جۇمھۇر رەئىس ئەردوغان 9-نۆۋەتلىك ئىستانبۇل مۇرەسسەچىلىك يىغىنىغا يوللىغان مەخسۇس سىنلىق ئۇچۇرىدا، خەلقئارا كىرىزىسلارنى ھەل قىلىشتا دىپلوماتىك يوللاردىن ئاسانلىقچە ۋاز كەچمەسلىكنىڭ نەقەدەر مۇھىملىقىنى ئالاھىدە تىلغا ئالدى.
ئۇ سۆزىدە مۇنداق دېدى: «بىز ھازىر دۇنيا مىقياسىدا توقۇنۇشلار كۆپىيىۋاتقان، زىددىيەت ۋە جىددىيچىلىكلەر كۈنسايىن كەسكىنلىشىۋاتقان، شۇنداقلا خەلقئارا قانۇن ۋە تەشكىلاتلارغا بولغان ئىشەنچكە دەرز كېتىۋاتقان بىر مۇرەككەپ دەۋردە ياشاۋاتىمىز. تۈركىيە بولۇش سۈپىتىمىز بىلەن، مانا مۇشۇنداق بىر تارىخىي پەيتتە، ھەتتا كېلىشەلمەيۋاتقان تەرەپلەر بىر-بىرى بىلەن سۆزلەشمەيدىغان ھالەتكە يېتىپ، ئۈمىد ئۇچقۇنلىرى سۇسلاشقان چاغلاردىمۇ، دىپلوماتىيەدىن ھەرگىز ۋاز كەچمەسلىكنى ئۆزىمىزنىڭ ئاساسىي پىرىنسىپى قىلدۇق.»
ئەردوغان سۆزىنىڭ داۋامىدا، رۇسىيە بىلەن ئۇكرائىنا ئوتتۇرىسىدىكى ئەسىر ئالماشتۇرۇش كېلىشىمىنى ۋۇجۇدقا چىقىرىشتىن تارتىپ، تاكى ئافرىقا قىتئەسىدىكى تۈرلۈك مۇرەسسەچىلىك ھەرىكەتلىرىگىچە بولغان كەڭ جۇغراپىيەلىك دائىرىدە كۆرۈنەرلىك نەتىجىلەرنى قولغا كەلتۈرگەنلىكىنى، ھەمدە بۈگۈنكى كۈندىمۇ تىنچلىققا يول ئېچىش ئۈچۈن توختاۋسىز ئىزدىنىۋاتقانلىقىنى قەيت قىلدى.
ئۆزىنىڭ «دۇنيا بەشتىن چوڭدۇر» دېگەن مەشھۇر سۆزىنى يەنە بىر قېتىم تەكرارلىغان ئەردوغان مۇنداق دېدى: «بۈگۈنكى كۈندە پەلەستىن، لىۋان، سۇدان ۋە باشقا كىرىزىس قاپلىغان رايونلاردا بىرلەشكەن دۆلەتلەر تەشكىلاتىدىن مەدەت كۈتكەن مىليونلىغان ئىنسانلار قاتتىق ئۈمىدسىزلىك ئىچىدە قىينالماقتا. شۇنىسى ئوپئوچۇق بىر ھەقىقەتكى، ب د ت دىكى 190 دىن ئارتۇق دۆلەتنىڭ ئىرادىسى ۋە تەقدىرى پەقەتلا بەش دۆلەتنىڭ كەيپىياتىغا باغلىنىپ قالغان بىر تۈزۈم ھەرگىزمۇ ئادىل بولالمايدۇ ۋە كىشىلەردە تولۇق ئىشەنچ تۇرغۇزالمايدۇ.»
تۈركىيەنىڭ ئۆزئارا ئىشەنچسىزلىك ئۇلىغا قۇرۇلغان خەلقئارا سىياسەت ئۇقۇمىنى قەتئىي قوبۇل قىلمايدىغانلىقىنى ئالاھىدە ئەسكەرتكەن ئەردوغان سۆزىنى مۇنداق خۇلاسىلىدى: «بىز شۇنىڭغا قەتئىي ئىشىنىمىزكى، ئەڭ مۇرەككەپ ۋە چىگىش زىددىيەتلەردىمۇ دىپلوماتىيە ئۈچۈن ئوچۇق تۇرىدىغان بىرەر ئىشىك چوقۇم تېپىلىدۇ. ئەڭ مۇھىمى، شۇ ئىشىكنى ئوچۇق تۇتۇش ئۈچۈن يېتەرلىك ئىرادە، قەتئىي جاسارەت ۋە ھەقىقىي سەمىمىيەتنى نامايان قىلالاشتۇر. بىز تىنچلىق بەرپا قىلىش ئۈچۈن تەرەپلەرنى بىر يەرگە جەم قىلىشنى، ئادىل ۋە مۇۋاپىق ھەل قىلىش چارىلىرىنى تېپىش ئۈچۈن مۇرەسسەچىلىك قىلىشنى، شۇنداقلا تېگىشلىك مەسئۇلىيەتنى دادىللىق بىلەن ئۆز ئۈستىمىزگە ئېلىشنى ئىزچىل داۋاملاشتۇرىمىز.»
