتز، ئىسرائىلىيەنىڭ غەززەدە مەڭگۈلۈك تۇرىدىغانلىقىنى ۋە كەڭ بىر بىخەتەرلىك (تەڭپۇڭ) رايونى قۇرىدىغانلىقىنى ئېيتتى.
كاتز بۇ ھەپتە بېشىدىمۇ غەززەنىڭ شىمالىغا يەھۇدىي ئولتۇراق رايونلىرىنىڭ قۇرۇلۇشى ھەققىدە ئوخشاش مەزمۇندا سۆز قىلغانىدى. ئىسرائىلىيە مېدىياسى، بۇ سۆزلەرنىڭ ئامېرىكا پىرېزىدېنتى دونالد ترامپ ھۆكۈمىتىنى غەزەپلەندۈرگەنلىكىنى ۋە ترامپنىڭ بېسىمى بىلەن كاتزنىڭ بۇ سۆزلىرىنى قىسمەن قايتۇرۇۋېلىشىغا توغرا كەلگەنلىكىنى خەۋەر قىلغانىدى.
كاتز ۋاقتى كەلگەندە غەززەنىڭ شىمالىدا ناھال (Nahal) قاراۋۇلخانىلىرىنىڭ «تەرتىپلىك بىر شەكىلدە» قۇرۇلۇشىنىڭ مۇمكىن بولىدىغانلىقىنى بىلدۈردى.
ناھال قاراۋۇلخانىلىرى ئىسرائىلىيە ئارمىيەسى تەرىپىدىن نازارەت قىلىنىدىغان، ھەربىي مەجبۇرىيەت بىلەن ئولتۇراقلىشىش پائالىيەتلىرىنى بىرلەشتۈرگەن، ئاساسەن ياشلارغا قارىتىلغان بىر خىل ئولتۇراقلىشىش شەكلى دەپ قارالماقتا.
ئىلگىرىكى باياناتلىرىنى قايتۇرۇۋالغانلىقى ھەققىدىكى خەۋەرلەرنى رەت قىلغان كاتز، ئىسرائىلىيەنىڭ غەززەدە «ئەمەلىي ئىگىلىك ھوقۇقى»نى يۈرگۈزىدىغانلىقىنى بىلدۈرۈپ، بۇنى ئىشغال ئاستىدىكى غەربىي قىرغاقتىكى ئىسرائىلىيە سىياسىتىگە ئوخشاتتى.
ئىشغال ئاستىدىكى غەربىي قىرغاق ئۈستىدىكى كونتروللۇق
پەلەستىنلىك ئەمەلدارلارنىڭ بىلدۈرۈشىچە، ئىسرائىلىيە قىرغىنچىلىق باشلانغاندىن بۇيان، ئىشغال ئاستىدىكى غەربىي قىرغاق ئۈستىدىكى كونتروللۇقىنى مۇستەھكەملەشنى مەقسەت قىلغان ھەرىكەتلىرىنى كۈچەيتكەن بولۇپ، بۇ ھەرىكەتلەر ئۆيلەرنى چېقىش، مەجبۇرىي كۆچۈرۈش ۋە ئولتۇراقلىشىش رايونلىرىنى كېڭەيتىش قاتارلىقلارنى ئۆز ئىچىگە ئالىدىكەن.
ئىشغال ئاستىدىكى غەربىي قىرغاقنىڭ قوشۇۋېلىنىشى ب د ت قارارلىرىدا بەلگىلەنگەن ئىككى دۆلەتلىك ھەل قىلىش لايىھەسىنى ئەمەلىيەتتە يوققا چىقىرىدۇ.
ھازىر ئىشغال ئاستىدىكى شەرقىي قۇددۇسنى ئۆز ئىچىگە ئالغان مۇستەملىكە ئاستىدىكى غەربىي قىرغاقتا تەخمىنەن 750 مىڭ ئىسرائىلىيەلىك كۆچمەن ياشايدۇ.
ئىسرائىلىيە مېدىياسى كاتزنىڭ بۇ باياناتلىرىنىڭ بېنيامىن نېتانياھۇنىڭ 29-دېكابردا فلورىدادا ترامپ بىلەن ئۆتكۈزۈشى كۈتۈلۈۋاتقان ئۇچرىشىشىنى قىيىن ئەھۋالغا چۈشۈرۈپ قويۇش ئېھتىمالى بارلىقى ھەققىدە ئاگاھلاندۇردى.
