تۈركىيە ئىسرائىلىيەنىڭ غەززەگە ياردەم يەتكۈزۈۋاتقان «سۇمۇد» پاراخوت ئەترىتىگە قىلغان مۇداخىلىسىنى ئەيىبلەپ، بۇنى پۇقرالارنى خەۋپكە ئىتتىرىدىغان «تېررورلۇق ھەرىكىتى» دەپ ئاتىدى.

تاشقى ئىشلار مىنىستىرلىقىنىڭ باياناتىدا مۇنداق دېيىلدى: «تىنچلىق يولى بىلەن ھەرىكەت قىلىۋاتقان قورالسىز پۇقرالارنى نىشان قىلغان بۇ ھۇجۇم، غەززەنى ئاچارچىلىققا مەھكۇم قىلغان نېتانياھۇ ھۆكۈمىتىنىڭ فاشىستچە ۋە ھەربىي سىياسەتلىرىنىڭ پەلەستىنلىكلەر بىلەنلا چەكلىنىپ قالماي، ئىسرائىلىيە زۇلۇمىغا قارشى تۇرغان بارلىق كىشىلەرنى نىشان قىلىدىغانلىقىنىڭ ئىسپاتىدۇر». باياناتتا يەنە: «ئىسرائىلىيە قىسىملىرى تەرىپىدىن تۇتقۇن قىلىنغان پۇقرالىرىمىز ۋە باشقا يولۇچىلارنى تېزدىن قويۇپ بەردۈرۈش ئۈچۈن زۆرۈر خىزمەتلەر باشلاندى» دېيىلدى.

«سۇمۇد» پاراخوت ئەترىتى ۋەكىللەر ئۆمىكىنىڭ جاۋابى

«سۇمۇد» پاراخوت ئەترىتى تۈركىيە ۋەكىللەر ئۆمىكىمۇ ئىسرائىلىيەنىڭ «قورالسىز ئىنسانپەرۋەرلىك ياردەم خادىملىرىغا خەلقئارا دېڭىز تەۋەلىكىدە قىلغان قانۇنسىز ھۇجۇمى»نى ئەيىبلىدى.

ۋەكىللەر ئۆمىكىنىڭ باياناتىدا، ئىسرائىلىيە ئەسكەرلىرىنىڭ شۇ يەر ۋاقتى كەچ سائەت 20:30 ئەتراپىدا «ئالما»، «سىرىئۇس» ۋە «ئادارە» پاراخوتلىرىغا قانۇنسىز ھالدا بېسىپ چىقىپ، كېمىلەرنىڭ ئالاقىسىنى قەستەنلىك بىلەن ئۈزۈۋېتىپ، ياردەم چاقىرىقلىرىنى توسقانلىقى بىلدۈرۈلدى. باياناتتا يەنە: «نۇرغۇن كېمىگە مۇداخىلە قىلىنغان بولسىمۇ، «سۇمۇد» پاراخوت ئەترىتى غەززە دېڭىز قىرغىقىدىن 60 دېڭىز مىلى يىراقلىقتا يەنىلا ئالغا ئىلگىرىلىمەكتە» دەپ كۆرسىتىلدى.

بۇ ۋەقە تۈركىيە ۋە باشقا دۆلەتلەر قانۇنسىز دەپ قاراۋاتقان «ئىسرائىلىيەنىڭ غەززە قامالى»نى يەنە بىر قېتىم دۇنيانىڭ دىققەت مەركىزىگە ئايلاندۇردى. ئەنقەرە خەلقئارا جەمئىيەتنى ياردەم ئەترەتلىرىنى قوغداشقا ۋە ئىنسانپەرۋەرلىك ياردەملىرىنىڭ بۇ رايونغا توسالغۇسىز يەتكۈزۈلۈشىگە كاپالەتلىك قىلىشقا قايتا-قايتا چاقىردى.