تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر-ئالاقە ئىدارىسى، جۇمھۇر رەئىس رەجەپ تاييىپ ئەردوغاننىڭ كېلەر ھەپتە ئىشقا ئاشۇرۇلۇشى پىلانىلىنۋاتقان ئۈچ كۈنلۈك پارس قولتۇقى زىيارىتى دائىرىسىدە، 21-ئۆكتەبىردىن 23-ئۆكتەبىرگىچە كۇۋەيت، قاتار ۋە ئوماندا زىيارەتتە بولىدىغانلىقىنى ئۇقتۇردى.
جۇمھۇر رەئىسلىك مەھكىمىسى ئۇچۇر-ئالاقە ئىدارىسى باشلىقى بۇرھانەتتىن دۇراننىڭ بىلدۈرۈشىچە، ئەردوغاننىڭ پارس قولتۇقىدىكى ئۈچ دۆلەت رەھبىرىنىڭ تەكلىپىگە بىنائەن ئېلىپ بېرىلىدىغان بۇ زىيارەتلەر ئارقىلىق، سىياسىي، ئىقتىسادىي ۋە دۆلەت مۇداپىئە ھەمكارلىقىنى كۈچەيتىش بىلەن بىرگە، ھالقىلىق رايونلۇق ۋە خەلقئارالىق مەسىلىلەردە ئۆزئارا ئەھدىلىشىشمۇ پىلانلانماقتا ئىكەن.
دۇران X سۇپىسىدا ئېلان قىلغان باياناتىدا، ئەردوغاننىڭ زىيارەتلىرى جەريانىدا سودا، مەبلەغ سېلىش ۋە ئېنېرگىيە شېرىكلىكىنى كېڭەيتىشنى مەقسەت قىلغان تۈرلۈك كېلىشىملەرنى ئىمزالىشىنىڭ كۈتۈلۈۋاتقانلىقىنى بىلدۈردى.
مەزكۇر زىيارەت، ئەنقەرەنىڭ زور ئىقتىسادىي كېلىشىملەر ۋە ئىستراتېگىيەلىك دىيالوگلار بىلەن گۈللەنگەن يېقىنلىشىش دەۋرىدىن كېيىن، پارس قولتۇقى دۆلەتلىرى بىلەن بولغان ئالاقىسىنى تېخىمۇ كۈچەيتىش تىرىشچانلىقىنى نامايان قىلماقتا.
جۇمھۇر رەئىسنىڭ بۇ زىيارىتى يەنە، تۈركىيەنىڭ ئوتتۇرا شەرقتە داۋاملىشىۋاتقان توقۇنۇشلار ۋە ئۆزگىرىۋاتقان ئىتتىپاقلار ئارىسىدا مۇھىم بىر ۋاسىتىچى ھەم رايونلۇق كۈچ مەركىزى سۈپىتىدىكى ئورنىنى مۇستەھكەملەش تىرىشچانلىقىنىڭ بىر قىسمى، دەپ قارالماقتا. ئەردوغان پارس قولتۇقىنى ئەڭ ئاخىرقى قېتىم 2023-يىلى 7-ئايدا زىيارەت قىلغان ئىدى.
