مىسىر تاشقى ئىشلار مىنىستىرلىقىنىڭ باياناتىغا ئاساسلانغاندا، قاھىرەدە بىر يەرگە جەم بولغان تەرەپلەر، ئۇرۇش توختىتىش مۇساپىسىنى ئىلگىرى سۈرۈش ۋە مەيداندىكى توسالغۇلارنى تۈگىتىش غايىسى بىلەن «يول خەرىتىسى» خاراكتېرىدىكى بىر لايىھە تېكىستى ئۈستىدە مۇزاكىرىلەشكەن.
بۇ سۆھبەتكە تۈركىيەگە ۋاكالىتەن مىللىي ئىستىخبارات ئىدارىسى باشلىقى كالىن، مىسىر ۋە قاتاردىن كەلگەن يۇقىرى دەرىجىلىك مەسئۇللاردىن باشقا پەلەستىنلىك گۇرۇھلارنىڭ ۋەكىللىرىمۇ ئىشتىراك قىلغان.
تەرەپلەرنىڭ مۇساپىنى ئىلگىرى سۈرۈشكە قاراتقان پىكىرلىرىنىڭ ئومۇمىي جەھەتتىن «بىنا قىلغۇچى (ئىجابىي) بىر كەيپىياتتا» مۇزاكىرە قىلىنغانلىقى بىلدۈرۈلدى.
سۆھبەتتە ئۇرۇش توختىتىشنىڭ تۇنجى باسقۇچىغا ئائىت مەسئۇلىيەتلەرنى تامامىلاش، ئىنسانىي ياردەم بۇيۇملىرىنىڭ كىرىش مىقدارىنى كۆپەيتىش ۋە مەيداندا تىنچلىقنى قوغداشقا قارىتىلغان قەدەملەر مۇزاكىرە قىلىندى.
غەززەنى باشقۇرۇش، قايتىدىن قۇرۇپ چىقىش مۇساپىسى، خەلقئارالىق قوشۇنلارنى ئورۇنلاشتۇرۇش ۋە ئۇرۇش توختىتىشنى يولغا قويۇشقا ئائىت مېخانىزملارمۇ يىغىننىڭ كۈنتەرتىپىدىن ئورۇن ئالدى.
ئۇرۇش توختىتىش كېلىشىمى 2025-يىلى 10-ئۆكتەبىردە كۈچكە ئىگە بولغان بولۇپ، تۇنجى باسقۇچتا ئەسىرلەرنى ئالماشتۇرۇش، ئىنسانىي ياردەم بۇيۇملىرىنىڭ كىرىشىنى كۆپەيتىش ۋە ئىسرائىلىيە ئارمىيەسىنىڭ بەزى رايونلاردىن قىسمەن چېكىنىشىگە ئوخشاش قەدەملەر يولغا قويۇلغان ئىدى. پەلەستىنلىك مەنبەلەر بولسا ئىسرائىلىيەنىڭ كېلىشىم دائىرىسىدىكى مەسئۇلىيەتلىرىنى تولۇق ئادا قىلمىغانلىقىنى ۋە ۋەھشىي ھۇجۇملارنىڭ يەنىلا داۋاملىشىۋاتقانلىقىنى ئاشكارىلىماقتا.
كىلىشىمنىڭ ئىككىنچى باسقۇچىدا غەززەنى باشقۇرۇش، قايتىدىن قۇرۇش، خەلقئارالىق كۈچلەرنى ئورۇنلاشتۇرۇش، ئىسرائىلىيە ئارمىيەسىنىڭ تولۇق چېكىنىشى ۋە بەزى سىياسىي-بىخەتەرلىك ئورۇنلاشتۇرۇشلىرىنىڭ مۇزاكىرە قىلىنىشى نىشان قىلىنماقتا.
پەلەستىنلىك گۇرۇھلار بىلەن كاپالەتچى دۆلەتلەرنىڭ ۋەكىللىرى، ئۇرۇش توختىتىشنىڭ ئىككىنچى باسقۇچىغا ئائىت جىددىي ئۇچرىشىشلار قاھىرەدە تۈنۈگۈن باشلانغان ئىدى.
