مىنىستىر ئەلى پەرۋەزمالىك ئىسلامئابادنىڭ (ھۆكۈمەتنىڭ) بۇ ھەمكارلىقنى «تولۇق قوللايدىغانلىقى»نى ۋە بۇ ھەمكارلىق تىرىشچانلىقلىرىنىڭ ئۆزلىرىنىڭ دېڭىز تەۋەلىكىدىكى زاپاسلىرىنى قېدىرىپ تەكشۈرۈش ئۈچۈن «كۈچلۈك ئىلھام مەنبەسى بولىدىغانلىقى»نى تەكىتلىدى.
تۈركىيە بىلەن پاكىستان، پاكىستاننىڭ دېڭىز تەۋەلىكىدىكى 40 ئورۇندا نېفىت ۋە تەبىئىي گاز چارلاشنى ھۆددىگە ئېلىش ئۈچۈن بىرلىكتە تەكلىپ سونۇش توغرىسىدا كېلىشىم ئىمزالىدى.
پاكىستان نېفىت مىنىستىرلىقى بايانات ئېلان قىلىپ، ئىككى دۆلەتنىڭ ئورتاق چارلاش تەكلىپ سونۇش كېلىشىمىنىڭ سەيشەنبە كۈنى پاكىستاننىڭ پايتەختى ئىسلامئابادتا ئۆتكۈزۈلگەن «2025-يىللىق پاكىستان كانچىلىق مەبلەغ سېلىش مۇنبىرى» جەريانىدا ئىمزالانغانلىقىنى ئۇقتۇردى.
پاكىستان ھۆكۈمىتى فېۋرال ئېيىدا ماكران ۋە ئىندۇس ئويمانلىقى دېڭىز تەۋەلىكىدىكى 40 ئورۇندا قېدىرىپ تەكشۈرۈش سەپەرۋەرلىكى ھۆددىگەرلىكى ئېلان قىلىپ، قېدىرىپ تەكشۈرۈش ئىجازەتنامىسى بېرىش پۇرسىتى ياراتقانلىقىنى جاكارلىغانىدى.
باياناتتا: «بۇ ھۆددىگە بېرىش باسقۇچى دۆلەتنىڭ نېفىت-گاز قېدىرىپ تەكشۈرۈش ۋە ئېچىش ساھەسىگە بىۋاسىتە چەت ئەل مەبلىغى (FDI) جەلپ قىلىش ئۈچۈن مۇھىم پۇرسەت ھېسابلىنىدۇ» دەپ كۆرسىتىلدى.
پاكىستاننىڭ «مارى ئېنېرگىيە چەكلىك شىركىتى»، «نېفىت-گاز تەرەققىيات چەكلىك شىركىتى» ۋە «پاكىستان نېفىتچىلىك چەكلىك شىركىتى» قاتارلىق شىركەتلىرى بىلەن تۈركىيەنىڭ دۆلەت ئىگىلىكىدىكى «تۈركىيە نېفىتلىرى پايچېكلىك شىركىتى» (TPAO) پاكىستان دېڭىز تەۋەلىكىدىكى چارلاشلارغا بىرلىكتە قاتنىشىش كېلىشىمى ئىمزالىدى.
باياناتتا يەنە: «بۇ ئىستراتېگىيەلىك ھەمكارلىقنىڭ پاكىستانغا جىددىي ئېھتىياجلىق بولغان چەت ئەل بىۋاسىتە مەبلىغىنى (FDI) ئېلىپ كېلىدىغانلىقىغا، شۇنداقلا دۆلەتنىڭ دېڭىز تەۋەلىكىدىكى تېخى بايقالمىغان يوشۇرۇن بايلىقىنى قېدىرىپ تەكشۈرۈش ۋە باھالاش ئۈچۈن خەلقئارالىق تېخنىكا، تەجرىبە ۋە ماھارەتلەرنىڭ ئورتاقلىشىشىغا شارائىت يارىتىپ بېرىدىغانلىقىغا ئىشىنىمىز» دېيىلدى.
تۈركىيە ئېنېرگىيە ۋە تەبىئىي بايلىق مىنىستىرى ئالپئارسلان بايراقتار بىلەن پاكىستان نېفىت مىنىستىرى ئەلى پەرۋەيز مالىك ئىمزا قويۇش مۇراسىمىغا قاتناشتى.
مىنىستىر ئەلى پەرۋەزمالىك ئىسلامئابادنىڭ (ھۆكۈمەتنىڭ) بۇ ھەمكارلىقنى «تولۇق قوللايدىغانلىقى»نى ۋە بۇ ھەمكارلىق تىرىشچانلىقلىرىنىڭ ئۆزلىرىنىڭ دېڭىز تەۋەلىكىدىكى زاپاسلىرىنى قېدىرىپ تەكشۈرۈش ئۈچۈن «كۈچلۈك ئىلھام مەنبەسى بولىدىغانلىقى»نى تەكىتلىدى.
بايراقتار ئىسلامئاباد تەرىپىدىن ئۆتكۈزۈلگەن كانچىلىق ساھەسىگە مەبلەغ سېلىش مۇنبىرىگە يۇقىرى باھا بەردى.
